يانغىن

بوز تورغايغا تەڭكەش قىلغۇم بار

مۇختار بۇغرا

يامغۇر يېغىپ پاتقاق بولدى ھەممە ياق ،
تۇلۇپ كەتتى ئېرىق ،ئازگال ، چۆنەكمۇ ...
بۇلۇت دىگەن نىمە ئانچە يىغلاڭغۇ ؟
دەيسەن ئۇنى كۆمتۈرۈلگەن چىلەكمۇ ؟

بۇ ھۆلچىلىك يېشىل ھايات ھامىيسى ،
بېرىپ تۇرار خۇشاللىقتىن دېرەكمۇ ؟
ناخشا ئېيتىپ تۇرسا تورغاي توقايدا ،
قايغۇ -غەمدە ئاھ ئۇرۇشۇم كېرەكمۇ ؟!

ئەلەم كۆرسەم سەن كۈلىسەن سەبدىشىم ،
سەنتۈرۈلۈپ يىقىلساممۇ پاتقاققا .
ئېرىشىمەن غايىۋانە قۇدرەتكە ،
بېشىم تەگسە چىلان رەڭگى تۇپراققا .

گۈزەل تۇپراق بىرەر ماڭا گۈزەل غەم ،
بەرگىنىدەك سۈبھى شەبنەم ياپراققا .
كۆككە باقسام گۈلدۈرماما ئۈندەيدۇ ،
ئاۋاز قۇيۇپ بېرىپ ناخشا ئېيتماققا .

دەرەخ ،دەرەخ شىلدىرلاتما شېغىڭنى ،
ناخشا توۋلاپ چىقىپ كەتسۇن ھاردۇقۇم .
تارتىپ كىتەي پىغانلارنى ئۈزەملا ،
قالمىسىلا رازى ئىدىم سەندە غۇم  .

بوز تورغايغا ناخشا تەڭكەش قىلغۇم بار ،
لېكىن ، سەندىن يوقتۇر ئەسلا ئۆچ ئالغۇم .
ناخشا توۋلاپ چىقىپ ئالسام پۇخادىن ،
باردۇر مېنىڭ تىنچ مۇھىتتا تىنچ قالغۇم .

مېنىڭ ناخشام خۇشاللىقنىڭ ئەلچىسى ،
قۇچاق ئاچار كۈلپەت تارتقان ئادەمگە .
پاتقاق يولغا پۇتۇم كۈنۈپ قالدىمۇ ،
ماسلاشمايدۇ ھېچبىر ئومۇم قەدەمگە .

تۈز يول ، ئاتاق ، سەھنە ...ماڭا نە كىرەك ،
توۋلاپ باراي ناخشامنى ئۆز پەدەمگە ...