پايدىلىنىش خەۋەرلىرى تورى خەۋىرى: كورېيەنىڭ توختاپ قېلىش خەۋىپىگە دۇچ كېلىۋاتقان تۈرلۈك ماللار دۇكانلىرى جۇڭگونىڭ ماي بايراملىق دەم ئېلىش مەزگىلىدە قايتىدىن جانلاندى ۋە ناھايىتى كۆپ كىرىم ياراتتى. ماي بايرامدا 100 مىڭ جۇڭگولۇق ساياھەتچى كورېيەگە ساياھەتكە بارغان بولۇپ، كۆپىنچىسى بۇ يەردىكى تۈرلۈك ماللار دۇكىنىدىن مال سېتىۋالغان. ئىستاتىستىكىلىق سانلىق مەلۇماتلارغا قارىغاندا، ماي بايراملىق ئۈچ كۈن دەم ئېلىشتا «لېتيەن»، «شيەندەي»، «يېڭى ئەسىر» قاتارلىق تۈرلۈك ماللار دۇكىنىدىكى ماللارنىڭ سېتىلىش مىقدارى ئالدىنقى يىلنىڭ ئوخشاش مەزگىلدىكىدىن %57 ~ %58 گىچە ئاشقان.
كورېيە «مەركەز كۈندىلىك گېزىتى» نىڭ 5-مايدىكى خەۋىرىگە قارىغاندا، جۇڭگولۇق ساياھەتچىلەرنىڭ ئىستېمالى كىيىم-كېچەك، يېمەك-ئىچمەك، گىرىم بۇيۇمى قاتارلىق ساھالەرگىچە تارقالغان. ماي بايراملىق دەم ئېلىشتا «شيەندەي» تۈرلۈك ماللار دۇكىنىدا «چەت ئەل مودىسى»نىڭ سېتىلىش نىسبىتى ئەڭ يۇقىرى بولۇپ، %83 كە، «يېڭى ئەسىر» تۈرلۈك ماللار دۇكىنىدا ئاياللار كىيىم-كېچەكلىرىنىڭ سېتىلىش نىسبىتى ئەڭ يۇقىرى بولۇپ، %89 كە يەتكەن.
ئەڭ كۆرۈنەرلىك بولغىنى، باھاسى بىر قەدەر قىممەت بولغان كورېيە ئاياللار كىيىم-كېچەكلىرىنىڭ سېتىلىش مىقدارى شىددەت بىلەن ئۆرلەپ، ئادەتتىكىدىن 3.2 ھەسسە ئاشقان، ئوتتۇرا، كىچىك تىپتىكى گىرىم بۇيۇم دۇكانلىرىمۇ جۇڭگولۇق ساياھەتچىلەرنىڭ تەسىرىدە قايتىدىن جانلانغان، «يېڭى ئەسىر» تۈرلۈك ماللار دۇكىنىدىكى «شۆخۇاشيۇ»، «ئوۋخۈي»، «خارا» قاتارلىق كورېيەدە ئىشلەپچىقىرىلغان ئالىي دەرىجىلىك گىرىم بۇيۇملىرىنىڭ سېتىلىش مىقدارى ئادەتتىكىدىن %67 ئاشقان.