بىلىم-كۈچ بلوگى

版权声明：转载时请以超链接形式标明文章原始出处和作者信息及本声明
logs/189118655.html

ئەسسالامۇ ئەلەيكۇم، بۇرادەر، كەم دىدار بولۇپ كەتتىڭغۇ؟

-ۋەئەلەيكۇم ئەسسالام، خىزمەتچىلىك، بۇرادەر. ئەرزخورلار ئارام بەرمەي، بېشىمىزنىڭ ئىچىمۇ-تېشىمۇ قېتىپ كەتتى.

-سىلەرنىڭ ئىدارە ئەرزىيەت ئىدارىسى تۇرۇپ بېشىڭلار قاتسا، ئەرزخورلارنىڭ ئەرزىنى كىم سورايدۇ؟

-بۇرادەر، سەن بىلمەيسەن، ئەرزىنى سورايمىز دەپ نەچچە ئون قېتىم دېدۇق، لېكىن، ئەرزخورلار يەنىلا ئۈرۈمچى، بېيجىڭغا بېرىۋېلىپ، بىزنى ئوسال قىلىۋاتىدۇ.

-ئەمىسە، مەن ساڭا ئەرزخورلارنى ئەدەپلەشنىڭ بىرنەچچە ئۈنۈملۈك تەدبىرىنى دەپ بېرەي، سىناپ باققىن.

-قۇلىقىم سەندە، ئاداش.

-بىرىنچى تەدبىر، تەشۋىقات جېڭىگە كۈچەڭلار، لوزۇنكا-پلاكاتلارنى ھەممە يەرگە ئېسىڭلار، لوزۇنكىغا «ئەرزخورلۇق قانۇنسىزلىق، ھاكىم بىلەن قارشىلاشقانلىق، كىمكى قانۇن بىلەن ئويناشسا، دىكتاتۇرانىڭ تەمىنى تېتىيدۇ» دەپ يېزىڭلار.

-يەنە «قانۇنسىز ئەرز قىلغانلارغا تۇنجى قېتىم تەنبىھ بېرىلىدۇ، ئىككىنچى رەت سولاپ قويىلىدۇ، ئۈچىنچى مەرتەم قاماققا ئېلىنىدۇ» دەپ يازساق، چوقۇم يۈرىكى پوكۇلدايدۇ.

-ئىككىنچى تەدبىر، ئىزىغا چۈشۈپ نازارەت قىلىڭلار، نەگە بارسا، ئايرىلىپ قالماي، بىرگە بېرىڭلار.

-ئۈچىنچى تەدبىر، ئەرزخورلارنى سېسىتىڭلار، تاراتقۇلاردىن پايدىلىنىپ، ئۇلارنى ھورۇن، چاتاقچى، تەييارتاپ دەپ چاۋىسىنى چىتقا يېيىڭلار.

-بەزىلىرىنى مېڭىسىنىڭ دەردى بار، ئېلىشىپ قالغان، دېسەكمۇ بولغىدەك.

-تۆتىنچى تەدبىر، ئەرز قىلماسلىق كاپالەت پۇلى ئېلىش يولى بىلەن ئىقتىسادىي جازا يۈرگۈزۈڭلار.

-بۇ تەدبىرنى كەنت ئەھدىنامىسىگە كىرگۈزۈپ، كەنتنىڭ قولى بىلەن قىلساق بولىدىكەن.

-بەشىنچى تەدبىر، يولدا توسۇپ، ناھىيە، ھېچ بولمىغاندا ۋىلايەت چېگرىسىدىن چىقارماڭلار.

-توغرا، ئايرودروم، پويىز ئىستانسىلىرىدا مەخسۇس ئادەم قويساق بولىدۇ.

- ئالتىنچى تەدبىر، ئۈرۈمچى، بېيجىڭدىكى مەلۇم شىركەتلەر بىلەن توختام تۈزۈپ، ئەرزخور پويىزدىن چۈشكەندە مەخسۇس ئادەم ئالدىغا چىقسۇن.

-ئېلىپ كېلىپ بىزگە تاپشۇرۇپ بەرسە، ئادەم سانىغا قاراپ ھەق بەرسەك بولىدۇ.

-يەتتىنچى تەدبىر، روھىي كېسەللەر دوختۇرخانىسىغا ئېلىپ بېرىپ داۋالىتىڭلار.

-سەككىزىنچى تەدبىر، قەلەمنىمۇ، ئەلەمنىمۇ ئىشقا سېلىڭلار، گەپ يېمىگەنلەر ئانچە-مۇنچە دۇمبا يېسىمۇ بولىدۇ.

-توققۇزىنچى تەدبىر، تاياق يەپمۇ ئەرزنى توختاتمىسا، جامائەت تەرتىپىنى قالايمىقان قىلىش جىنايىتى بىلەن تۈرمىگە تاشلاڭلار.

-ئونىنچى تەدبىر، رادىيو-تېلېۋىزوردا ياكى بازارلاردا سازايى قىلىڭلار.

-بۇ چارە بولىدىكەن، ئوغرى-قىمارۋاز، پاھىشىۋازلار قاتارىدا سازايى قىلىپ پەندىيات دېگۈزىۋېتىمىز. ناھىيىمىزنىڭ «ئەرزخوردىن خالىي ناھىيە» بولىشىغا گەپ كەتمەيدىغان بولدى، يۈرە ئاداش، رېستوراندا تازا بىر مېھمان قىلاي سېنى.
(ئابلاجان تۇردى)