‹‹كۈلپەتلىك تەقدىر›› رومانى نەشردىن چىقتى

ئەقىدە

	ئىختىيارىي مۇخبىرىمىز ئابلىكىم مۇھەممەد خەۋىرى: گۇما ناھىيەلىك ج خ ئىدارىسىنىڭ پىنسىيونېرى، پېشقەدەم يازغۇچى ئابدۇقادىر سادىرنىڭ  ‹‹كۈلپەتلىك تەقدىر›› ناملىق  رومانى يېقىندا نەشىردىن چىقىپ تارقىتىلدى.    بۇ رومان يېزا ئوقۇتقۇچىلىرى تۇرمۇشىغا بېغىشلانغان بولۇپ، روماندا گۈلىستان ۋە رۇستەمدىن ئىبارەت بىرجۈپ ياشنىڭ 20 يىلغا سوزۇلغان ھىجرانلىق مۇھەببەت كەچمىشى تەسۋىرلىنىدۇ. ئەسەرگە ئالدىنقى ئەسىرنىڭ 50-، 60-يىللىرىدىكى ئىجتىمائىي دەۋر ئارقا كۆرۈنۈش قىلىنغان. ئەسەر ۋەقەلىكى ۋە ئەسەر پېرسوناژلىرىنىڭ پائاليىتى ئەنە شۇ دەۋر روھىنى ۋە شۇ دەۋردىكى ئىجتىمائىي تۇرمۇشنى ئەكىس ئەتتۈرىدۇ. شۇنداقلا، كىشىلىك تۇرمۇشتىكى چىن ئىنسانىي پەزىلەت، مۇھەببەت، خىزمەت ۋە كىشىلىك مۇناسىۋەتلەردىكى چىن مۇھەببەت، چىن دوستلۇق، سەمىمىيەت ۋە ۋاپادارلىق بىلەن سەمىمىيەتسىزلىك، ساختىلىق، قارا نىيەتلىك، سۈيقەست ۋە ھىيلە- مىكىر ئوتتۇرىسىدىكى كۈرەش جەريانلىرى ئارقىلىق، پاك مۇھەببەت، ئاق كۆڭۈللۈك، ۋاپادارلىققا مەدھىيە ئوقۇلىدۇ. قارانىيەت سۈيىقەستچىلەر قاتتىق ھەجۋى ئاستىغا ئېلىنىدۇ. ئەسەر ۋەقەلىكى ئەگرى- توقاي، مۇرەككەپ زىدىيەت توقۇنۇشلىرى ئىچىدە راۋاجلاندۇرۇلۇپ، كىتابخاننىڭ قەلبىدە پاك ئىنسانىي قەلبكە ئىگە بولغان ئىجابىي پېرسوناژلارغا نىسىبەتەن چوڭقۇر مۇھەببەت، خەيرىخاھلىق تۇيغۇسىنى ئويغاتسا، سەمىمىيەت ۋە پاكلىق دۈشمەنلىرىگە نىسىبەتەن غەزەپ- نەپرەت تۇيغۇسىنى قوزغىتىدۇ.    شۇنىڭ بىلەن بىرگە، ئەينى چاغدىكى ئىقتىسادىي ۋە مەنىۋىيەت جەھەتتە ئارقىدا تۇرىۋاتقان جەمئىيتىمىزنى كامال تاپقۇزۇش، مىللىي مائارىپ تەرەققىياتى ئۈچۈن يۈرەك قېنىنى تۆكۈۋاتقان ئەمما، چېكىدىن ئاشقان «سولچىل» قىزىپ كېتىش خاھىشىنىڭ قۇربانىغا ئايلىنىپ كەتكەن زىيالىيلار، ئىلىم مەرىپەت ئەھلىلىرىنىڭ رىيازەت ئالىمىدە سەرسان- سەرگەردان بولغان كەچمىش- كەچۈرمىشلىرى ئارقىلىق، ئەينى ۋاقىتتىكى جەنۇبىي شىنجاڭ جەمئىيتىنىڭ رېئال ئەھۋالى، خەلق تۇرمۇشى ۋە زىيالىيلار قاتلىمىنىڭ ئومۇمىي ئەھۋالى يورۇتۇپ بېرىلىدۇ.    رۇستەم، قۇربان مۇئەللىم، گۈلىستان، شاكىرجان، نەبى، ئابدۇغېنى، ياقۇپ... قاتارلىق بىر تۈركۈم ئىجابىي، سەلبىي پېرسوناژلارنىڭ جەمئىيەتتە، تۇرمۇش ۋە ئىجتىمائىي رېئاللىقتا تۇتقان ئورنى، دەۋر ئالدىدىكى سالاھىيىتى، ئەخلاق- پەزىلەت، مۇھەببەت ۋە ۋاپا تەرەپلىرىدىكى بىر بىرىگە گىرەلىشىپ كەتكەن ئۆتكۈر، مۇرەككەپ زىددىيەتلىرى جەريانى ئارقىلىق، ۋەتەنپەرۋەرلىك، ئىنسانىي ئەخلاقى- پەزىلەت، پاك مۇھەببەت ۋە ۋاپادارلىق روھىغا مەدھىيە ئوقۇلىدۇ. ئىلىم-مەرىپەتكە، مىللىي مائارىپ تارىخىغا پۇتلىكاشاڭ بولغۇچى جاھالەت جارچىلىرى، ئىنسانىي ئەخلاق-پەزىلەت، ئادەمگەرچىلىك ۋە پاك سۆيگۈ- مۇھەببەتنى دەپسەندە قىلغۇچى بەدئەھلىلەر قاتتىق پاش قىلىنىدۇ.

	قەلبىم تۆرىدىكى مۆھتىرەم ئۇستاز،  يازغۇچى ئابدۇقادىر سادىر ئاكىغا مۇبارەك بولسۇن!

baburzada

	ئۇستاز ئابدۇقادىر سادىر ئاكىغا مۇبارەك بولسۇن!    تېمىڭىزغا رەھمەت.

	‹‹كۈلپەتلىك تەقدىر›› رومانىنىڭ نەشىر قىلىغانلىقىنى تەبرىكلەيمەن.

mungdax

	پېشقەدەم يازغۇچى ئابدۇقادىر سادىرنىڭ ئاكىنىڭ ‹‹كۈلپەتلىك تەقدىر›› ناملىق  رومانىغا مۇبارەك بولسۇن؟ بۇ مۇناسىۋەت بىلەن ئابدۇقادىر سادىر ئاكىنىڭ تېنىگە سالامەتلىك، بارلىق ئىشلىرىغا ئاسايىشلىق تېلەيمەن.

haltakoqa

	دەرھال سېتىۋالاي بۇ روماننى

ELTUGH

	بۇ ئابدۇقادىركامنىڭ ‹‹قارا چېقىن››، ‹‹قاقشال توغراق››، ‹‹پۈتۈكسىز ئارخىپ›› دېگەن كىتابلىرىدىن كېيىن چىققان 4-كىتابى، شۇنداقلا تۇنجى رومانىمىكىن دەيمەن.

intil

	مۇبارەك بولسۇن، بىز خۇش بولدۇق.

sarsanroh

	مەنمۇ بىر ئۇقۇپ باقمىسام

bargiya

	يەنە بىر قېتىم مۇبارەكلەيمەن... بۇنىڭدىن كېيىنكى قەلىمىگە ئۇتۇقلار يار بولسۇن!!

tursunjan5110

	مۇبارەك بولسۇن! ئابدۇقادىركامنىڭ بۇ رومانى ئاخىرى نەشىردىن چىقتى.

kurban

	‹‹كۈلپەتلىك تەقدىر›› رومانىنىڭ نەشىر قىلىغانلىقىنى تەبرىكلەيمەن. ئوقۇيدىغان كىتاپتىن يەنە بىرسى نەشىر قىلىنىپتۇ، بۇ بىر خوشاللىق ئىش.

atilla

	مۇبارەك بولسۇن

بۈركۈت

	ئابدۇقادىر سادىر ئەپەندىنىڭ تېنى سالامەت، ئىجادىيىتى ئۇتۇقلۇق بولغاي!