ئاھ ،كوچىلار،،تونۇش كوچىلار،
ۋاللەي ئوينىشىپ،ھارغان كوچىلار.
بوغچامنى ئېسىپ،دوسلىرىم بىلەن،
تاڭدا مەكتەپكە ماڭغان كوچىلار. 
ئاھ ،كوچىلار،،گۈزەل كوچىلار،
شادىمان يايراپ كۈلگەن كوچىلار.
سالقىن شامالدا،ساپ ھاۋاسىدا،
مىسلىسىز ھوزۇر سۈرگەن كوچىلار.
ئاھ ،كوچىلار،،ئۇزۇن كوچىلار،
شېرىن خىيالغا چۆككەن كوچىلار.
ئادەم بولۇشنىڭ ھېكمەتلىرىنى،
تاللىۋال دەپ تۆككەن كوچىلار.
ئاھ ،كوچىلار،،ئايدىڭ كوچىلار،
يار بىلەن بىللە يۈرگەن كوچىلار.
گۈزەل ئارزۇنى،بۈيۈك ئىستەكنى،
دىللارغا چوڭقۇر پۈككەن كوچىلار.
ئىككى قاسناقتا زۇمرەت سۇلىرى ،
ئېرىققا پاتماي ئاققان كوچىلار.
مەن نىگارىمنىڭ ئايدەك ھۆسنىگە،
زوقلىنىپ تويماي باققان كوچىلار.
ئاھ ،كوچىلار،خۇشبۇي كوچىلار،
يارنىڭ ۋەسلىنى كۆرگەن كوچىلار.
مەجنۇنتالنىڭ شېخىن ئەگكەندەك،
ئەيمىنىپ تۇنجى سۆيگەن كوچىلار.
ئاھ ،كوچىلار،بوستان كوچىلار،
ئېسىمدە مەڭگۈ قالغان كوچىلار.
ئاسماندا چولپان،يېنىمدا جانان،
قوش يۇلتۇز بوپ يانغان كوچىلار.
ئاھ ،كوچىلار،گۈلگۈن كوچىلار،
يار بىلەن ئويناپ كۈلگەن كوچىلار.
قىزارغاندا شەرق،ھەيرانە بولۇپ،
تاڭ ئاتقان چاغنى بىلگەن كوچىلار.
ناخشا ئېيتىدۇ باغلاردا بۇلبۇل،
ئارىلاپ كېلەر كاككۇك ناۋاسى.
دۈك-دۈك سوقىدۇ ھاياجان بىلەن،
تەڭكەش قىلغاندا يۈرەك ساداسى.
ئەنە ئۆستەڭدە سۈپسۈزۈك سۇلار،
شۇ چاغدىكىدەك شىلدىرلىماقتا.
سۇۋادانلاردىن چۈشكەن يوپۇرماق،
قايناملار ئارا پىلدىرلىماقتا.
ئاشۇ قاينامدا ئاققان ياپراقتەك،
خىيال ھېسلىرىم كەتتى يىراققا.
قېنى سەن ئەمدى بەڭباش ياشلىقىم؟
شۇنچە تېز ئۇزاپ كەتتىڭ قاياققا؟...
ئاھ ،كوچىلار،گۈزەل كوچىلار،
گۈل ئۇزارىڭنى كۆرگۈم كېلىدۇ.
ھەر گۈل-چېچەكتە ياشلىق ھىدى،
شۇڭا تويماستىن سۆيگۈم كېلىدۇ.
ئاھ ،كوچىلار،تونۇش كوچىلار،
شادىمان يايراپ،ئۆسكەن كوچىلار.
نەۋ باھارىمنى،ئالتۇن دەۋرىمنى ،
بەك بالدۇر ئېلىپ كەتكەن كوچىلار.
ئاھ ،كوچىلار،ئېسىمگە سالدىڭ،
مېنىڭ نەۋقىران ياشلىق چېغىمنى.
جەڭ قىزىتىمەن تا ئاداققىچە،
قۇرۇتماي ياپ-ياش كۆڭۈل بېغىمنى . 
مەنبە:ساقلانما خاتىرەمدىن | 
يوللانغان ۋاقتى 2011-7-14 19:06
كۆپرەك يوللاپ تۇرۇڭ ھە!! 
يوللانغان ۋاقتى 2011-7-14 19:48
