«كۈتۈلمىگەن قوش توي» درامىسى توغرىسىدا
(بۇ درامىنى شىنجاڭ ئوپېرا ئۆمىكى 1980 - يىللىرى ئورۇنلىغان.)
ئاپتورى: تۇرسۇن يۈنۈس.
رېژىسسور: نىجات ئەكبەر.
ئاساسلىق روللاردا:
ھايسىخان: رەيھان كېرىم.
سادىرئاخۇن: نۇرۇم سابىرھاجى.
ھەمراخان: سەربىي نۇراجى.
سايىم ئاخۇن: مەمىتىمىن نورۇز.
ئادىلجان: سەيدۇللا توختى.
تاجىگۈل: ھەنىپە ئىسمايىل.
پازىلجان: ئەركىن نىياز.
ھاجىگۈل: رەيھانگۈل روزى.
ئابدۇرىشىت ھاكىم: ۋارىس ئىسلام.
ياسىن داموللاھاجىم: زەينۇللا بورھان قاتارلىقلار
قىسقىچە مەزمۇنى:
بۇ درامىدا سادىر ئاخۇن بىلەن ھايسىخان ئاكا - سىڭىل ئىككىيلەن ئالىي مەكتەپتە ئوقۇپ، ئوقۇش پۈتتۈرۈپ كەلگەن ئوغلى ئادىلجان بىلەن تاجىگۈلنىڭ تويىنى قىلىپ، ئارزۇ - ئارمانلىرىغا يەتمەكچى بولىدۇ. ئەمما ئادىلجاننىڭ ئانىسى - ھەمراخان بىلەن تاجىگۈلنىڭ دادىسى - سايىم ئاخۇن بۇ توي ئىشىغا قوشۇلمايدۇ ھەمدە ئادىلجان بىلەن تاجىگۈلمۇ بۇ تويغا قوشۇلمايدۇ. چۈنكى، ھەر ئىككى ياشنىڭ مەكتەپتە بىللە ئوقۇپ كەلگەن لايىقى بولۇپ، ئۇلار: «نەۋرىنى نەۋرىگە چېتىش قىلمىشى ئىلىم - پەندىمۇ، دىندىمۇ توغرا ئەمەس، شۇڭلاشقا ئۆزىمىزنىڭ لايىقى بىلەن توي قىلساق.» دېيىشىدۇ. سادىر ئاخۇن بىلەن ھايسىخان بالىلىرىنىڭ ۋە باشقا ئۇرۇق - تۇغقانلارنىڭ گېپىگە قۇلاق سالماي، «بۇ توينى قىلغىنىمىز قىلغان» دەپ مەھكەم تۇرۇۋالىدۇ. ھەتتا بالىلىرىغا ئۇقتۇرماي، توي باغىقى تارقىتىدۇ. ئارىلىقتا بىرقاتار كۆڭۈلسىزلىك ۋە زىددىيەتلەر پەيدا بولىدۇ. نەتىجىدە ئابدۇرىشىت ھاكىم، مەريەم خانىم ۋە ياسىن داموللا ھاجىم قاتارلىق كىشىلەرنىڭ ئىدىيەۋى خىزمەت ئىشلىشى ئارقىسىدا سادىر ئاخۇن بىلەن ھايسىخانلارنىڭ ئىدىيەسى ھەل بولۇپ، بالىلىرىنىڭ ئۆز لايىقى بىلەن توي قىلىشىغا قوشۇلىدۇ. ئاخىرىدا ئادىلجان بىلەن ھاجىگۈلنىڭ، پازىلجان بىلەن تاجىگۈلنىڭ تويى بىر كۈندە بولۇپ، ئەل - جامائەتنى ھەيران قالدۇرۇۋېتىدۇ. بۇ درامىدا ئاتاغلىق چولپانلاردىن مەرھۇم سەيدۇللا توختى، مەرھۇم مەمىتىمىن نورۇز، ۋارىس ئىسلام، رەيھان كېرىم، سەربىي نۇراجى قاتارلىقلار رول ئالغان بولۇپ، ئۇلارنىڭ سەھنىدىكى ماھارىتى تاماشىبىنلارنى كۈلكە دېڭىزىغا باشلاپ بارىدۇ.
يازغۇچى: ئابدۇمىجىت مۇھەممەتئېلى
2012 - يىلى 23 - سېنتەبىر يېزىلدى. قەشقەر بۇ يازمىنى ئاخىرىدا نەسىمى تەھرىرلىگەن. ۋاقتى 2012-9-24 11:22
| 
يوللىغان ۋاقتى 2012-9-23 14:00:06
