ئانام بار(غەزەل)

yadikar

ئانام بار

بەختلىكمەن كۆزۈمگە قارايدىغان ئانام بار،
مەن يىغلىسام يۈرىكى قانايدىغان ئانام بار.

رەنجىمەيمەن  بىلمىسە قەدرىمنى گەر ئۆزگىلەر،
مېنى جاندىنمۇ ئەزىز سانايدىغان ئانام بار.

مۇزلاپ كەتسەم ھاياتنىڭ جۇدۇنىدا رەھىمسىز،
ئوتۇن ئۈچۈن پۇتىنى چانايدىغان ئانام بار.

كېيىملىرىم پارقىراق يۇيۇپ بەرگەن مېھرىبان،
يىرتىقىمنى ئۇخلىماي يامايدىغان ئانام بار.

رەقىپلەرنىڭ توزىقى قەستى بىلەن يىقىلسام،
مەدەت بېرىپ بېشىمنى سىلايدىغان ئانام بار.

قالسام يارسىز يىگانە بولۇپ تەتۇر پىشانا،
يىغلاپ تۇرۇپ ھالىمنى سورايدىغان ئانام بار.

نەپرىتى ئوق كۆڭلۇمگە ئازار بەرگەن كىشىگە،
دۈشمەنلىرىم يولىنى تورايدىغان ئانام بار.

ئامرىقىمنى بەك بىلەر كۈندە بەختىمنى تىلەر،
ھەممە ئشتا كۆڭلۈمگە يارايدىغان ئانام بار.

خۇدايىمدىن تىلەيمەن دېيىشىمنى بىر كۇنى،
نەۋرىسىنىڭ چېچىنى تارايدىغان ئانام بار.
مەنبە:ئۈندىدار

زۇلھايا

راس دەيسىز. دۇنيادا ئانا مۇھەببىتىدىن ئۇلۇغ نەرسە يوق. ئانىنىڭ مۇھەببىتى ئەڭ چەكسىز. ئۇ ئۇلۇغ مۇھەببەتنى تەسۋىرلەشكە تىل ئاجىزلىق قىلىدۇ.....

سەزگۈر

يوللىغۇچىغا رەھمەت.بۇ شېئىرنى يېڭى ناۋا پىرۇگراممىسىنىڭ 10-سانىدا مارالبېشىنىڭ پىچاق سۇندى دېگەن يەردىن كەلگەن 5-نۇمۇرلۇق ماھىر ئابدۇراخمان توختى ئوقۇغان.ماڭا بەك يارىغانتى.بارلىق ئانىلارنىڭ تېنى سالامەت،ئۆمرى ئۇزۇن بولغاي!شائىرنىڭ بۇندىن كېيىنكى ئىجادىيتى نەتىجىلىك بولىشىغا تىلەكداشمەن.