ياز كېلىشى بىلەنلا سوغۇق ئىچىملىك بازىرى قايناپ كېتىدۇ. كولا، مېۋە شەربەتلىرى دۇكاندارلارنى خۇش قىلىدىغان ئەڭ بازارلىق مەھسۇلات بولۇپ قالىدۇ. مېنىڭچە دوستلىرىمىز يېقىندا چوقۇم ئۆزى بىر ئاز «ئورۇقلاپ» قالغان بولسىمۇ، لېكىن باھاسىدا «ئورۇقلاش» كۆرۈنمەستىن، ئەكسىچە سەل «سەمىرىش» ئەھۋالى كۆرۈلگەن داڭلىق ماركىلاردىن كوكاكولا بىلەن پېپسىي كولانى بايقىغان بولۇشى مۇمكىن. بۇ ئىككى كولا 4-ئايدىن باشلاپ ھازىرغىچە بولغان ئارىلىقتا نەچچە قېتىم باھانى ئۆرلىتىش بۇيرۇقى چىقاردى. بۇنىڭ ئىچىدە پېپسىي كولانىڭ يېقىنقى ئەڭ يېڭى باھا ئۆرلەش نىسبىتى %2 ئەتراپىدا بولدى.
بۇ يىل 5-ئايدا، كوكاكولا بىلەن پېپسى كولا ئالدى-كەينى بولۇپ، 500 مېللېلېتىرلىق مەھسۇلاتىنى بازارغا سالغانىدى. لېكىن ھازىر كۆپىنچە تاللا بازارلىرىغا قارايدىغان بولساق، تېخى بىر قانچە ئاينىڭ ئالدىدا بازاردا سېتىلىۋاتقان 600 مېللېلېتىرلىق كولالارنىڭ يوقاپ كېتىۋاتقانلىقىنى ھېس قىلىمىز. كوكاكولا 100 مېللېلېتىر «ئورۇقلىغان» بولسىمۇ، لېكىن باھاسى يەنىلا شۇ «سېمىز» ھالىتىدە تۇرۇۋەردى. يەنىلا 9.9 يۈەنگە تۆت قۇتا سېتىلدى. پېپسىي كولامۇ شۇنداق «ئورۇقلاپ» 500 مېللېلېتېرغا چۈشكەن بولسىمۇ، لېكىن باھاسى يەنىلا بىر قۇتىسى 2.8 يۈەنگە سېتىلدى. 
بىراق بۇ خىل «سېغىمى كىچىكلەپ، باھاسى قىمىرلىماسلىق» - ئىستېمالچىلارنىڭ بۇ خىل مەھسۇلاتلارنى سېتىۋېلىشىغا قىلچە تەسىر كۆرسەتمىگەندەك قىلىدۇ. مۇخبىرىمىزنىڭ بىر تاللا بازىرىدىن ئىگەللىشىچە، باھاسىدا ھېچقانداق ئۆزگۈرۈش بولمىغان بۇ كولالار يەنىلا بازارلىق ئىچىملىك ئىكەن.
مۇخبىرنىڭ ئىگەللىشىچە، پېپسى كولانىڭ 500 مېللېلېتىرلىق سېغىمدىكىسىنىڭ قايتىدىن بازارغا سېلىنىشىدىكى سەۋەب، ئىستېمالچىلارنىڭ بۇ خىل قۇتىدىكى كولانى تېخىمۇ ياقتۇرغانلىقىدا ئىكەن. بىراق مۇخبىر بۇ شىركەتتىن باھانى نېمىشقا چۈشۈرمىگەنلىكىنى سورىغاندا، ئالاقىدار خادىملار بۇ سوئالغا جاۋاب بېرىشتىن ئۆزىنى قاچۇرغان.
بەلكىم ئەستايىدىل كۆزەتمىسەك، كولالاردىكى بۇ ئۆزگۈرۈشلەرنى ھېس قىلالماسلىقىمىز مۇمكىن. بۇنى بەزىلەر ئالدانغاندەك ھېس قىلىشى، يەنە بەزىلەر مال باھاسى ئۆرلەۋاتقان پەيىتتىكى نورمال ھادىسە، دەپ قارىشى مۇمكىن. لېكىن مېنىڭچە، بۇ ئىستېمالچىلارنى ئالدىغانلىق. | 
يوللانغان ۋاقتى 2011-9-21 17:53
