«ئەدىب نەسرۇللا ئابلەت ئىجادىيىتى ئىلمىي مۇھاكىمە يىغىنى»ۋە «يېڭى دەۋر ئۇيغۇر ئەدەبىي تەنقىدچىلىكى ئىلمىي مۇھاكىمە يىغىنى »ئاتۇشتا ئېچىلدى
جۇڭخۇا خەلق جۇمھۇرىيىتى قۇرۇلغانلىقىنىڭ 63 يىللىقىنى قىزغىن تەبرىكلەش ، پارتىيە 18-قۇرۇلتىيىنىڭ غەلبىلىك ئېچىلىشىنى كۈتىۋىلىش مۇناسىۋىتى بىلەن شىنجاڭ ئۇيغۇر ئاپتونۇم رايۇنلۇق ئەدەبىيات – سەنئەتچىلەر بىرلەشمىسى ، شىنجاڭ «تارىم» ژورنىلى نەشىرىياتى ۋە ئاتۇش شەھەرلىك خەلق ھۆكۈمىتى بىرلىكتە 19-سىنتەبىر مەرىپەت يۇرتى ئاتۇش شەھرىدە «ئەدىب نەسرۇللا ئابلەت ئىجادىيىتى ئىلمىي مۇھاكىمە يىغىنى» ۋە «يېڭى دەۋر ئۇيغۇر ئەدەبىي تەنقىدچىلىكى ئىلمىي مۇھاكىمە يىغىنى » چاقىردى .
شۇ كۈنى چۈشتىن بۇرۇن ، «ئەدىب نەسرۇللا ئابلەت ئىجادىيىتى ئىلمىي مۇھاكىمە يىغىنى» ئېچىلدى . يىغىنغا شىنجاڭ «تارىم» ژورنىلى نەشىرىياتىنىڭ باشلىقى ، باش مۇھەرىر ، ئالىي مۇھەرىر ، مەشھۇر شائىر ياسىن زىلال يىغىنغا رىياسەتچىلىك قىلدى . يىغىنغا قىزىلسۇ ئوبلاستى ۋە ئاتۇش شەھىرىنىڭ ئالاقىدار رەھبەرلىرى ، بىر قىسىم ئاتاقلىق يازغۇچى ، شائىر ، ئوبزورچىلار ، «تارىم» ، «ئەدەبىي تەرجىمىلەر» ، «شىنجاڭ سەنئىتى» ، «شىنجاڭ مەدەنىيىتى» ، «كىرورەن» ، «قەشقەر ئەدەبىياتى» ، «يېڭى قاشتىشى» قاتارلىق بىر قىسىم ژورناللارنىڭ مەسئۇللىرى ، شىنجاڭ خەلق نەشىرىياتى ، قەشقەر ئۇيغۇر نەشىرىياتىدىن كەلگەن خادىملار ، شىنجاڭ تېلىۋىزىيە ئىستانىسى ، شىنجاڭ گېزىتى ، قىزىلسۇ تېلىۋېزىيە ئىستانسىسى ، قىزىلسۇ گېزىتى قاتارلىق بىر قىسىم ئاخپارات ئورۇنلىرىنىڭ مۇخبىرلىرى ۋە ھەرقايسى ناھىيە ، شەھەرلەردىن كەلگەن شائىر ، يازغۇچىلار بولۇپ 100دىن ئارتۇق كىشى قاتناشتى .
يىغىندا ، تۆمۈر داۋامەتنىڭ تەبرىك خېتى ، جۇڭگو يازغۇچىلار جەمئىيىتىنىڭ تەبرىك ىېتى ، جۇڭگو يازغۇچىلار مىللەتلەر ئەدەبىياتىنىڭ تەبرىك خېتى ، جۇڭگو ئۇيغۇر تارىخى مەدەنىيەت تەتقىقات جەمئىيىتىنىڭ خېتى ، سەيپىدىن ئەزىزىنىڭ خانىمى ئايىم ئەزىزىنىڭ خېتى قاتارلىقلار ئوقۇپ ئۆتۈلدى . ئاتۇش شەھىرىنىڭ شەھەر باشلىقى يالقۇن تۇردى ، شىنجاڭ «تارىم» ژورنىلىنىڭ باش مۇھەرىرى ياسىن زىلال سۆز قىلدى . خوتەن پىداگوگىكا ئالىي تېخنىكومىنىڭ پىرافىسسورى ئابدۇللا سۇلايمان ، مۇھەممەت ئىمىن (شىنجاڭ سەنئىتى ژورنىلىنىڭ مۇئاۋىن باش مۇھەرىرى قاھار نىياز ۋاكالىتەن ئوقىدى) ، شىنجاڭ مائارىپ نەشىرىياتىنىڭ كاندىدات ئالىي مۇھەرىرى ، ئوبزورچى يالقۇن روزى قاتارلىقلار نەسرۇللا ئابلەتكە ئاتاپ يېزىلغان ماقالە-ئەسەر ، باھالارنى ئوقۇپ ئۆتتى .
يىغىن ئاخىرىدا ، ياسىن زىلال ، مۇئاۋىن ئوبلاست باشلىقى قۇربانجان ھەسەن ، شەھەر باشلىقى يالقۇن تۇردىلار نەسرۇللا ئابلەتكە تون كەيدۇردى ، نەسرۇللا ئابلەتنىڭ خىزمەتداشلىرى ، يازغۇچى ، شائىر دوست –بۇرادەرلىرى ، ئۇرۇق-تۇغقان ، ئائىلە تاۋابىئاتلىرى گۈل ۋە كۆڭۈل سوۋغىسى تەقدىم ئەتتى .
شۇ كۈنى چۈشتىن شىنجاڭ ۋاقتى 2:30 ئۆتكەندە . «يېڭى دەۋر ئۇيغۇر ئەدەبىي تەنقىدچىلىكى ئىلمىي مۇھاكىمە يىغىنى » ئېچىلىشقا باشلىدى . مۇھاكىمە يىغىنىدا خوتەن پىداگوگىكا ئالىي تېخنىكومىنىڭ ئەدەبىيات فاكولتىتىنىڭ مۇدىرى ئەنۋەر ھوشۇر ، شىنجاڭ ئۇنۋىرسىتىتىنىڭ دوسسېنتى مەتتۇرسۇن ئېلى ، شىنجاڭ مائارىپ نەشىرىياتىنىڭ كاندىدات ئالىي مۇھەرىرى ، ئوبزورچى يالقۇن روزى ، تونۇلغان ئەدىپ ، شائىر نەسىرۇللا ئابلەت ، شىنجاڭ ئۇنۋىرىستىتىنىڭ دوكتۇر يېتەكچىسى ، پىرافىسسور ئابدۇكېرىم راخمان قاتارلىقلار يېڭى دەۋر ئۇيغۇر ئەدەبىي تەنقىدچىلىكى ھەققىدە ئىلمىي ماقالىلىرىنى ئوقۇدى ۋە سۆز قىلدى .
قۇربانجان توختى ئازىق خەۋىرى
يوللىغان ۋاقتى 2012-9-20 03:21:48
