چىش چىرىش كۆپ كۆرۈلىدىغان كېسەل. ئۇ ئېغىز بوشلۇقىدىكى كۆپ خىل ئامىلنىڭ تەسىرىدە چىشنىڭ قاتتىق توقۇلمىسى، يەنى چىش ئېمالى، چىش دېنتىن ماددىسى ياكى چىش ماددىسى بۇزغۇنچىلىققا ئۇچرايدىغان كېسەل بولۇپ، نۆۋەتتە، ئىنسانلار ساغلاملىقىغا ئېغىر تەسىر يەتكۈزىۋاتقان كېسەللەرنىڭ بىرى.
ئادەتتە، كىشلەر يۈزە چىش چىرىشنى ھېس قىلالمايدۇ. ئەگەر بۇنى ۋاقتىدا داۋالاتمىسا، كاۋاك بارغانسېرى چوڭقۇرلىشىپ، چىرىش دەرىجىسىگە يەتكەندە تاتلىق، چۈچۈمەل ياكى سوغۇق، ئىسسىقنىڭ غىدىقلىشىغا سەزگۈرلىكى ئېشىپ كېتىدۇ. داۋاملىق ئىچكىرلەپ تەرەققىي قىلسا، چىش يىلىك كېسىلى، چىش يىلتىز ئۇچى ئەتراپى كېسىلى، جاغ سۆڭەك ياللۇغى قاتارلىقلارنى كەلتۈرۈپ چىقىرىدۇ. چىش ئاغرىپلا قالماستىن، يەنە بەدەندىكى ئاستا خاراكتېرلىك كېسەل سەۋەبچىسىگە ئايلىنىپ، كۆز كېسىلى، بۆرەك ياللۇغى، رېماتىزم قاتارلىق كېسەللەرنى كەلتۈرۈپ چىقىرىدۇ. چىش چىرىش يەنە چايناش، ھەزىم قىلىش فۇنكىسىيەسىگە تەسىر كۆرسىتىدۇ. چىش چىرىشنىڭ بالىلارغا بولغان زىيىنى تېخىمۇ چوڭ. ئۇلارنىڭ ئوزۇقلۇقلارنى چايناش، ھەزىم قىلىش، قوبۇل قىلىش فۇنكىسىيەسىگە تەسىر قىلىش ئارقىلىق، چىش جاغ سىستېمىسىنىڭ ئۆسۈپ يېتىلىشىگە تەسىر كۆرسىتىپ، يۈز شەكلى غەيرىي بولۇشنى كەلتۈرۈپ چىقىرىدۇ. شۇڭا، چىش چىرىشكە سەل قارىماي، مۇۋاپىق تەدبىر قوللىنىپ، چىش چىرىش كېسىلىنىڭ ئۈنۈملۈك ئالدىنى ئېلىش كېرەك.