ئىشتىنىغا سىيىپ قويغان ئالتە ياشلىق كېسەل بالىنى دادىسى ئۇرۇپ ئۆلتۈرۈپ قويدى

     مۇخبىرنىڭ 15–چېسلا شەنشى ئۆلكىسى يۈنچېڭ شەھەرلىك ج خ تارمىقىدىن ئىگىلىشىچە، شۇ يەرلىك ساقچى تەرەپ يېقىندا بىر قەستەن ئادەم زەخملەندۈرۈپ ئۆلتۈرۈش دېلوسىنى پاش قىلغان، ئۆلگۈچى بولسا ئالتە ياشقا كىرگەن، ئەقلى ئىقتىدارى توسالغۇغا ئۇچرىغان قىز ئىكەن، جىنايەت گۇماندارى بولسا دەل ئۆلگۈچىنىڭ ئۆز دادىسى ئىكەن.

     ساقچى تەرەپنىڭ تونۇشتۇرۇشىچە، بۇ يىل 1–ئاينىڭ 2–كۈنى چۈشتىن كېيىن سائەت بەشلەر ئەتراپىدا، بىر ئەر يۈنچېڭ شەھەرلىك ج خ ئىدارىدى يەنخۇ شۆبىسىگە كېلىپ ئۆزىنى مەلۇم قىلغان. بۇ ئەرنىڭ ئىقرار قىلىشىچە، ئالتە ياشلىق بىر قىز ئىشتىنىغا سىيىپ قويغاچقا، 1–چېسلا كېچىدە بۇ بالىنى بىرنى تەپكەن، شۇنىڭ بىلەن بالىنىڭ بېشى يەرگە بەك تېگىپ كېتىپ، جىددىي قۇتقۇزۇش ئۈنۈم بەرمەي قازا قىلىپ كەتكەن. ئۇ كېچىلەپ قىزىنىڭ جەسىتىنى يۇڭجى شەھىرىدىكى يۇرتىغا ئېلىپ بارغان.

     دېلو مەلۇماتىنى تاپشۇرۇپ ئالغاندىن كېيىن، ساقچىلار بۇ ئەرنى سوراققا تارتىش بىلەن تەڭ كېچىلەپ بۇ دېلونى رازۋېتكا قىلغان. بىر تۈركۈم ساقچىلار دېلو يۈز بەرگەن نەق مەيدانغا بېرىپ تەكشۈرۈپ ئىسپات ئالغان؛ يەنە بىر تۈركۈم ساقچىلار گۇماندارنىڭ يۇرتىدىكى جەسەت قويۇلغان يەرنى تەكشۈرۈپ، ئۆلۈم سەۋەبىنى تەكشۈرۈپ، دەلىل ئىسپاتلارنى مۇقىملاشتۇرغان.

    ساقچىلار تەكشۈرۈش داۋامىدا ئۆلۈپ كەتكەن قىزنىڭ بەدىنىنىڭ خېلى كۆپ يەرلىرىنىڭ كۆكىرىپ كەتكەنلىكى، كۆپىچىسىنىڭ كونا يارا ئىزى ئىكەنلىكىنى سەزگەن، بۇ ھېلىقى ئەرنىڭ بايانلىرىغا سەل ماس كەلمەيدۇ. بۇندىن باشقا، ساقچىلار زىيارەت داۋامىدا، يېقىن ئەتراپتىكى كىشىلەرنىڭ ئىنكاس قىلىشىچە، جىنايەت گۇماندارى خې فامىلىلىك دائىم بالىسىنى ئۇرۇپ دۇمبالايدىكەن.

تەپسىلىي دەلىل ئىسپات ۋە تۇغقانچىلىق مېھر مۇھەببەت ئالدىدا، جىنايەت گۇماندارى خې فامىلىلىك ئاخىرى ئۆزىنىڭ جىنايى قىلمىشىنى ئەينەن تاپشۇرۇشقا مەجبۇر بولغان. تەكشۈرۈش ئارقىلىق، جىنايەت گۇماندارىنىڭ فامىلىسى خې (ئەر، 33 ياش، شەنشى ئۆلكىسى يۇڭجى شەھىرىدىن) ئىكەنلىكى، ئۇنىڭ قىزى ئەقلى توسالغۇلۇق كېسىلى بولۇپ قالغاچقا دائىم ئاسانلا جېدەل قىلىدىغانلىقى، شۇڭا بالىسىنى كۆپ قېتىم ئۇرغانلىقى ئېنىقلانغان. 2016– يىل 1– ئاينىڭ 1– كۈنى كەچ سائەت ئونلاردا، خې فامىلىلىك كىشى يەنە بىر قېتىم قىزىنى ئۇرغان، نەتىجىدە قىزىنىڭ كانىيىدىكى يېمەكلىك يېنىپ كېتىپ، تۇنجۇقۇپ ئۆلۈپ قالغان.

ھازىر، جىنايەت گۇماندارى خې فامىلىلىك كىشى قەستەن ئادەم زەخملەندۈرۈپ ئۆلتۈرۈپ قويۇش جىنايىتى بىلەن جىنايى ئىشلار بويىچە قولغا ئېلىنغان، بۇ دېلو ھازىر تېخىمۇ ئىچكىرىلەپ تەكشۈرۈلىۋاتىدۇ.