-دادا! بۇ نىمە گەپلەر؟ مەن رامىلاگە ئىشىنىمەن! -ئۇنىڭغا ئىشىنىپ ماڭا ئىشەنمىسەڭ ئۆزۈڭ بېرىپ ئەكرەم تاتۇقتىن سوراپ باق! داداڭ يەنە نىمىلەرنى دىدى بىلمىدىم، بېشىم قېيىپ يىقىلىپ چۈشەيلا دەپ قالدىم. پۇت-قووللىرىم بۇ ئەلەمدىن كەچكۈزدىكى ياپراقتەك تىترەيتى.تىللىرىمگە گەپ كەلمەيتى.كۆزلىرىمدىن توختىماي تۆكۈلىۋاتقان ياشلىرىم كۆينىكىمنىڭ ئالدىنى ھۆل قىلىۋەتكەن ئىدى. سورۇندىكى ھەممەيلەن بىردە داداڭغا بىردە ماڭا ھەيرانلىق بىلەن قارايتى.سەن سۇئال نەزىرىدە ماڭا قارىدىڭ! كۆزلىرىڭدىن مىڭلارچە سوئال ياغاتتى.بۇ قارىشىڭدىن نە مۇھەببەت، نە نەپرەتنى بىلگىلى بولمايتى...سېنىڭ شۈبھىي بىلەن قارىغان شۇ قارىشىڭ ھازىرغۇچە كۆز ئالدىمدا ئېرپان! مەن ئۆيدىن قانداق چىقىپ كەتكىنىمنى بىلمەيمەن. پەقەت چىقىپ كېتىش ئالدىدا زور غەيرەت بىلەن داداڭغا قاراپ تۇرۇپ‹‹مەن ئۇنداق شاللاق قىز ئەمەس، بۇنى ئېرپان بىلىدۇ،ئاللاھ بىلىدۇ!››دەپ يىغلاپ تۇرۇپ نىدا قىلغىنىم ئىسىمدە... شۇ كېچە مەندىن ئەنسىرەپ كەينىمدىن يېتىپ كەلگەن پەرھات، نىگارە ۋە گۈلگىنەلەرگە يىغلاپ تۇرۇپ ھەممە ئىشنىڭ جەريانىنى سۆزلەپ بەردىم.ئۇلارمۇ مەن بىلەن تەڭ كۆز يېشى قىلدى.تەسەللى بەردى. پەرھات ئەكرەم تاتۇقنى ئىزدەپ بېرىپ ھىساپ ئالىمەن دەپ مېڭىۋىدى ئۇنىڭ ئاچچىقىدا ئىشنى تېخىمۇ چوڭايتىۋېتىشىدىن ئەنسىرەپ ئۇنى ئەكرەمنى ئىزدىسىمۇ كۈندۈزى ئىزدىشىنى ئۆتۈنۈپ تۇتۇۋالدۇق... بىر كېچە-شۇنداق كۆڭۈلسىز ئازاپ،پىغانلىق يىغا ۋە تەسەللى بېرىشلەر ئىچىدە ئۆتتى.پەرھات ماڭا‹‹ بۇ ئىشنىڭ ئارقىسىدا ئويۇن باردەك قىلىدۇ، ھامىنى ھەممە ئىش ئايدىڭ بولىدۇ. ئېرپان ساڭا ئىشنىدۇ.ھازىرچە بۇنچە ئازاپلىنىپمۇ كەتمە ھېلىغۇچە ئېرپانمۇ چوقۇم سەندىن ئەنسىرەپ كېلىدۇ››دەپ تەسەللى بەرگەن ئىدى،لېكىن سەن كەلمىدىڭ. ھەتتا ئەتىسى سەن دائىم ئىشقا بېرىش يولىدا مېنى ساقلايدىغان كونا جايدىمۇ سېنى ئۇچراتمىدىم... مېنى ئىدارە ئالدىغا ئەكىلىپ قويۇپ قايماقچى بولغان نىگارەلەر بىلەن خوشلىشىۋاتقىنىمدا سەن يېتىپ كەلدىڭ.سەن پەرھات بىلەن سوغۇقلا قول ئېلىشىپ كۆرۈشكەندىن كېيىن ماڭا قاراپمۇ قويماستىن دەرۋازا ئىچىگە كىرىپ كەتتىڭ. شۇ نەچچە كۈنگۈچە سېنىڭ ماڭا قارىماي يۈرۈشلىرىڭگە چىداپ بولالماي ئەقلىمدىن ئادىشايلا دىدىم. -ئېرپان! مەن كەينىڭدىن يۈگرەپ زالغا كىرگەندە سەن پەلەمپەيگە قەدەم ئالغان ئىدىڭ.-نىمىشقا مېنىڭ گېپىمنى ئاڭلاپ باقمايسىز؟ بىزنىڭ ئىشىمىز مۇشۇنىڭ بىلەن تۈگىدىمۇ؟ماڭا ئىشىنىڭ بولامدۇ؟ مەن سىزگە بۇ ئىشلارنى تەپسىلى چۈشەندۈرەي؟! -سېنىڭ بۇنچىۋالا نومۇسسىز ئىكەنلىكىڭنى ئويلىماپتىكەنمەن! شۇنداق،ئىككىمىزنىڭ ئىشى تۈگىدى! سېنى كۆرەر كۆزۈم يوق! -ياق ئېرپان!مەندە گۇناھ يوق! مىنىڭ گېپىمنى بىر ئاڭلاپ بېقىڭ؟! -بولدى! سېنىڭ گېپىڭنى ئاڭلىغۇممۇ،چىرايىڭنى كۆرگۈممۇ يوق! -ئېرپان!!! سەن كەينىڭگە بۇرۇلدۇڭ: -بەزى ئىشلارنى تىلغا ئالغۇم، يۈزۈڭگە سالغۇممۇ يوق ئىدى. مىنى مەجبۇرلاۋاتىسەن.سەن ماڭا يەنە نىمىنى چۈشەندۈرمەكچى؟ ئەكرەم بىلەن يۈرگىنىڭنىمۇ؟ئۇنىڭدىن قوساق كۆتۈرۈپ ئالدۇرۋەتكىنىڭنىمۇ؟ -نىمە؟ نىمە دەۋاتىسىز ئېرپان؟ كىم شۇنداق دەيدۇ؟!!! يالغان! ھەممىسى يالغان! -ئۆمۈرلۈككە ۋەدىلەشكەن لايىقىڭ ئەكرەم ئۆز ئاغزى بىلەن دىدى.ساڭا بۇنىڭدىن باشقىمۇ ئىسپات كېرەكمۇ؟ -ياق ئېرپان!ئۇنىڭ گېپىگە ئىشەنمەڭ!ھازىرلا ئۇنىڭ قېشىغا بارايلى،ئۇ مەن بار يەردە دەپ باقسۇن. -ئاتا-ئانامنىڭ، دوستلىرىمنىڭ ئالدىدا سەتلەشكىنىم،ئۇ بىرنىمىنى ئىزدەپ بېرىپ دەككەمنى يىگىنىم ئاز كەلگەندەك بۇ سەتچىلىكىڭنى پۈتۈن ئەل-جامائەت ئالدىدا داۋراڭ سېلىپ، تېخىمۇ بەكرەك ياياي دەمسەن؟ -ئېرپان بۇنداق قىلماڭ! ماڭا ئىشىنىڭ!،يىغلاپ نالە قىلىشىمغا پەرۋامۇ قىلماي كېتىۋاتقىنىڭدىن ئالەمچە ئۈمۈتسىزلەنگەن بولساممۇ كاللامغا تۇيۇقسىزلا كەلگەن، ئۆزۈمنى ئاقلىيالايدىغان بىردىنبىر ئىشنى ئويلىغىنىمدا قىزلىق غورورۇمنى بىر چەتكە قايرىپ قويۇپ ئارقاڭدىن يۈگرەپ بېرىپ قوللىرىڭغا ئېسىلىۋالدىم: -مەيلى ئەكرەم تاتۇق سىزگە نىمە دېگەن بولسۇن،دادىڭىز نىمە ئاڭلىغان ۋە نىمە دېگەن بولسۇن. ماڭا ئىشەنمىسىڭىز ھازىرلا دوختۇرخانىغا بېرىپ تەكشۈرتەيلى مەن تېخى قىز...كۆز ياشلىرىم سەلدەك ئاقتى. سەن كەينىڭگە بۇرۇلۇپ ماڭا شۇنداق نەپرەت كۆزۈڭ بىلەن قارىدىڭكى بۇ قاراشلىرىڭدىن چۆچۈپ كەتتىم. -كۆتۈر بۇنداق گەپلىرىڭنى!ماڭا دېمىگەن مۇشۇ يالغان گېپىڭلا قالغانمۇ؟ ساڭا ئىشىنىپ، سېنى چوڭ كۆرۈپ تولىمۇ خاتالاشقان ئىكەنمەن. ئەمدى بۇ ئويۇننى ئويناپ مىنى يەنە خاتالاشتۇراي دەمسەن؟سېنى ياخشى كۆرۈپ شۇنچە دۆتلۇك قىپتىكەنمەن.بۇرۇن بەزى ئەخلاقسىز قىزلارنىڭ ئويۇنىنى ئويناپ بولۇپ پۇل خەجلەپلا ساختا قىزلىق سالدۇرۇپ،ئەرلەرنى ئالداپ قاپقىنىغا دەسسەتكىنىنى ئاڭلىغان بولساممۇ بۇ ئىشنىڭ مىنىڭ بېشىمغا كىلىشىنى، يەنە كىلىپ مەن ئىشەنگەن، مەن سۆيگەن قىزنىڭ ئاغزىدىن چىقىشىنى ئويلاپمۇ باقماپتىكەنمەن!سېنىڭ ئاشۇ كوچىدا ئەخلاقسىز قىزلاردىن پەرقىڭ بارمۇ؟ خوش! سەن كەتتىڭ،مەن يۇم-يۇم ياشلىرىمنى تۆكۈپ تۇرغان جايىمدا تىزلىنىپ ئولتۇرۇپلا قالدىم. ئىنساننىڭ بېشىغا مۇشۇنچىۋالامۇ دەرت-ئاھانەت كىلەرمۇ؟قىز بولغىنىم ئۈچۈن تۆھمەت ۋە سۈيىقەستنىڭ ئالقىنىدا شۇنچە يانجىلىمەنمۇ؟ مەن قانداق قىلىمەن؟ قانداق قىلغاندا سېنىڭ ئىشەنچىڭگە مۇھەببىتىڭگە قايتا ئېرىشەلەيمەن ئېرپان؟ | 
[ئۇلانما كۆچۈرۈش]
يوللىغان ۋاقتى 2013-8-4 03:36:41