ئاسىيا كىندىكى تورى خەۋىرى: شەھەر ئاھالىسى جاۋ يۇڭشىن 20-ئاپرېل چۈشتىن بۇرۇن سائەت 11:30 دا دۆڭكۆۋرۈكتە بازار ئايلىنىۋېتىپ، شۇ يەردىكى مەلۇم ئاپتوبۇس بېكىتىگە چاپلانغان «خەلققە قولايلىق پارچە پۇل ئالماشتۇرۇش ئورنى» دېگەن ئەسكەرتمىنى كۆردى ۋە ئارقىدىن دىققەت قىلىش ئارقىلىق مۇشۇ ئەتراپتىكى ئۈچ بېكەتكىمۇ مۇشۇنىڭغا ئوخشاش ئەسكەرتمە چاپلانغانلىقىنى بايقىدى.
ئەمەلىيەتتە، بۇنىڭدىن باشقا ئەتراپتىكى يەنە 11 بېكەتكە شۇنىڭغا ئوخشاش ئەسكەرتمە چاپلانغان ۋە 21-ئاپرېلغىچە جەمئىي 521 يۈەن پارچە پۇل ئالماشتۇرۇلغان.
مارتنىڭ ئوتتۇرىلىرىدىن باشلاپ قىزىلتاغ يولىنىڭ شىمالىدىكى 58-يول قىزىلتاغ باغچىسى بېكىتىدە ئۈرۈمچى شەھىرىدىكى تۇنجى پارچە پۇل ئالماشتۇرۇش ئورنى قۇرۇلغاندىن كېيىن، بۇ پائالىيەت ئىقتىساد - تېخنىكا تەرەققىيات رايونى (تۇدۇڭخابا رايونى) ۋېيتەي يولى ئېغىزىدىكى ئاممىۋى ئاپتوبۇس بېكىتى، مىچۈەن-كۆكتاغ رايونى ئاممىۋى ئاپتوبۇس بېكىتى، لۇيۈەن كوچىسى باشقۇرۇش كومىتېتى ميەننەن ئاھالىلار رايونىدىكى قاراۋۇلخانا، يەنە دۆڭكۆۋرۈك باشقۇرۇش كومىتېتىدىكى 14 ئاممىۋى ئاپتوبۇس بېكىتى قاتارلىق جايلاردىمۇ ئېلىپ بېرىلغان، تولۇق بولمىغان ئىستاتىستىكىغا ئاساسلانغاندا، ئۈرۈمچى شەھىرىدە پارچە پۇل ئالماشتۇرغىلى بولىدىغان ئاممىۋى ئاپتوبۇس بېكىتىدىن 19 ى بار ئىكەن.
شىنجاڭ يېزا ئىگىلىك ئۇنىۋېرسىتېتى باشقۇرۇش ئىنىستىتۇتىنىڭ دوكتورى، دوتسېنت خەن فاڭ مۇنداق دېدى: ئاممىۋى ئاپتوبۇس بېكەتلىرىدە پۇل ئالماشتۇرۇش ئورنىنىڭ بارلىققا كېلىشى كىشىگە شەھەرنىڭ ئىللىقلىقىنى ھېس قىلدۇرىدۇ، بۇ پائالىيەتكە ئالاقىدار تۈزۈملەرنى كىرگۈزۈپ، نازارەت قىلىپ ۋە يېتەكچىلىك قىلغاندا يەنىمۇ ياخشى ئۈنۈمگە ئېرىشكىلى بولىدۇ.