نېپالدىكى كۈچلۈك يەر تەۋرەشنىڭ تەسىرىدە، ئېلىمىزنىڭ شىزاڭ ئاپتونوم رايونى رېكازې شەھىرىنىڭ جىلوڭ ناھىيەسى ۋە نېلامۇ ناھىيەسى بىر قەدەر ئېغىر ئاپەتكە ئۇچرىدى، 27-ئاپرېل چۈشكىچە 20 كىشى قازا قىلدى، يوللار كەڭ كۆلەمدە بۇزۇلۇپ كەتتى، نۇرغۇن ئۆيلەر ئۆرۈلۈپ چۈشتى.
يەر تەۋرەش يۈز بەرگەندىن كېيىن، ئالاقىدار مىنىستىرلىق كومىتېتلار دۆلەتنىڭ 3-دەرىجىلىك قۇتقۇزۇش لايىھەسىنى جىددىي يولغا قويدى، شىزاڭدىكى يەرلىك پارتكوم، ھۆكۈمەتلەرمۇ ئۆز-ئۆزىنى قۇتقۇزۇشقا جىددىي تەشكىللىدى، ئازادلىق ئارمىيە، قوراللىق ساقچى قىسىم، ئوت ئۆچۈرۈش، قاتناش، داۋالاش، خەۋەرلىشىش قاتارلىق ئالاقىدار تارماقلارمۇ ئاپەت يۈز بەرگەن رايونغا دەرھال يىغىلىپ، پۈتۈن كۈچى بىلەن ئاپەتتىن قۇتقۇزدى.
دۇنيانىڭ ئۆگزىسىدە يۈز بەرگەن بۇ يەر تەۋرەش ئاپىتىگە ئۇچرىغان رايونلار دۇچ كەلگەن خىرىسقا سەل قاراشقا بولمايدۇ. چىڭخەي-شىزاڭ ئېگىزلىكىنىڭ يەر تۈزۈلۈشى مۇرەككەپ، يەر تەۋرەش كەلتۈرۈپ چىقارغان يانتۇلۇق سىيرىلىش، ئۆرۈلۈپ چۈشۈش سەۋەبىدىن قاتناش ئۈزۈلۈپ قالدى، ئۇنىڭ ئۈستىگە تاغ يولى خەتەرلىك، دېڭىز يۈزىدىن ئېگىز، مەشغۇلات قىلىش دائىرىسى تار بولغاچقا، قاتناشنى راۋانلاشتۇرۇش قىيىنچىلىقى ناھايىتى چوڭ، بۇ خەتەردىن قۇتقۇزغۇچىلار ۋە ماشىنا-ئۈسكۈنىلەرنىڭ ئاپەت يۈز بەرگەن رايونغا كىرىشىگە بىۋاسىتە تەسىر يەتكۈزدى، شۇنىڭ بىلەن بىرگە ئېغىر كېسەللەر، يارىدارلارنى يۆتكەشكىمۇ تەسىر يەتكۈزدى. ھازىرقى مۇھىم ئىش تۈرلۈك ئاماللار بىلەن قاتناشنى راۋانلاشتۇرۇش، قالدۇق يەر تەۋرەش قاتارلىق ئىككىلەمچى ئاپەتلەردىن مۇداپىئەلىنىش.
كىشىنى خۇشال قىلىدىغىنى شۇكى، ھازىر ئاپەتكە ئۇچرىغان رايوندىكى ئامما ئۈمىد ئىچىدە بىر-بىرىگە ياردەم قىلماقتا، قۇتقۇزغۇچىلار خەتەرگە قارىماستىن ھايات قالغانلارنى قۇتقۇزماقتا، ئاممىنى تارقاقلاشتۇرماقتا، ئاپەتكە ئۇچرىغانلارنى ئورۇنلاشتۇرماقتا؛ باشقا جايلاردىكى نۇرغۇن كىشىلەر ساخاۋەت يوللىرى ئارقىلىق ئىئانە توپلاپ تىلىكىنى بىلدۈرمەكتە، مېھرىبانلىققا تولغان غەمخورلۇق ئاپەتكە ئۇچرىغان رايونغا يەتكۈزۈلمەكتە، ھەرقايسى تەرەپلەردىن مۇجەسسەملەنگەن ئىجابىي كۈچ كىشىنى تەسىرلەندۈرمەكتە، شۇنداقلا كىشىلەرگە دۇنيانىڭ ئۆگزىسىدىكى ئاپەتكە تاقابىل تۇرۇش كۆرۈشىدە جەزمەن غەلىبە قىلىش ئىشەنچىسى ئاتا قىلماقتا.