يەر شارى خەۋەر تورى 16-ماي خەۋىرى؛ لەگلەك تورى تەرجىمىسى: ئافغانىستان ئارمىيىسى ئافغانىستاننىڭ بىر قانچە رايۇنلىرىدا تالىبان قۇراللىقلىرىغا قارشى كەڭ كۆلەملىك ھۇجۇم قوزغاپ 138 نەپەر تالىبان قۇراللىقىنى ئۆلتۈردى ۋە 83 نەپەر قۇراللىقنى يارىلاندۇردى. ئافغانىستان ئىچكى ئىشلار مىنىستىرلىكىنىڭ تور بېكىتىدە ئېلان قىلىنغان باياناتقا قارىغاندا، جۈمە كۈنىدىن بۇيان ئافغانىستاننىڭ قۇندۇز، فەرياب، سارىپۇل، بەدەخشان، زابۇل، ئۇرۇزگان، غەزنە، پاكتىيا،نانگارھار ۋە گۇر رايۇنلىرىدا ئافغانىستان بىخەتەرلىك قىسىملىرى تالىبان قۇراللىقلىرىغا قارشى ھەرىكەت باشلىغان. باياناتقا ئاساسلانغاندا يۇقارقى رايۇنلاردىكى ھەرىكەتلەردە 138 نەپەر تالىبان قۇراللىقى ئېتىپ تاشلانغان، 83 نەپىرى يارىلانغان، يارىلانغانلارنىڭ بىر قىسىم ئەسىر ئېلىنغان. باياناتتا كۆرسىتىلىشچە، ئافغانىستان بىخەتەرلىك قىسملىرى باغلان ۋە قەندەھار رايۇنلىرىدا يول بويىغا ئورۇنلاشتۇرۇلغان بومبىنى ئاكتىپسىزلاشتۇرغان ۋە تالىبانغا ئائىت قۇرال-ياراغ ۋە 55 موتوسىكلىتنى قولغا چۈشۈرگەن.
تالىبان باياناتچىسى زەبىھۇللاھ مۇجاھىد بايانات ئېلان قىلىپ، يۇقارقى توقۇنۇشلاردا پەنجشىر، باغلان، قۇندۇز رايۇنلىرىدا ئافغانىستان بىخەتەرلىك قىسمىدىن 22 نەپەر ئەسكەرنى ئۆلتۈرگەنلىكىنى ئىلگىرى سۈردى. تالىبان ئۈچ ھەپتە ئىلگىرى باشلىغان « ئىرادە» ناملىق ھۇجۇم ھەرىكىتىنى ئافغانىستاننىڭ بىر قانچە رايۇنلىرىدا كېڭەيتمەكتە.