ئاپامنىڭ شۇنچە تۇتۇۋېلىشلىرىغىمۇ قارىماي، يۈزۈمنى يۇيۇپلا ناشتىمۇ قىلماي ئىشقا ماڭدىم.سەن مېنى كوچا دوقمۇشىدا ساقلاپ تۇرغان ئىكەنسەن.مېنى كۆرۈپ ھەيرانلىق بىلەن: -بىرەر يېرىڭ ئاغرىۋاتامدۇ رامىلە؟ نىمە بولدۇڭ؟چىرايىڭ بۈگۈن ئەجەپ باشقىچىلىغۇ؟دەپ ئالدىمغا تېز-تېز قەدەملەر بىلەن كىلىپ قوللىرىمنى تۇتتۇڭ.مەن: -ياقەي شۇ سەن قايتىپ كەلگەندىكىن خۇشاللىقىمدا ياخشى ئۇخلىيالمىدىم.دەپ قىسقىلا جاۋاپ بەردىم. ئۇ كۈنى نېمىلەر توغرىلىق پاراڭلاشتۇقكىن تاڭ،كاللامغا سېنىڭ گەپلىرىڭ پەقەتلا چۈشمەيتى.مەن پەقەت ساڭا دېمەكچى بولغان گېپىمنىڭ تۇنجى جۈملىسىنى نەدىن باشلاشنىلا ئويلىشاتتىم.داداڭنىڭ ئۇ ئىشلارنى ساڭا دېگەن-دېمىگەنلىكىنى بىلەلمەي پات-پات چىرايىڭغا بىرەر جاۋاپ ئىزدىمەكچى بولغاندەك سىنچىلاپ قاراپ قوياتتىم.ئىدارە ئالدىغا كېلەي دەپ قالغىنىمىزنىمۇ سەزمەي قاپتىمەن يەنە كېچىككىنىمنى ھىس قىلدىم ۋە زور غەيرەت بىلەن ئېغىز ئاچتىم: -ئېرپان ساڭا دەيدىغان گېپىم بار ئىدى.كەچتە ئوستەڭ بويىدا مېنى ساقلىغىن،كېچىكىپ قالما،ئۇ يەردىن قورقىدىغان بولۇپ قالدىم... -ھازىر دېگىنە نېمە گەپ ئىدى؟ ئادەمنى تەقاززا قىلماي تېزرەك دېسەڭچۇ رامىلە؟! -بۇ يەردە دېيىش ئەپسىز،ئۇنىڭ ئۈستىگە ئۇ بىرەر ئىككى ئېغىز قىلغانغىلا تۈگەيدىغان گەپ ئەمەس. -ئازراق بولسىمۇ دېگىنە؟! ماڭا تەلمۈرۈپ تۇرغان كۆزلىرىڭگە قاراپ خېلى ئۇزۇن تۇرۇپ كەتتىم ۋە‹‹كەچتە دېيىشەيلى››دەپلا يۈگۈرگىنىمچە خىزمەت بىناسىغا كىرىپ كەتتىم. ئىشتىن چۈشۈشكە ئاز قالغاندا ئاكام ئىشخانىغا تېلېفۇن قىلىپ، ئاپامنىڭ يىقىلىپ چۈشكەنلىكىنى تېزدىن ناھىيەلىك دوختۇرخانىغا كېلىشىمنى ئېيتتى. ئاپام قىزىلمۇچلارنى قۇرۇتۇش ئۈچۈن ئۆگزىگە ئېلىپ چىقماقچى بولغاندا شوتا بالدىقىدىن تېيىلىپ كېتىپ يىقىلىپ چۈشكەن ئىكەن.تەكشۈرۈش نەتىجىسىدە ئاپامنىڭ پۇتى قايرىلىپ،يۇمشاق تۇقۇلمىلىرى ئازراق زەخمىلەنگەننى ھىساپقا ئالمىغاندا چوڭ چاتاقمۇ يوق بولۇپ چىقتى.ئاپامنىڭ ئۇكۇللىرى تۈگەپ،ئۆيگە قايتىپ كەلگىنىمىزدە خېلىلا كەچ بولۇپ قالغان ئىدى. ئاپامنى ياتقۇزۇپ،دورىلىرىنى ئىچكۈزۈش ئۈچۈن ھويلىدىكى ئوچاق بېشىغا قايناقسۇ ئالغىلى چىققىنىمدا قىيا ئېچىقلىق دەرۋازا ئالدىدا تۇرغىنىڭنى كۆردۈم ۋە‹‹سەل تۇرۇپ چىقىمەن››دېگەن ئىشارىدە شەرەت قىلدىم.سەنمۇ چۈشەنگەندەك بېشىڭنى لىڭشىتىپ قويۇپ كەينىڭگە ياندىڭ. ئاپام يىنىك تىنىپ ئۇيقۇغا كەتكەندىلا پەم بىلەن دەسسەپ ھويلا سىرتىغا چىقتىم. سەن دەرۋازىمىزنىڭ ئۇدۇلىدىكى قويۇق دەرەخلەر ئارىسىدا ئولتۇرۇپ مېنى ساقلاۋاتقان ئىكەنسەن، مېنى كۆرۈپلا ئورنۇڭدىن تۇرۇپ ئالدىمغا كەلدىڭ. -كەچۈرگىن سېنى ساقلىتىپ قويدۇم .دىدىممەن ئوڭايسىزلىق بىلەن. -بىرەر ئىش بولدىمۇ رامىلە؟ سېنى ئۆستەڭ بويىدا شۇنچە ساقلىسام كەلمىدىڭ. -چوڭ ئىش يوق،ئاپام يىقىلىپ چۈشۈپ،پۇتىنى قايرىۋاپتىكەن،ئىشتىن چۈشۈپ ئۇدۇل دوختۇرخانىغا بارغان،ئۇكۇللىرى تۈگەپ ئۆيگە قايتقۇچە ھايال بولۇپ قالدۇق. -ھە،تەكشۈرتتۇڭلارمۇ؟ دوختۇر نېمە دەيدۇ؟ھازىر قانداراق؟ -ھەئە، پۇتى قايرىلىپ كېتىپتىكەن لېكىن ئۇستىخان ساق ئىكەن.ئۇخلاپ قالدى. -ھەرنىمە بولسا ئاللاھ ئۆز پاناھىدا ساقلاپتۇ.ئەتىگۈچە كۈندۈزى ئۇنى يوقلاپ كېلىمەن. -رەھمەت ساڭا، چوڭ ئىش بولمىغاندىكىن ئاۋارە بولمىساڭمۇ بولىدۇ. -ياقەي نېمىگە ئاۋارە بولاتتىم.دېمىسىمۇ قايتىپ كەلگەندىن كىيىن ئاپاڭنىڭ ئالدىغا كىلىپ ئەھۋال سورىشىم كېرەكتە؟ بولمىسا قائىدە بىلمەيدىغان بالىكەن دەپ قىزىنى ماڭا بەرگىلى ئۇنىمىسىچۇ؟ دېدىڭ سەن چاخچاق قىلىپ، مەڭزىمنى چىمدىپ قويۇپ. شۇ ئەسنادا خېلىدىن بېرى بۇلۇتلار كەينىگە مۆكۈۋالغان ئاي ‹‹پاللىدە›› چىقىپ ئەتراپنى ئاپئاق يورىتىۋەتتى.سەن مىنى دەرەخلەرنىڭ سايىسىغىراق تارتىپ باغرىڭغا چىڭ باستىڭ. يىراقلاردىن قايسىبىر ئاشىقنىڭ ئېيتىۋاتقان مۇڭلۇق مۇھەببەت ناخشىلىرى ئاڭلىناتتى.ساي تەرەپتىن كېلىۋاتقان چېكەتكىلەرنىڭ چىرىلدىغان ئاۋازىنى ھىساپقا ئالمىغاندا، ھازىر پۈتكۈل ئالەمدە تولۇن ئاي،سەن،مەن ۋە كىشىنىڭ يۈرەك تارىنى چەككۈچى مۇھەببەت كۈيىلا مەۋجۇت ئىدى.كۆكرىكىڭگە چىڭ چاپلىشىپ تۇرۇپ يۈرەك تىۋىشلىرىڭنى تىڭشىدىم.يۈرىكىڭ ناھايىتى تېز،كۈچلۈك ئەمما رېتىملىق سوقۇۋاتاتتى.يۈرىكىڭدىن ئۈنسىز چىقىۋاتقان تەخرسىز سۆيگۈ تىنىقلىرى مۇھەببەت كۈيى بىلەن بىرلىشىپ ئاجايىپ گۈزەل،يېقىملىق بىر سىمفونىيە ياڭرىتىۋاتاتتى. بارماقلىرىمنى چىڭ سىقىمدىۋالغان ھارارەتلىك ئالقانلىرىڭدىن تارقاۋاتقان ئىللىقلىق پۈتۈن جىسمىمغا يامراۋاتاتتى.تىنىقلىرىڭدىكى چاراسلاپ ئوت كۆيۈۋاتقان تونۇردىكى ئوتنىڭ تەپتىدەك يېقىشلىق،قىززىق نەپەسلەر يۈزلىرىمگە ئۇرۇلاتتى... ئاشۇ ئىللىق ئالقانلىرىڭ بىلەن ئېڭىكىمنى كۆتۈرۈپ، كۆزلىرىمگە مۇھەببەتلىك بېقىشلىرىڭدىن مەست بولغان ئىدىم.قىززىق لەۋلىرىڭنى لېۋىمگە ياققىنىڭدا پۈتۈن ئالەم ئۇنتۇلدى.مەن ھەقىقى مۇھەببەتنىڭ ئاتەشلىك باغرىدا ھەقىقى مەناسى بىلەن سۆيۈلىۋاتاتتىم،سۆيۈۋاتاتتىم... بىلىمنى قاماللاپ تۇتۇپ تۇرغان قوللىرىڭنىڭ ئاستا-ئاستا سۈرۈلۈپ،كۆكسۈمگە يېقىنلىشىشىدىن ئەندىكىپ ئۆزۈمگە قايتتىم ۋە ئۆزۈم ئۇنچە خالاپ كەتمىسەممۇ قىزلارغا خاس ھوشيارلىق بىلەن باغرىڭدىن ئاستا ئاجرىدىم. -مەن كىرىپ كېتەي،ئاكامنىڭ كېلىدىغان ۋاقتى بولۇپ قالدى، دىدىم يىلىنىش تەلەپپۇزىدا پەس ئاۋازدا. -كەچۈرگىن، ئۆزۈمنى تۇتۇۋالالماي قېلىۋاتىمەن.كۆڭلۈڭگە ئالما بولامدۇ؟دىدىڭ خىجىللىق بىلەن كۆزۈمگە ‹‹يالت››تىدە قاراپ قويۇپ،قاراشلىرىڭدىن خۇددى گۇناھلىق ئىش قىلىپ قويغان كىچىك بالىلاردەك سەمىمىيلىك چىقىپ تۇراتتى. -ئەتە كۆرۈشەيلى،دىدىممەن سۆزۈڭگە جاۋابەن. -ھەراست، ماڭا دەيدىغان گېپىم بار دەۋاتاتتىڭ نىمە ئىش ئىدى؟دىدىڭ سەن ئۆزۈڭنى بايىقى ئوڭايسىزلىقلاردىن ئوڭشىۋالغاچ. مەن بىر تەرەپتىن گېپىمنى نەدىن باشلاشنى بىلمىسەم يەنە بىر تەرەپتىن ئاكامنىڭ ئۆيگە قايتىپ كېلىش ۋاقتىنىڭ بولۇپ قالغانلىقىدىن خاۋاتىرلىنىپ ئەتراپقا ئەنسىز قاراپ قويدۇم. -ھەراس! دىدىڭ سەن قايتىدىن جانلىنىپ،-ساڭا ئېيتىدىغان بىر خۇشخەۋەر بار! -نىمە؟ نىمە خۇشخەۋەر؟ -دادام مېنىڭ قايتىپ كەلگىنىمنى تەبرىكلەپ ئەتە ئۆيدە تەبرىكلەش زىياپىتى ئۆتكۈزۈپ بەرمەكچى،ساڭا بالدۇرراق خەۋەر قىلىپ قويۇشىمنى ئېيتقان ئىدى،باياتان نەچچە دەيمەن دەپ ئۇنتۇلۇپ قاپتىمەن.ئەتە ئىشتىن چۈشۈپلا بىزنىڭ ئۆيگە بارغىن جۇمۇ؟! -بەك ياخشى بوپتۇ ئېرپان! ياخشىراق بىر تەبرىكلەيلى.يەنە كىملەر بارىدۇ؟ -دادام ئۆزۈڭ خالىغان دوستلىرىڭنى يىغ تازا بىر ئوينىۋېلىڭلار دىدى،ئەنسىرىمە ياتلار يوق ساپلا ئىككىمىزنىڭ دوستلىرى،ھە راست پەرھات بىلەن نىگارەلەرگىمۇ خەۋەر قىلىپ قويدۇم.ئۇ ئىككىسىنىڭ تويىغا قاتنىشالمىغىنىم ئۈچۈن شۇ باھانىدە كۆڭۈللىرىنى ئېلىۋالىدىغان بولدۇم-دە. -ياخشى بوپتۇ ئېرپان! تازا ئوبدان مۇڭدىشىۋالغۇدەكمىز. سېنىڭ ئەتىكى جەم بولۇشىمىزدىن ھاياجانلىنىپ كېتىۋاتقانلىقىڭغا،ئىچ-ئىچىڭگە پاتماي قېلىۋاتقان خۇشاللىقىڭغا قاراپ تىلىمنىڭ ئۇچىغا كەلگەن سۆزلىرىم تامىقىمغا چاپلىشىپلا قېلىۋاتاتتى.شۇ ئەسنادا ئۇ كۆڭۈلسىز ئىشلارنى تىلغا ئېلىپ كۆڭلۈڭنى بىئارام قىلغۇم كەلمەيۋاتاتتى. -ھە، ئەمدى سېنىڭ گېپىڭنى ئاڭلايمەن، دېگىنە نىمە ئىش ئىدى؟ دىدىڭ قايتىلاپ. -ھېچ،..ھېچ ئىشقۇ يوق بولدىلا كېيىن دېيىشەيلى، دىدىممەن دۇدۇقلاپ تۇرۇپ. -ۋاي دېگىنە ئادەمنى تەقاززا قىلماي؟ بىلىسەنغۇ ئەزەلدىن‹‹كىيىن دەپ بېرەي››دېسەڭلا ئاڭلىغىلى بەك ئالدىراپ كېتىدىغىنىمنى؟ -شۇ..شۇ ئاپام تويۇڭلارنى تېزرەك قىلىۋەتسەڭلار بولاتتى، دەپ ئالدىرىتىپ... -ھا ھا ھا ۋاي شۇ ئىشمىتى ئومىقىم؟ مۇشۇ گەپنىمۇ شۇنچە مۇرەككەپلەشتۈرۋېتەمسەن؟مەن تېخى سېنىڭ دىيەلمەي بۇنچە قىينىلىپ كېتىۋاتقىنىڭغا قاراپ‹‹ساڭا تەگمەيمەن››دەيدىغان ئوخشايدۇ دەپ ئەنسىرەپ كېتىپتىمەن، ھا ھا ھا ھازىر كىرىپلا كەلگۈسى قېيىنانامغا ئېيت،توينىڭ تەييارلىقلىرىنى باشلىسۇن. قۇشۇلساڭ كېلەركى دۈشەنبە كۈنىلا توي خېتىنى ئالغىلى بارايلى. | 
[ئۇلانما كۆچۈرۈش]
يوللىغان ۋاقتى 2013-7-28 19:24:32
يانا ئوقۇيمەن 
مەن ھەقىقى مۇھەببەتنىڭ ئاتەشلىك باغرىدا ھەقىقى مەناسى بىلەن سۆيۈلىۋاتاتتىم،سۆيۈۋاتاتتىم خاخا نىمە دىگەن تاتلىق جۈملىلە بۇ !!!!! خان كىچىچە يىزىپ يوللاپسىز بەك چارچاپ كەتمەڭ سىزگە ئىچىم ئاغرىپ قالدى !!!!!!بىزمۇ ئالدىراتمايلى سىزمۇ چارچىمىغان ئاساستا يىزىپ تۈگۈتۈڭ 
