بىر ئستۇدېنتنىڭ خېتى

ئىمانگۈل

                                                                                      ئانامغا خەت

                                                                                  ئەخمەت ئىمىن

   سالام ئانا ، ساق-سالامەت تۇرىۋاتقانسەن ، ئىنى - سىڭىللىرىمچۇ ؟
   مەندىن ئەھۋال سورىساڭ ، ئوبدان تۇرۇپتىمەن .  ھەرقاچان ساۋاقدىشىم مەمەتجاننىڭ ئانىسىدىن ئاڭلىدىڭ ، مېنى دوختۇرخانىدا يېتىپتۇ دىگەن خەۋەرنى ئاڭلاپ جىق ئەنسىرەپ كەتكەنسەن-ھە ؟! ئىلاھىم دىمىگەندۇ ، بالىڭىز دوختۇرخانىدا ئىكەن ، دىگەن گەپ ھەرگىز دەيدىغان گەپ ئەمەس ....
   ئاڭلىغان بولساڭ ، ساڭا چۈشەندۈرۈپ قوياي ، دەپ بۇ خەتنى يېزىۋاتىمەن ، ئانا . گېلىم ئىششىپ قاپتىكەن ، دوختۇر يېتىپ داۋالانمىساڭ بولمايدۇ ، دەپ ياتقۇزىۋالدى . چوڭ شەھەردە ئانچىكىن بىر كېسەللەرگىمۇ زىللىق قىلىپ كېتىدىكەن . چوڭ چاتاق يوق ، ئەنسىرمە . شۇ تاپتا بالامنىڭ قېشىدا بولسام ، بولماسمىدى ، دەپ ئارزۇ قىلىۋاتىسەن ، ھەرقاچان . مەندىمۇ شۇنداق ئارزۇ بار ، ئانا ، لېكىن .....
   لېكىن ئانا ، مەن سىلەرنىڭ مېنى دەپ بار ۋەسلىڭلاردىن ئايرىلىپ كېتىشىڭلارنى خالىمايمەن . ئۇنىڭسىزمۇ مېنى ئوقۇشقا يولغا سالغۇچە موزايلىق ئىنەكنى سېتىۋەتكىنىڭ ھېلىغىچە يۈرۈگۈمنى ئېچىشتۇرىدۇ . قېرىغىنىڭدا يۇمشاق-يۇمشاق گۆش پۇشۇرۇپ ئالدىڭغا قۇيالمىغىنىم ئاز كەلگەندەك ، ئىچىۋاتقان سۈتۈڭدىنمۇ ئايرىۋەتكىنىمنى ئويلىسام ، ئۆزۈمنى تولىمۇ يارامسىز ھېس قىلىمەن ...
  لېكىن ئاخىرقى ھىساپتا مېنى ياراملىق قىلىش ئۈچۈن ئوقۇتۇۋاتىسەن-ھە، ئانا ؟! مەنمۇ ھەقىقى ياراملىق ئادەم بولۇش ئۈچۈن ئوقۇۋاتىمەن . شۇغۇنىسى ، سالامەتلىگىم ۋاقتىنچە يارامسىز بولۇپ قالدى . لېكىن ئىشتا پىشقان دېھقان بالىسىنىڭ تېنى ھامان ياراملىق بولىدۇ . سەل ساقسىز بولۇپ قالغانلىقىمنى ، شەھەر يەھلەپتۇ ، دەپ چۈشەنسەڭ بولىدۇ . لېكىن شۇنى ئالاھىدە دەپ قۇياي ؛ شەھەر يەكلىگەن بىلەن شەھەرلىكلەر يەكلىمەيدىكەن . شۇ تاپتا ساۋاقداشلىرىم ، ئوقۇتقۇچىلىرىم بېشىمدا پەرۋانە بولۇپ يۈرۈيدۇ . مەن ئۇلاردىن سېنىڭ ئانىلىق مېھرىڭنىمۇ ، تۈگەپ كەتكەن رەھمەتلىك دادامنىڭ ئاتىلىق مېھرىنىمۇ ، ئىنى-سىڭىللىرىمنىڭ قېرىنداشلىق مېھرىنىمۇ چوڭقۇر ھېس قىلىۋاتىمەن . مەكتەپ دىگەننىڭمۇ خۇددى ئائىلىدەك ئىللىق ئىكەنلىگىنى دەل مۇشۇنداق چاغدا چۈشىنىدىكەنسەن ، ئانا .
    ھازىر دوختۇر تەكشۈرمەكچى . خەتنى مۇشۇ يەرگىچە يازدىم . مەندىن ئەنسىرىمە ئانا ! ئىنى-سىڭىللىرىمغا ، قۇلۇم - قوشنىلارغا مەندىن سالام .

ھۆرمەت بىلەن ؛ ئوغلۇڭ

     سالام ئانا .
   ئۇيان ئويلاپ ، بۇيان ئويلاپ بۇ خېتىمنى سالغۇم كەلمىدى .ھەر نىمە دىسەممۇ ، سەن بەرىبىر ئىشەنمەيسەن . خېتىمدىن ساڭا قالىدىغىنى پەقەت ئەندىشىلا بولىدۇ . مانا ھازىر ساقايدىم ، دوختۇرخانىدىن چىقىپ ئوقۇشۇمنى داۋاملاشتۇرىۋاتىمەن . ئوقۇشۇم ياخشى ، ئانا ، ئىش - ئوقىتىممۇ ياخشى .
   ھەيران قېلىۋاتامسەن ، مەن دوختۇرخانىدا ياتقاندا ساۋاقداشلىرىم ، ئوقۇتقۇچىلىرىم ماڭا جىق ياردەم قىلدى . تاماقتىن ، تۇرمۇش لازىمەتلىكلىرىدىن پەقەت قىسىلمىدىم . بەزىلەر ھەتتا ماڭا پۇلمۇ بەردى ، لېكىن مەن ئۇ پۇللارنى ياردەم ھىساۋىدا قۇبۇل قىلىشنى خالىمايمەن ، ئانا . داۋالىنىش ئۈچۈن ئۇ پۇللار ماڭا ئىنتايىن زۆرۆر ئىدى ، ئەمدى ئۇ پۇللارنى قايتۇرۇشۇم كېرەك ، دەپ ئويلىدىم . شۇڭا دەم ئېلىش كۈنلىرى ئىشلىدىم  . نىمە ئىشلارنى قىلغىنىمنى دەپ بېرەي ؛ ئاۋۋال مايلامچىلىق قىلدىم ، مايلامچىلىق قىزىق بولىدىكەن ، ئانا . ئۆتكەن - كەچكەنلەرنىڭ ئايىغىدىن بۆلەك نەرسە كۆرۈنمەيدىكەن . بىر يەھشەمبە كۈنى ئاشۇنداق باش تەرىپىگە قارىماي ، ئايىغىغىلا قاراپ ‹؟ ئايىغىڭىزنى مايلاپ بېرەي ›› دەپ توۋلاپتىكەنمەن ، كىمگە توۋلاپتىمەن دىمەمسەن ، دەل بىزنىڭ سىنىپ مەسئولىغا توۋلاپتىمەن .  ئۇ ؛ ‹‹ ھە ، مەردان مايلامچىلىق قىلىۋاتامسەن؟ ››دىمىگەن بولسا ، بېشىمنىمۇ كۆتۈرمەيدىكەنمەن  . مۇئەللىمنى كۆرۈپ سەل ئۇڭايسىزلاندىم . ئۇ ماڭا ؛ ‹‹ ئوغۇل بالا دىگنە مۇشۇنداق بولىدۇ . ھەقىقەتەن ئىسمىڭغا لايىق ئىش قىلىپسەن ›› دىدى . مەن بۇ گەپلەرنى ئاڭلاپ يەنە سىلەرنى ئەسلىدىم ، دادام رەھمەتلىكنى ئەسلىدىم . ئۇ دائىم ماڭا ؛ ‹‹ ھەرقانداق چاغدا مەردانە ياشا ، ئوغلۇم ، ئۆزۈڭنى خار قىلغۇچە كۈچۈڭنى خار قىل ، مەن مەردان دىگەن ئىسمىڭنى ئۆمۈر بۇيى مەردانە ياشىسۇن دەپ قويغان ›› دەيتتى ...
مەن يەنە ئاشخانىلاردا كۈتكىچىلىكمۇ قىلدىم ، ئانا . ئۈستەللەرنى پاكىز سۈرتۇپ ، خېرىدارلارنىڭ ئالدىغا تاماق قۇيىۋاتقىنىمدا نىمىلەرنى ئويلىدىم ،بىلەمسەن ؟ مەن ساڭا دەپ بېرەي ، ئانا ، ئەمدى ئۆيگە بارسام ، سېنى ھاچ ئىش قىلغۇزماي يۇمشاق كۆرپىدە ئولتۇرغۇزۇپ قۇيۇپ ، ئۆزۈم چاي دەملەپ ئەكىلىمەن ، ئىسسىق چاينى ساڭا ئۆز قۇلۇم بىلەن خونچىلاپ تۇتىمەن . مەن ئۇستا بولۇپ كەتتىم ئانا ،..
مەن يەنە دەم ئېلىش كۈنلىرىدە كىشىلەرنىڭ ئۆيلىرىگە بېرىپ تازلىق ئىشلىرىنى قىلدىم . گىلەملەرنىڭ تۇپا - چاڭلىرىنى قاققىنىمدا ، چاڭ يۈزلىرىمگە قونغىنى بىلەن كۆڭلۈمگە قونالغىنى يوق . ئاشۇ غۇبارسىز كۆڭلۈم بىلەن سىڭلىمغا شۇنداق دىگىم كېلىۋاتىدۇ   : ‹‹ سەن قۇندۇزدەك چاچلىرىڭغا ، ئايدەك چىرايىڭغا توپا قوندۇرمىغىن ، سىڭلىم ، بورا - كىگىزلىرىمىزگە تەگمە ، مەن بارغاندا ئۆز قۇلۇم بىلەن قېقىپ بېرىمەن  ›› .
  مەن كىشىلەرنىڭ دەرىزىلىرىنى سۈرتۈپ بولغىنىمدا ، كۆڭلۈممۇ خۇددى ئەينەكتەك ۋاللىدە يورۇپ كېتىدىغان بولدى . چۈنكى مەن ‹‹ مېھنەتنىڭ يۈزى يورۇق ›› دىگەن ھەقىقەتنى تېپىۋالغان ئىدىم .
  ئانا ، يۇقۇرقى گەپلىرىمنى ئاڭلاپ ، بالام پۈتۈنلەي قارا ئىش قىلىش ئۈچۈن ئوقۇۋاتقان ئوخشايدۇ ، دەپ ئويلاپ قالمىغىن ،مەن كەچلەردە ئائىلە ئوقۇتقۇچىلىقمۇ قىلىۋاتىمەن . مېنىڭ ئوقۇشۇم مەدەنىيەتلىك ئەمگەكچى بولۇش ئۈچۈن ؛ ئەگەر كەلگۈسىدە دېھقان بولساممۇ ، ئېغىر جىسمانى ئەمگەكتىن قۇتۇلغان ، يەردىنمۇ ، ئاسماندىنمۇ تەلەي كۈتىدىغان تاماخور تەغدىردىن قول ئۈزگەن ، ئۆزگىلەر قىلغاننىمۇ قىلالايدىغان ، قىلمىغاننىمۇ قىلالايدىغان ، ئۆزگىنىڭ بويرۇغىنى ئەمەس ، ئۆزىنىڭ ئىرادە قىلغىنىنى ئىشقا ئاشۇرالايدىغان ، يەرنىڭ قۇلى ئەمەس ، خۇجايىنى بولالايدىغان قابىل دېھقان بولۇش ئۈچۈن .
   مەن كىشىلەرنىڭ ئېسىل سافالىرىنى تازلاۋاتقىنىمدا ، ھامان بىر كۈنى ئاناممۇ مۇشۇنداق سافادا ئولتۇرىشى كېرەك ، دەپ ئويلايمەن . مەن كىشىلەرنىڭ ياسىداق ئۆيلىرىنى تازلاۋاتقىنىمدا ، ئىنى - سىڭىللىرىمنىڭمۇ چوقۇم مۇشۇنداق ئۆيى بولىشى كېرەك ، دەو ئويلايمەن .مەن كىشىلەرنىڭ پىكاپلىرىنى سۈرتىۋاتقىنىمدا ، چوقۇم بىر كۈنى مەنمۇ مۇشۇنداق پىكاپلىق بولىشىم كېرەك ، دەپ ئويلايمەن . مەن ئۆيلەردە ئىككى-ئۈچ باللىغا دەرس ئۆتۈۋاتقىنىمدا ، كەلگۈسىدە چوقۇم سىنىپ - سىنىپ بالىلارغا دەرس ئۆتۈشىم كېرەك ، دەپ ئويلايمەن .
  مېنىڭ ئارزۇ - ئارمانلىرىم جىق ، ئانا . مەن ئۇ ئارمانلىرىمغا پەقەت ئوقۇغىنىمدا ، ئوقۇش ئۈچۈن ئىشلىگىنىمدە ، ئوقۇش پۈتكۈزگەندە ئالدىمغا ھەرقانداق خىزمەت توغرا كەلسىمۇ قىلچە ئىككىلەنمەي ئىشلىگىنىمدىلا يېتەلەيمەن .
مەن ئاشۇنداق ئىشلەپ يۈرۈپ ، ئوقۇتقۇچىلىرىم ، ساۋاقداشلىرىم ماڭا ياردەم دەپ بەرگەن ، لېكىن مەن قەرز دەپ ئالغان پۇللارنى قايتۇرۇپ بولدۇم ، يەنە ساڭا ئېشىنىپ پۇل ئەۋەتتىم . ئوقۇش جەريانىدا ئشلەپ يۈرۈپ ئۆزۈمنىڭ ئوقۇش راسخوتلىرىمنى ئۆزۈم تۆلەيمەن ، يەنە سەن مېنى دەپ سېتىۋەتكەن موزايلىق ئىنەككە ئوخشاش ئىنەكنى چوقۇم ساڭا ئېلىپ بېرىمەن . سەن شۇ ئىنەكنىڭ سۈتىنى ئىچىپ ھۇزۇرلانغىنىڭدا ، مەن سېنىڭ ماڭا بەرگەن سۈتۈڭنىڭ بەدىلىگە يەنىلا ھېچ ئىش قىلىپ بېرەلمىدىم ، دەپ ئويلايدىغىنىمنى ھېس قىلالارسەنمۇ ، ئانا ...

شىنجاڭ ياشلىرى

HOJAKABIZ

ئانىسىغا موشۇنداق خەت يازالايدىغان سىتۇدېنتلىرىمىزدىن قانچىسى باردۇ؟بەلكىم يوقمۇ ئەمەستۇ،لېكىن ئاز، بەكمۇ ئاز! ئۇلار پۇل لازىم بولغاندا خەت يازىدۇ، ئۇنىڭغىمۇ ئېرىنىپ ئاي يېرىمدىن ئۆتە -ئۆتمەي تېلىفۇن ئۇرۇشقا باشلايدۇ،ناھايىتى يېقىملىق شىرىن-شېكەر سۆزلەر... يىغىپ ئېيىتقاندا بىر ئېغىز سۆز:  شۇ، ئازراق پۇل ئېۋەتسىڭىز.

ئىمانگۇلمۇ ياخشى بىر تېمىغا ئۇچراپتۇ. ئەجرىڭىزگە رەخمەت!

ئىمانگۈل

مەنمۇ ئانامغا خەت دىگەن بۇ تېمىنى كۆرۈپ بۇلۇپ ، دەسلىۋىدە سۆيۈندۈم ،ئىختىيارسىز كۆزۈم نەمدەلدى . كېيىن مۇشۇنداقمۇ بالىلار باردىمۇ دەپ گۇمانلىنىشقا باشلىدىم . بۇنداق ئىسىل پەزىلەتلىك بالىلىرىمىزمۇ يوق ئەمەس  بار ، بۇندىن كېيىنمۇ  چوقۇم بولىدۇ .

kiram05

خەتنىڭ مەزمۇنىدىن ناھايىتى سۆيۈندۈم،ئەمما مىنىڭ(بۇ پەقەت شەخسىي كۆز قارىشىم) كىچىككىنە بىر رازى بولمىغان يىرىم :
    ھەممىمىزگە ‹دۇنيادا كىم ئەڭ ئۇلۇغ؟›دىگەن سۇئال قويۇلسا ،ھىچقايسىمىز تەمتىرىمەستىن ‹ئانا ئۇلۇغ›دەپ قاۋاپ بىرەلەيمىز،دۇنيادىكى ئەڭ ئۇلۇغ،ئەڭ ھۆرمەتلەشكە تىگىشلىك،ئەڭ مىھرىبان،ئەڭ.....ئانىمىزنى نىمىشقا ھۆرمەت سۆزى بىلەن ‹سىز،ئۆزىڭىز،ئۆزلىرى›دەپ چاقىرالمايمىز؟!تېلىۋىزىيە تىياتىرلىرىدىكى ئاتا-ئانىسىنى،ئۆزىدىن چوڭلارنى ‹سەن›دەپ ئاتايدىغان سۆزلەرنى چىرايلىق تىلىمىزغا ئۆزلەشتۈرىۋالمىساق نىمە بولار؟؟؟؟؟
     بىز ئۆزىمىزنىڭ ئۇيغۇر ئىكەنلىكىمىزدىن،شانلىق نەتىجىلىرىمىزنىڭ بارلىقىدىن پەخىرلىنىپ،ئۇچىۋاتقىنىمىز  بىلەن نەدە،نەگە چۈشۈشنى بىلەلمەيۋاتىمىز،ئەمما ئۆزىمىزنىڭ شۇ ئېسىل نەتىجىلىرىمىزنى،جۇملىدىن شۇنچە چىرايلىق ئۇيغۇر تىلىمىزنى خۇنۇكلاشتۇرىۋاتقانلىقىمىزغا دىققەت قىلىۋاتقانلىرىمىز ساناقلىقلا،(بۇ ئىنكاسنى كۆرگەن بارلىق تور ئەھلىگە تەگسۇن)،ھازىر شىنجاڭ خەلق رادىئو ئىستانسىسى ھەر قايسى پىرۇگراممىلىرىدا شالغۇت سۆزلەيدىغانلارنىڭ ‹ئەدىپىنى بىرىپ› ،تىلىمىز ئۈچۈن بىر تۆھپە قوشۇۋاتىدۇ،ئۇلارغا ئاپىرىن.
  شۇڭا،ئۆلچەملىك سۆزلەشنى،سۆزلەرنى توغرا ئىشلىتىشنى ئادەت قىلغان بولساق.ئاتا-ئانىمىزنى‹سەن،ئۆزۈڭ›دىمەي،‹سىز،ئۆزىڭىز،ئۆزلىرى....›دىگەندەڭ چىرايلىق ھۆرمەت سۆزلىرى  بىلەن ئاتىغان بولساق،رەھمەت !