موتورولا شىركىتى بۇ يىلنىڭ بېشىدا Moto 360 ناملىق ئەقلىي ئىقتىدارلىق قول سائىتىنىڭ 2-ئەۋلاد نۇسخىسىنى ئېلان قىلغان، ئەمما، بۇ قول سائىتىنىڭ لايىھەسى قارىماققا سودىگەرلەرگە خاس تۈستە بولغاچقا، تەنھەرىكەت بىلەن شۇغۇللىنىشنى ياقتۇرىدىغان ئىستېمالچىلارنىڭ ئالقىشىغا ئېرىشەلمىگەن. شۇنىڭ ئۈچۈن، موتورولا شىركىتى يىقىندا Moto 360 نىڭ تەنھەرىكەت نۇسخىسىنى ئوتتۇرىغا چىقارغان.

     تەنھەرىكەت نۇسخىسىدىكى Moto 360 نىڭ ماتىرىيالىدا ئۆزگىرىش بولغان. سائەت يۈزىنىڭ چوڭلۇقى 45mm، ئېغىرلىقى 54g بولۇپ، ئېكران يۈزىگە «كاڭنىڭ گورىللا 3-ئەۋلاد ئەينىكى» سەپلەنگەن. سائەت بېغىغا ئورگانىك سىلىتسىي ماتىرىيال قىلىنغان بولۇپ، چىرىشنىڭ ئالدىنى ئېلىش ۋە رەڭگى ئاسانلىقچە ئۆڭۈپ كەتمەسلىك قاتارلىق ئارتۇقچىلىقلارغا ئىگە ئىكەن.

     سەپلىمىسىگە كەلسەك، Moto 360 نىڭ تەنھەرىكەت نۇسخىسىغا ئورۇن بەلگىلەش سىستېمىسى، يەنى GPS ئورنىتىلغان بولۇپ، باشقا تەرەپلەردىكى سەپلىمىسى ئادەتتىكى نۇسخىسى بىلەن پەرقلەنمەيدىكەن. ئۇنىڭغا ئېنىقلىق دەرىجىسى 360*325 بولغان 1.37 دىيۇملۇق ئېكران، كۇۋالكوم 400 تىپلىق بىر تەرەپ قىلغۇچ، 512MB لىق ئىچكى ساقلىغۇچ، 4GB لىق ئاساس ساقلىغۇچ، 300 مىللىئامپىرلىق باتارىيە قاتارلىقلار سەپلەنگەن؛ كۆك چىش ۋە Wi-Fi ئىقتىدارى ھازىرلانغان، يۈرەك رېتىمىنى سېزىش قاتارلىق ساغلاملىققا ئائىت ئىقتىدارلار قوشۇلغان، قارا، ئاق ۋە ھال رەڭلىك نۇسخىلىرى بولۇپ، Android Wear سىستېمىسى قاچىلانغان.

  تەنھەرىكەت نۇسخىسىدىكى Moto 360 نىڭ سېتىلىش باھاسى 299.99 دوللار بولۇپ، كېلەر يىلى 1-ئاينىڭ 7-كۈنى رەسمىي بازارغا كىرىدىكەن.