غالىپ خۇجىئابدۇللا

دەۋر تەرەققىياتىغا ئەگىشىپ مەملىكىتىمىزدە، جۈملىدىن ئاپتونوم رايونىمىزدا نۇرغۇن كارخانا قۇرۇلدى. كارخانىلارنىڭ قۇرۇلۇشى بىلەن كارخانا خىزمەتچىلىرىمۇ كۆپىيىپ باردى. بەزى كارخانا خوجايىنلىرى خىزمەتچى قوبۇل قىلىشتا، دىپلومىغا، يېشىغا، جىنسىغا ۋە باشقا ئالاھىدىلىكلىرىگە كۆڭۈل بۆلۈپ، ئۇلارنىڭ ساپاسىغا ئانچە كۆڭۈل بۆلمىدى. ئەمەلىيەتتە كارخانا خىزمەتچىلىرىنىڭ ساپاسىنىڭ قانداق بولۇشى، كارخانا تەرەققىياتىغا ئىنتايىن چوڭ تەسىر قىلىدۇ.

ماتېرىياللارغا ئاساسلانغاندا، تەرەققىي تاپقان ئەللەردە كارخانا خىزمەتچىلىرىنىڭ ساپاسىغا ئىنتايىن كۆڭۈل بۆلىدىكەن. ئۇلارنىڭ نەزەرىدە كارخانىنىڭ گۈللىنىشى ۋە خاراب بولۇشى كارخانا خىزمەتچىلىرىنىڭ ساپاسى بىلەن زىچ مۇناسىۋەتلىك بولىدىكەن. بۇنىڭ ئۈچۈن كارخانا خوجايىنلىرى ئۆزىگە قاراشلىق كارخانا خىزمەتچىلىرىنىڭ خىزمەت ۋاقتىدىكى گەپ – سۆز، يۈرۈش – تۇرۇشى، خېرىدارلارغا بولغان مۇئامىلىسى، كەسپى ئەخلاقى ۋە خىزمىتىنىڭ ئۈنۈمى قاتارلىقلارغا كۆڭۈل بۆلۈپلا قالماي، بەلكى ئىشتىن سىرتقى ۋاقىتتىكى پائالىيەتلىرىگىمۇ كۆڭۈل بۆلىدىكەن. چەت ئەللىك خوجايىنلارنىڭ ئۆز خىزمەتچىلىرىنىڭ ئىشتىن سىرتقى ۋاقىتلاردىكى تۇرمۇشىغىمۇ كۆڭۈل بۆلۈشى، خىزمەتچىلىرىنىڭ ساغلام ھەۋەس، ياخشى ئادەتلەرنى يېتىلدۈرۈۋېلىشىغا ئىلمىي يېتەكلىشى، مۇقەررەر ھالدا خىزمەتچىلىرىنىڭ ساپاسىنى ئۆستۈرۈپلا قالماي، بەلكى كارخانىسىنىڭ گۈللىنىشىگە زور تەسىر كۆرسەتكەن.

فىرانسىيەلىك كاسىت ئىسىملىك بىر كىشى 1949 – يىلى ئۈزۈم پىششىقلاش زاۋۇتى قۇرۇپ، 30 خىزمەتچى قوبۇل قىپتۇ. بىر كۈنى كاسىت ئىشتىن چۈشۈپ خوتۇنى بىلەن كوچا ئارىلاپ كېتىۋاتقاندا، بىر خىزمەتچىسىنىڭ قىمارخانىغا كىرىپ كەتكەنلىكىنى كۆرۈپ قاپتۇ. گەرچە فىرانسىيە قانۇنىدا قىمار ئويناشقا يول قويۇلغان بولسىمۇ، ئەمما كاسىت بۇنداق ھەۋەسنىڭ ئۇلارغا قىلچە پايدىسى يوقلۇقىنى ھېس قىپتۇ. كاسىت ئۇ خىزمەتچىسىنىڭ كەينىدىن قىمارخانىغا كىرسە، يەنە بىر نەچچە خىزمەتچىسى بۇ يەردە قىمار ئويناۋاتقان ئىكەن. كاسىت ئۇلارغا نەسىھەت قىلىپ قىمارخانىدىن ئېلىپ چىقىپ كېتىپتۇ.

مۇشۇ ئىشتىن كېيىن كاسىت ئۆز خىزمەتچىلىرىنىڭ ئىشتىن سىرتقى ۋاقىتلاردا ساغلام بىر تۇرمۇش ھەۋىسى يېتىلدۈرۈۋېلىشىنىڭ زۆرۈرلۈكىنى ھېس قىپتۇ. بۇنىڭ بىلەن ئۇ ئۇزاق ئويلىنىپ خىزمەتچىلىرىگە بىر بىنا سېلىشنى كۆڭلىگە پۈكۈپتۇ – دە، دەرھال بىرمۇنچە پۇل ئاجرىتىپ بىنا سالدۇرۇپتۇ. ئۇ بۇ بىنادا ئۇسسۇل كۇرسى، يېزىقچىلىق كۇرسى، مۇزىكا كۇرسى، رەسساملىق كۇرسى قاتارلىق كۇرسلارنى ئېچىپتۇ. بۇنىڭ بىلەن ئۇزاققا بارماي ئۇنىڭ خىزمەتچىلىرى كۇرسلارغا قاتنىشىدىغان، خەلقئارا سەۋىيەدىكى بالېت ئۇسسۇللىرىنى كۆرىدىغان، داڭلىق رەسساملار بىلەن ئۇچرىشىپ رەسىم سىزىشنى ئۆگىنىدىغان بوپتۇ.

ۋاقىتنىڭ ئۆتۈشىگە ئەگىشىپ كاسىت ئاچقان كۇرسلار ئۇنىڭ خىزمەتچىلىرىنىڭ ساپاسىنى ئۆستۈرۈشتە ئالاھىدە ئۈنۈم ھاسىل قىپتۇ. بۇنىڭ بىلەن فىرانسىيەدىكى نۇرغۇن كارخانىچى خىزمەتچىلىرىنىڭ ساپاسىنىڭ كاسىتنىڭ خىزمەتچىلىرىنىڭ ساپاسىغا يەتمەيدىغانلىقىنى ئېتىراپ قېلىشىپتۇ. بۇنداق يۈزلىنىشنىڭ تەسىرىدە كاسىتنىڭ ئۈزۈم ھاراق زاۋۇتىنىڭ ئىقتىسادىي ئۈنۈمى ھەسسىلەپ ئېشىپتۇ. يېقىندا ئۇنىڭ ئۈزۈم ھاراق زاۋۇتى فىرانسىيە بويىچە بىرىنچى، دۇنيا بويىچە ئىككىنچى چوڭ ئۈزۈم ھاراق زاۋۇتىغا ئايلىنىپ، يىللىق ھاراق ئىشلەپچىقىرىش مىقدارى 4 مىليارد 50 مىليون قۇتىدىن ئېشىپتۇ.

يۇقىرىقىلاردىن شۇنى كۆرۈۋېلىشقا بولىدىكى، كارخانا خوجايىنلىرى كارخانىنى تەرەققىي قىلدۇرۇشتا، باشقۇرۇش تۈزۈملىرى، باشقىلارنىڭ خىزمەت تەجرىبىلىرى ۋە پۇل تېپىشنىڭ ئۇسۇللىرىغىلا ئېسىلىۋالماي، بەلكى قانداق قىلىپ ئۆز خىزمەتچىلىرىنىڭ ساپاسىنى ئۆستۈرۈشكە كۆڭۈل بۆلۈشى ئىنتايىن مۇھىمكەن. مەيلى ھۆكۈمەت ئىگىلىكىدىكى ئىدارە – ئورۇنلار بولسۇن ياكى شەخسىي كارخانىلار بولسۇن، خىزمەتچىلىرىنىڭ ساپاسىنىڭ يۇقىرى – تۆۋەن بولۇشى، شۇ ئورۇننىڭ خىزمەت ئۈنۈمدارلىقىغا بىۋاسىتە تەسىر قىلىدۇ. مەلۇم بىر كارخانا ياكى مەلۇم بىر كوللېكتىپ خىزمەتچىلىرىنىڭ ساپاسى يۇقىرى بولسا، شۇ ئورۇننىڭ ياكى كارخانىنىڭ ئىقتىسادىي ئۈنۈمىمۇ، ئىجتىمائىي ئۈنۈمىمۇ يۇقىرى بولىدۇ. مۇبادا مەلۇم بىر كارخانىنىڭ خىزمەتچىلىرىنىڭ ساپاسى تۆۋەن بولسا، بۇ كارخانا ئۆزىنىڭ ساپاسىز خىزمەتچىلىرى تەرىپىدىن ۋەيران بولۇپ كېتىشى مۇمكىن. بۇنىڭ ئۈچۈن كارخانا خوجايىنلىرى چارە – تەدبىرلەرنى قوللىنىپ، ئۆز خىزمەتچىلىرىنىڭ ساپاسىنى ئۆستۈرۈشى تولىمۇ مۇھىم ئەھمىيەتكە ئىگە.

مەنبە : شىنجاڭ گېزىتى

لەگلەك تورى ئۈندىدار سالونىنى قوشىۋېلىڭ ـــــــــــــــــــ ئىزدەش نامى LEGLEK