دۇنيا خەۋەرلىرى تورى 13-ماي خەۋىرى؛ لەگلەك تورى تەرجىمىسى:  پەلەستىن مەركىزى ئىستاستىكا ئىشخانىسى، پەلەستىن تارىخىدا «زور پالاكەت» دەپ تونۇلغان 1948-يىلىدىكى ئىسرائىلىيە ئىشغالىيتى جەريانىدا پەلەستىنلىكلەرنىڭ نۇپۇسى1 مىليۇن 400 مىڭ بولۇپ، 2014-يىلى ئاخىرىدا 9 ھەسسە كۆپىيىپ 12 مىليون 100 مىڭغا يەتكەنلىكىنى ئېلان قىلدى. پەلەستىن مەركىزى ئىستاستىكا ئىشخانىسى «زور پالاكەت» تارىخىنىڭ 67 يىللىق مۇناسىۋىتى بىلەن ئېلان قىلغان باياناتىدا، 1948-يىلىدا قەدىمى پەلەستىن زېمىنلىرىدىكى 1 مىڭ 300 يېزا ۋە مەھەللىدە ياشاۋاتقان پەلەستىنلىكلەرنىڭ نۇپۇسى 1 مىليون 400 مىڭ بولۇپ، بۇلاردىن 800 مىڭ كىشى غەربى قىرغاق ۋە غەززە رايۇنى بىلەن قوشنا ئەرەب دۆلەتلىرىگە كۆچۈپ كەتكەنلىكى، «زور پالاكەت» جەريانىدا يەھۇدىيلارنىڭ 774 يېزا ۋە مەھەللىنى كونترول قىلىۋالغانلىقى، 531 پەلەستىن يېزىسى ۋە مەھەللىسىنىڭ كۆيدۈرۋېتىلگەنلىكى، 70 قېتىمدىن كۆپ قىرغىنچىلىقتا 15 مىڭدىن كۆپ كىشىنىڭ ئۆلتۈرۈلگەنلىكى خاتىرلەنگەن. باياناتتا، ئىئوردان دەرياسى بىلەن ئاق دېڭىز ئارىسىدىكى تارىخى پەلەستىن رايۇنىدا ياشىغان پەلەستىنلىكلەرنىڭ سانىنىڭ 2014-يىل ئاخىرىدا 6 مىليون 100 مىڭغا يەتكەنلىكى، بۇ ساننىڭ 2020-يىلىدا 7 مىليون 100 مىڭغا يىتىشى مۇمكىنلىكى ئېيتىلغان.
باياناتتا يەنە، غەربى قىرغاق ۋە غەززە رايۇنىدا ياشاۋاتقان پەلەستىنلىكلەرنىڭ سانىنىڭ ئۇمۇمى نۇپۇسنىڭ يۈزدە 43% نى تەشكىل قىلىدىغانلىقى، 4 مىليون 600 مىڭ ئۇمۇمى نۇپۇستىن 2 مىليون 800 مىڭ كىشىنىڭ غەربى قىرغاقتا، 1 مىليون 800 مىڭ كىشىنىڭ غەززە رايۇنىدا ياشايدىغانلىقى بىلدۈرۈلدى.
بىرلەشكەن دۆلەتلەر تەشكىلاتى پەلەستىن مۇساپىرلار ياردەم ئورگىنىنىڭ تىزىملىكىدە خاتىرلەنگەن مۇساپىرلارنىڭ سانى2014-يىلى ئ‍ىيۇلدا تەخمىنەن 5 مىليون 490 مىڭغا يەتكەن، بۇلاردىن يۈزدە 29% ى 58 نوقتىدىكى مۇساپىرلار لاگېرىدا ياشايدىكەن، پەلەستىنلىك مۇساپىرلار لاگېرلىرىدىن ئىئ‍وردانىيەدە 10، سۇرىيەدە 9، لىۋاندا 12، غەربى قىرغاقتا 19، غەززە دە 8ى بار ئىكەن.
دوكلاتتا يەنە، قۇددۇس «ئېروسالىم» دا ياشايدىغان پەلەستىنلىكلەرنىڭ نۇپۇسى تەخمىنەن 415 مىڭ بولۇپ، بۇلاردىن يۈزدە 62.1% ى شەرقى قۇددۇستا ياشايدىكەن. بۇ يىلقى  رەسمى ئىستاستىكىغا مەلۇماتىغا قارىغاندا، 8 مىليون 345 مىڭ ئىسرائىلىيە نۇپۇسىنىڭ 6 مىليون 251 مىڭى يەنى 74% ى يەھۇدىيلاردىن تەشكىل تاپىدىكەن.
پەلەستىنلىكلەر 1948-يىلى 14-مايدا ئىسرائىلىيەنىڭ ئىشغالىيتى ئاستىدىكى پەلەستىن زېمىنلىرىدا مۇستەقىللىقىنى جاكارلىشى ۋە پەلەستىنلىكلەرنىڭ مەجبۇرى كۆچۈرۈلۈشى سەۋەبىدىن ھەر يىلى 15-ماينى «زور پالاكەت» كۈنى دەپ خاتىرلەيدۇ.