تېرىنىڭ قانداق تىپلىرى ۋە ئالاھىدىلىكلىرى بار

　　 (1) نورمال تېرە (نېيترال): بۇنىڭ ئالاھىدىلىكى، ساغلام، توقۇلمىسى زىچ، تېرە ماي بېزى ۋە تەر بەزلىرىنىڭ ئاجرالمىلىرى راۋان، پارقىراق سىلىق بولىدۇ. لېكىن پەسىلنىڭ تەسىرىگە ئۇچرىشى چوڭراق بولۇپ، يازدا مايلىشىپ، قىشتا قۇرۇشۇپ تۇرىدۇ. (2) قۇرغاق تېرە (مېيى كەمچىل): تەن سالامەتلىك، ئوزۇقلىنىش ۋە تېرىنى ئاسراش قاتارلىق مەسىلىلەر تۈپەيلىدىن، تېرىنىڭ ماي ئاجرىتىپ چىقىرىشى كېمىيىپ، تېرە قۇرغاق، ماي تەركىبى ئاز بولۇپ قالىدۇ. بۇ خىل تېرىنىڭ پەسىلنىڭ تەسىرىگە ئۇچرىشى چوڭراق بولىدۇ. (3) قۇرغاق تېرە (سۈيى كەمچىل): بۇنىڭ ئالاھىدىلىكى شۇكى، تېرە توقۇلمىلىرى بوش، تۈك تۆشۈكچىلىرى ئېنىق ئەمەس، ئېپېدېرما قېلىنراق بولۇپ، سۇ تەركىبى ئاسان پارلىنالمايدۇ؛ تېرىنىڭ رەڭگى ئاق، سىلىق، لېكىن قورۇق ئاسان پەيدا بولىدۇ. بۇ خىل تېرە ناھايىتى سەزگۈر بولۇپ، مۇھىت ۋە كەيپىيات ئۆزگىرىشىنىڭ تەسىرىگە بەرداشلىق بېرەلمەيدۇ. ئاسانلا قېرىپ كېتىدۇ. (4) مايلىق تېرە: بۇنىڭ ئالاھىدىلىكى شۇكى، تۈك تۆشۈكچىلىرى ئېنىق، يوغان، تېرە ماي بەزلىرىنىڭ ئاجرالمىلىرى كۆپ بولۇپ، دانىخورەك ۋە كىچىك ھۈررەكلەر ئاسان پەيدا بولىدۇ. يۈزى، بولۇپمۇ پىشانە، قاڭشار، ئىڭەك قاتارلىق ئورۇنلار خۇددى بىر قەۋەت ماي سۈرۈپ قويغاندەك تۇرىدۇ. تېرىنىڭ رەڭگى قارامتۇلراق بولۇپ، سۇس قوڭۇر ياكى قوڭۇر، ھەتتا قىزىل مىس رەڭلىك بولىدۇ. بۇ خىل تېرىنىڭ كىسلاتا-ئىشقارلىق دەرىجىسى تەكشىسىز، تۇراقسىز بولۇپ، ئىشقارلىق ئېشىپ كەتكەندە، تېرىدە ئاسان داغ پەيدا بولىدۇ. (5) ئارىلاشما خاراكتېرلىك تېرە : بۇنىڭدا مايلىق تېرە بىلەن قۇرغاق تېرە ئارىلىشىپ كەتكەن بولىدۇ. مايلىق قىسمى پىشانە قاڭشار ۋە مەڭىزىنىڭ ئىككى تەرىپىدە T ھەرىپى شەكلىدە بولىدۇ، كۆز ئەتراپى ۋە مەڭزى قۇرغاق بولىدۇ. ستاتىستىكا قىلىنىشىچە، ئاياللارنىڭ تەخمىنەن 80 پىرسەنتىنىڭ تېرىسى ئارىلاشما خاراكتېرلىك تېرە تىپىغا كىرىدىكەن. ئومۇمەن، مەيلى سىزنىڭ تېرىڭىز قايسى خىل تېرە تىپىغا كىرسۇن، تېرىڭىزنى ئىلمىي ئۇسۇلدا ئاسرىشىڭىز كېرەك. شۇنداق قىلغاندىلا، تېرىڭىز يۇمشاق، ئاپئاق، سىلىق، پارقىراق بولۇپ ياشلىق ھاياتىي كۈچىڭىز ئۇرغۇپ تۇرىدۇ.

خەتكۈچلەر:

ئىز تورى-爱智网

تېرىنىڭ قانداق تىپلىرى ۋە ئالاھىدىلىكلىرى بار