مورگان مالىيە گۇرۇھى ئامېرىكىدىكى ئون چوڭ مالىيە تەشكىلاتىنىڭ بىرى بولۇپ، 19 – ئەسىرنىڭ ئاخىرىلىرى بارلىققا كەلگەن. 1861 – يىلى 24 ياشقا كىرگەن ئامېرىكىلىق جون پيرپونت مورگان نيۇيوركتا ئۆزىنىڭ ئىسمى بىلەن ئاتالغان J P. . مورگان شىركىتىنى قۇرۇپ، شەخسىي بانكا كەسپى بىلەن شۇغۇللىنىدۇ. دۇنيانىڭ تەرەققىياتىغا ئەگىشىپ، دۇنيا پۇل مۇئامىلە مەركىزى بارا – بارا لوندوندىن نيۇيوركقا يۆتكىلىپ، J P. . مورگان شىركىتى تۇرۇشلۇق ۋال كوچىسى 23 – نومۇرلۇق قورۇ پۇل مۇئامىلە ئىمپېرىيەسىنىڭ مەركىزىگە ئايلىنىدۇ. ئەينى ۋاقىت دەل فىرانسىيە – پېرۇسىيە ئۇرۇشى مەزگىلى بولۇپ، پېرۇسىيە ئارمىيەسى فىرانسىيەنى مەغلۇپ قىلغاچقا، فىرانسىيە ھۆكۈمىتى مەبلەغ يۈرۈشتۈرۈپ قورال – ياراغ سېتىۋېلىش ئۈچۈن لوندونغا ئادەم ئەۋەتىدۇ. نۇرغۇن بانكىر خەۋپ – خەتەردىن قورقۇپ بۇ ئىشتىن ۋاز كېچىدۇ. ئەمما J P. . مورگان شىركىتى تەۋەككۈل قىلىپ فىرانسىيەگە 10 مىليون فوندسىتېرلىڭ قەرز بېرىپ تۇرىدۇ. جەڭ ئاخىرلاشقاندىن كېيىن، فىرانسىيە مۇددەتتىن بۇرۇن بەلگىلەنگەن باھا بويىچە قەرزنى قايتۇرىدۇ. بۇ قېتىملىق قەرز بېرىپ تۇرۇشتىن كېيىن، J P. . مورگىن شىركىتى 1.5 مىليون فوندسىتېرلىڭلىق ساپ پايدىغا ئېرىشىپ، ھۆكۈمەت مەبلىغى يۈرۈشتۈرۈشتە ئالدىنقى قاتارغا ئۆتىدۇ.
كېيىنكى 100 نەچچە يىل جەريانىدا، مورگان جەمەتى ئەجدادلىرىنىڭ تەۋەككۈل قىلىپ ئىلگىرىلەش ئەنئەنىسىگە ۋارىسلىق قىلىپ، ئاخىرقى ھېسابتا ئەمەلىي كۈچى زور، تەڭداشسىز مورگان ئىمپېرىيەسىنى قۇرۇپ چىقتى.
كارخانا باشقۇرۇش تاسادىپىيلىققا تولغان بولۇپ، دادىللىق ۋە تەۋەككۈلچىلىكنى تەلەپ قىلىدۇ. بۈگۈنكى ئۆزگىرىشچان سودا دۇنياسى خەۋپ – خەتەرگە تولغان. ئەگەر بىر كارخانا سودا پۇرسىتى كەلگەندە تەۋەككۈلچىلىك بىلەن ھەرىكەت قىلىشقا جۈرئەت قىلالمىسا، ئۇنداقتا ئۇ مۇۋەپپەقىيەت قازىنىش پۇرسىتىنى قولدىن بېرىپ قويىدۇ. بېل گەيتس مۇنداق دېگەن: ‹‹پۇرسەت دېگەنلىك ئىلگىرى قىلىپ باقمىغان يېڭى ئىشلارنى سىناپ بېقىش دېگەنلىك››. ئىلگىرى قىلىپ باقمىغان ئىشنى سىناپ بېقىش ئۈچۈن تەۋەككۈلچىلىك روھى بولۇشى كېرەك.
ئەقلىي يەكۈن: بىر كارخانا تەۋەككۈلچىلىك روھىنى يېتىلدۈرۈش ئۈچۈن، چوقۇم كارخانىنىڭ ئىستراتېگىيەلىك پىلانىنى ياخشى تۈزۈشى، ھەر ۋاقىت بازار ئۆزگىرىشىگە دىققەت قىلىشى، پۇرسەتنى بايقىغان ھامان دەرھال ھەرىكەتكە كېلىشى كېرەك.