يەر شارى خەۋەر تورى 11-ماي خەۋىرى ؛ لەگلەك تورى تەرجىمىسى: ئەنگىلىيەدىكى مۇھاپىزەتچى پارتىيە يالغۇز ھاكىمىيەت بېشىغا چىققان بولۇپ، سايلام نەتىجىسىدە پارلامېنتقا 13 نەپەر مۇسۇلمان خەلق ۋەكىلى سايلاندى، بۇلاردىن 8 نەپىرى ئايال. ئەنگىلىيەدىكى ئۇمۇمى سايلام نەتىجىسىدە ئىشچى پارتىيەسىدىن 9 نەپەر، مۇھاپىزەتچى پارتىيەدىن 3 نەپەر ۋە ئىسكوچ مىللىي پارتىيسىدىن 1 نەپەر مۇسۇلمان نامزات خەلق ۋەكىلى بولۇپ پارلامېنتقا كىردى. بۇ سان ئەنگىلىيەدە ھازىرغا قەدەر مۇسۇلمانلاردىن پارلامېنتقا كىرگەن ئەڭ يۇقىرى سەۋىيەدە ئىكەن. ئىشچى پارتىيىسىدىن رۇپا ھۇق، تۇلىپ ۋىزۋانا سىددىق، ناز شاھ، ئىمران ھۈسەيىن، خالىد مەھمۇد، شابانا مەھمۇد، رۇشانارا ئەلى، ياسمىن قۇرەشى، ۋە سادىق خان پارلامېنتقا كىردى. مۇھاپىزەتچى پارتىيەدىن نۇسرەت غەنى، ساجىد جاۋىد ۋە رەھمان چىستى، ئىسكوچ مىللى پارتىيىسىدىن تەسمىنە ئەھمەد شەيىخ خەلق ۋەكىلى بولۇپ پارلامېنتقا كىردى. ئەنگىلىيە پارلامېنتىدا جەمئىي 650 نەپەر پارلامېنت ئەزاسى بار. ئەنگىلىيەدە جەمئىي 2 مىليون 800 مىڭ مۇسۇلمان ياشايدۇ، بۇ سان ئەنگىلىيە نۇپۇسىنىڭ يۈزدە 4.4% گە تەڭ كېلىدۇ. 2010-يىلىدىكى سايلامدا 8 نەپەر مۇسۇلمان خەلق ۋەكىلى پارلامېنتقا كىرگەن ئىدى. ئەنگىلىيەدە 26 دانە سايلام نوقتىسىدا نۇپۇسنىڭ 20% نى مۇسۇلمانلار تەشكىل قىلىدۇ. 7-ماي پەيشەنبە كۈنى ئۆتكۈزۈلگەن ئۇمۇمى سايلامدا داۋىد كامىرون رەھبەرلىكىدىكى مۇھاپىزەتچى پارتىيە پارلامېنتتا 331 ئورۇنغا ئېرىشىپ يالغۇز ھاكىمىيەت بېشىغا چىققان، سايلامدىن كېيىن ئىشچى پارتىيىسى ۋە لىبرال دېموكراتك پارتىيىسى ۋە بىرلەشمە پادىشاھلىق مۇستەقىللىق پارتىيىسى رەھبەرلىرى ئىستىپا بەرگەن.