جۇڭشىڭ شىركىتى بۈگۈن بېيجىڭدا Blade تۈرىگە تەۋە يېڭى يانفونى Blade A1 نى رەسمىي ئېلان قىلغان، بۇ يانفونغا بارماق ئىزىنى تونۇش ئىقتىدارى قوشۇلغان بولۇپ، باھاسى ئەڭ تۆۋەن بولغاندا پەقەت 599 يۈەن ئىكەن، تۈنۈگۈن TCL شىركىتى ئېلان قىلغان لېۋەن 2C يانفونىدىن 100 يۈەن ئەرزان ئىكەن.

بۇ جۇڭشىڭنىڭ Blade تۈرىدە جۇڭگو بازىرىغا قارىتا ئېلان قىلىنغان تۇنجى يانفون بولۇپ، ئاساسلىقى ياش ئىستېمالچىلارنى نىشانلىغان.

     قاتتىق دېتال سەپلىمىسىگە كەلسەك، بۇ يانفونغا ئېنىقلىق دەرىجىسى 720P بولغان 5.0 دىيۇملۇق ئېكران، چاستوتىسى 1.3GHz بولغان لىيەنفاكې MT6735 تىپلىق تۆت يادرولۇق بىر تەرەپ قىلغۇچ، 2GB لىق ئىچكى ساقلىغۇچ، 16GB لىق ئاساس ساقلىغۇچ، سەككىز مىليون ۋە 13 مىليون پىكسېللىق كامېرا شۇنداقلا 2800 مىللىئامپىرلىق باتارىيە قاتارلىقلار سەپلەنگەن. قوش كارتىنى تەڭ قوللايدىغان بولۇپ، ئاندىرويىد 5.1 ئاساسىدا ئۆزگەرتىلگەن Mifavor3.2 ناملىق سىستېما قاچىلانغان.

Blade A1 يانفونىنىڭ بارماق ئىزىنى تونۇش سېنىزورى جۇڭشىڭنىڭ بايراقدار دەرىجىلىك يانفونلىرى بىلەن ئوخشاش بولۇپ، ئېكراننى يورۇتۇش ئۈچۈن پەقەت 0.3 سېكونت ۋاقىت كېتىدىكەن. ئاساس كۇنۇپكىسىنىڭ ئىقتىدارىنى تاق بېسىش، قوش بېسىش ۋە ئۇزۇن ۋاقىت بېسىش قاتارلىق كۆپ خىل مەشغۇلات ھالىتى بويىچە تەڭشەپ قويغىلى بولىدىكەن.

سېتىلىش باھاسىغا كەلسەك، Blade A1 يانفونى كۆچمە خەۋەرلىشىش نۇسخىسىنىڭ باھاسى 599 يۈەن، ھەممىباب تور نۇسخىسىنىڭ باھاسى 699 يۈەن بولۇپ، بەش خىل رەڭلىك نۇسخىسى باركەن. بۇ يانفون بۈگۈندىن باشلاپ جىڭدوڭ تور شەھەرچىسى ۋە تېڭشۈن كومپيۇتېر باشقۇرغۇچ دېتالى ئارقىلىق زاكاز قوبۇل قىلىشنى باشلىغان، 12-ئاينىڭ 11-كۈنى سائەت 10:00 دا، جىڭدوڭ تورى بىلەن جۇڭشىڭ يانفونى ئورگان تەرەپ سودا تورىدا رەسمىي سېتىشنى باشلايدىكەن.