كاتالونىيە ئاپتونوم رايونى ۋە كاتالانلار

Barcelona

	كاتالانلار ئىسپانىيەنىڭ شەرقىي شىمالىغا جايلاشقان كاتالونىيە ئاپتونوم رايونىنىڭ ئەسلى ئاھالىسى بولۇپ ، دۇنياغا داڭلىق بارسېلونا شەھىرى رايون مەركىزى ھېساپلىنىدۇ. كاتالونىيەنىڭ يەر كۆلىمى  ئىسپانىيەنىڭ ئالتە پىرسەنتىنى ، ئاھالىسى يەتتە يېرىم مىليون بولۇپ ، ئىسپانىيە ئاھالىسىنىڭ %17 نى تەشكىل قىلىدۇ . 1979-يىلىدىن بېرى ئاپتونوم رايون بولۇپ بېكىتىلگەن . ئىسپانىيەدە يەنە باسك دۆلىتى ۋە گالىس رايونى كاتالونىيە بىلەن تەڭ ئورۇندىكى ئاپتونوم رايونلار ھېساپلىنىدۇ.          ئىسپانىيە ئاساسىي قانۇنىدا بەلگىلەنگەن ئاپتونومىيە قانۇنىغا ئاساسەن، كاتالونىيەنىڭ ئۆز ئالدىغا دۆلەت گىربى ، دۆلەت بايرىقى ۋە مارشى بولۇپ ، بىرىنچى رەسمىي  تىل ئىسپانچە ئەمەس بەلكى كاتالونچە . رايون قانۇنىنى ئۆز ئالدىغا بەلگىلەش ۋە ئىجرا قىلىش ، ئۆز ئالدىغا سايلام ئېلىپ بېرىش ، ئۆز ئالدىغا پارلامېنت ۋە سىياسىي  كېڭەش تەشكىللەش ۋە تارقىتىش ، باج بېكىتىش ۋە باج يىغىش ھوقۇقىغا ئىگە. مەكتەپلەر پۈتۈنلەي كاتالان تىلىدا بولۇپ ، ئىسپانچە پەقەت ھەپتىدە ئىككى سائەتلا ئۆتۈلىدۇ. ھەتتا ئالىي  مەكتەپلەردىمۇ دەرسلەر پۈتۈنلەي كاتالانچە بولۇپ ، ئىسپانچە دەرسلەرنى تاللاشقا بولىدۇ ئەمما مەجبۇرى تېڭىلمايدۇ . بارلىق رەسمىي ۋە غەيرى رەسمىي ھۆججەتلەر ، كوچا-كويلاردىكى ئېلان-ۋىۋىسكىلارنىڭ ھەممىسى كاتالانچە بولۇپ ، ئەگەر باشقا يېزىقتا بولۇپمۇ ئىسپانچە يېزىلىپ ، كاتالانچىسى بولمىسا ، قانۇن بويىچە ئېغىر جەرىمانە قويۇلىدۇ.          مۇشۇنداق ئەركىن بىر تىل-يېزىق رايونىدا ، كىشىلەر يەنە ئۆز ئالدىغا ئىسپانچە ئۆگىنىدىغان بولۇپ ، 2006-يىلىدىكى ئىستاتىسكىلاردىن قارىغاندا ، كاتالانلارنىڭ يېرىمى دېگۈدەك ئىسپانچىنى كاتالانچىدىن ياخشى بىلىدىغانلىقىنى جاكارلىغان. لېكىن بارسېلوناغا بارغاندا ، پەقەت ئىسپانچە بىلىش ھەرگىز يېتەرلىك ئەمەس . ھەممىمىزگە مەلۇم بولغاندەك ، بارسېلونا دۇنيادىكى ئەڭ گۈزەل شەھەرلەردىن بىرى ۋە بۇ شەھەرگە ئوقۇشقا بارىدىغان چەت ئەللىك ئوقۇغۇچىلارمۇ ئىنتايىن كۆپ . نۇرغۇن ئوقۇغۇچىلار ئىسپان تىلى ئۈگىنىپ ، بارسېلونا ئۇنىۋېرسىتېتلىرىنى تاللىغاندىن كېيىن ، نەق مەيدانغا بارغاندا ، ئۆگەنگەن ئىسپانچىسىنىڭ ھېچبىر رولى يوقلۇقىدىن قاقشايدىكەن. چۈنكى دەرسلەرنىڭ ھەممىسى ئاساسەن كاتالونچە ، سرتتا ھايات كاتالونچە . گەرچە كىشىلەر ئىسپانچە بىلسىمۇ ، ئەمما كاتالونچە سۆزلىمەسلىك ئىنتايىن ئېغىر ئېلىنىدىغان ئىش ھېساپلىنىدىكەن .          كاتالونىيەنىڭ ئىقتىسادى ئىسپانىيەدىكى ئوخشىمىغان رايونلار ئىچىدە ئالدىنقى ئورۇندا تۇرىدۇ . بولۇپمۇ بۇ رايون ئىسپانىيەنىڭ بىرىنچى ساياھەت رايونى بولۇپ ، ئىسپانىيە ئىقتىسادىدا مۇھىم ئورۇن تۇتىدۇ  . بارسېلونا پاي-چەك شىركىتى ئىسپانىيەدە مادرىد پاي-چېكىدىن قالسىلا ئىككىنچى ئورۇندا تۇرىدۇ . پۇتبول كۇلۇبى بارسېلونانى بىلمەيدىغان كىشى بولمىسا كېرەك . دۇنيادىكى ئالدىنقى قاتاردىكى پۇتبول كوماندىسى بولغان بارسېلونا ھەر قېتىملىق دۇنياۋى مۇسابىقىلەردە توپ كىرگۈزگەندە كاتالونىيە بايرىقىنى لەپىلدىتىدۇ . 2010-يىلى ئىسپانىيە دۇنيا لوڭقىسىنى ئالغىنىدا ، دۆلەت كوماندىسىدىكى كاتالانلار دەرھال ئىسپانىيە بايرىقىنى ئەمەس بەلكى كاتالونىيە بايرىقىنى پۈتۈن دۇنيا ئاخباراتلىرىنىڭ كۆزىدە لەپىلدەتكەن ئىدى.                               ( مەنبە : خەۋەرلەر تورى )

	بۇنىڭدىن سىز ئۈمۈد كۈتمەڭ؟؟؟....

Barcelona

	پۇتبول غەلىبىسىدىكى تەنتەنە  بۇلارنىڭ بىرىنچى خوشاللىقىدۇر .

uyghun

	مەن ئاڭلىمىغان خەۋەركەن،  تېما ئىگىسىگە رەھمەت.

Tesewwur

	ئۇلارنىڭ ئاپتونومىيە ھوقۇقى بىلەن بىزنىڭ ئاپتونومىيە ھوقۇقىمىز ئوتۇرىسىدا پەرق خېلى چوڭكەن.

ronaK0000000

	مەن بۇ تىمىڭىزنى ئوقوپ بارىسلۇنادا  ئۈتكۇزۇلگەن شۇ قىتىملىق پوت پول مۇسابىقسىنى ھەم گۇزەل بارىسلۇنا شەھرىنى ئەسلەپ قالدىم . خوشاللىق كىشگە  بەخىت ھەم ئۈمۇر ئاتا قىلغاي.