پەرزەنتى ئىچكىرىدە ئوقۇۋاتقان ئاتا - ئانىلار سەمىگە (ئىلقۇت)

ئىلقۇت

	پەرزەنتى ئىچكىرىدە ئوقۇۋاتقان ئاتا - ئانىلار سەمىگە (ئىلقۇت) ئىلاۋە:       مەزكۇر يازما 2009 - يىلى يېزىلغان يازما ئىدى، بۇ يىلمۇ ئىچكىرىدىكى شىنجاڭ تولۇق ئوتتۇرا سىنىپىغا 8000 دىن ئارتۇق ئوقۇغۇچى قوبۇل قىلىندى. شۇڭا بۇ 8000 دىن ئارتۇق ئوقۇغۇچى ۋە ئۇلارنىڭ ئاتا - ئانىسىغا ئاز - تولا بولسىمۇ ياردىمى تېگىپ قالسا ئەجەب ئەمەس دەپ بۇ يەرگە قايتا يوللاپ قويدۇم. يازما گەرچە قايتا تەھرىرلەنگەن بولسىمۇ پەقەت ئىملا جەھەتتە تۈزىتىش كىرگۈزۈلدى، لېكىن ماقالىنىڭ ئەسلىي ھالىتى ئەڭ يۇقىرى چەكتە ئەينەن ساقلاپ قېلىندى. شۇڭا تورداشلارنىڭ توغرا چۈشىنىشىنى ئۈمىد قىلىمەن. ياسىنجان مەتروزى ئىلقۇت    (1) پەرزەنتى ئىچكىرى شىنجاڭ تۇلۇق ئوتتۇرىدا ئوقۇۋاتقان ئاتا-ئانىلارنىڭ ھەممىسىگە تۇنۇشلۇق، ھازىر دەل ئىچكىرى شىنجاڭ تۇلۇق ئوتتۇرىدا ئوقۇۋاتقان ئوقۇغۇچىلارنىڭ(تۇلۇق 3-يىللىقتا) ئالىي مەكتەپ ئارزۇسىنى تاللاش مەزگىلى، يەنە 20 كۈندىن كىيىن ھەممە ئوقۇغۇچىلار ئارزۇ تاللاشقا چۈشۈپ كېتىدۇ. بۇ يەردە بىر مەسىلە ساقلانغان بولۇپ، بۇ مەسىلە دەل ھازىر ئىچكىرى شىنجاڭ تۇلۇق ئوتتۇرىدا ئوقۇۋاتقان ئوقۇغۇچىلار ھەرگىزمۇ شىنجاڭدا ئوقۇۋاتقان ئوقۇغۇچىلاردەك 6-ئايدا ئاۋۋال ئىمتىھاننى بېرىپ بولۇپ ئاندىن ئارزۇ تاللىماستىن، بەلكى ئاۋۋال ئىمتىھان بېرىپ بولۇپ ئاندىن ئارزۇ تاللايدۇ. شۇنداق بولغاچقا ئىچكىرى شىنجاڭ تۇلۇق ئوتتۇرىدا ئوقۇۋاتقان ئوقۇغۇچىلارنىڭ ئارزۇ تاللىشى بىرقەدەر باش ئاغرىتىدىغان ئىش. مېنىڭ ئارزۇ تاللاش ۋە ئۇنىۋېرسىتېتقا چىققاندىن كېيىنكى كۆزىتىشىمگە ئاساسلانغاندا، ئىچكىرى شىنجاڭ تولۇق ئوتتۇرىدا ئوقۇۋاتقان ئوقۇغۇچىلار ئارزۇ تاللاش جەھەتلەردە ئۇنداق - مۇنداق خاتالىقلارنى سادىر قىلىدۇ. ئىچكىرى شىنجاڭ تولۇق ئوتتۇرىدا ئوقۇۋاتقان ئوقۇغۇچىلار ئاساسەن بېكىنمە ھالەتتە ئوقۇۋاتقان بولغاچقا، ئۇلارنىڭ سىرتقى مۇھىت بىلەن ئۇچرىشىشى ناھايىتى ئاز بولىدۇ ياكى يوق دېيەرلىك بولىدۇ. شۇڭا ئۇلار ئالىي مەكتەپ دېگەن قانداق بولىدىغاندۇ؟ دەپ كۆپ ئويلىنىپ كېتىدۇ. شۇڭا مەن ئۆزۈمنىڭ كۆزىتىشىگە ئاساسەن تۆۋەندىكى مېنىڭ نەزىرىمدە «زادى ساقلانمىسا بولمايدۇ» دەپ قارىغان مەسىلىلەرنى ئوتتۇرىغا قويۇپ ئۆتەي، پەرزەنتى ئىچكىرى شىنجاڭ تولۇق ئوتتۇرىدا ئوقۇۋاتقان ئاتا-ئانىلارنىڭ كۆرۈپ بېقىشىنى، بەزىبىر ساقلانغىلى بولىدىغان مەسىلىلەردىن ساقلىنىپ پەرزەنتىنىڭ كەلگۈسى ئۈچۈن ئويلىنىپ بېقىشىنى ئالاھىدە تەۋسىيە قىلىمەن. بۇ پەقەت مېنىڭ شەخسەن كۆز قارىشىم، چوقۇم شۇنداق بولىدۇ دېگەنلىك ئەمەس، شۇڭا پايدىلىنىش قىممتى بار دەپ قارىسىڭىز پايدىلىنارسىز، پەرزەنتىڭىزنىڭ كەلگۈسىنى ياخشى ئورۇنلاشتۇرۇشىڭىزغا ئاز-تولا ياردىمى بولۇپ قالسا ئەجەب ئەمەس.       ئەمىسە ئەسلى مەقسەتكە كېلەي، تۆۋەندىكىلەر مەن ئۇنىۋېرسىتېتقا چىققاندىن كېيىنكى ئويلىغانلىرىم:       بىرىنچىدىن، ئالىي مەكتەپ ۋە تولۇق ئوتتۇرا تامامەن ئوخشىمايدىغان ئىككى خىل مۇھىت.       1. مەكتەپنىڭ ماھىيىتى ئوخشىمايدۇ. ئالىي مەكتەپ بىر ئېچىۋېتىلگەن ئوقۇش مۇھىتىدىن ئىبارەت. بۇ يەردە تىلغا ئېلىنغان ئېچىۋېتىلگەن دېگىنىمىز، ئالىي مەكتەپتە سىز خالىغىنىڭىزنى قىلالايسىز، خالىغان ۋاقىتتا سىرتقا چىقىش، ياتاققا قايتىش، ئۇخلاش، تاماق يېيىش… قاتارلىقلارنىڭ ھەممىسىنى ئۆز ئەركىنلىكىڭىز بىلەن ئورۇنلاشتۇرالايسىز. بۇ جەھەتتە تولۇق ئوتتۇرا، بولۇپمۇ ئىچكىرى شىنجاڭ تولۇق ئوتتۇرا سىنىپى تۈپتىن ئاسمان - زېمىن پەرقلىنىدۇ.       2. ئوقۇتقۇچى - ئوقۇغۇچىلار مۇناسىۋىتى ئوخشىمايدۇ. تولۇق ئوتتۇرىدا مۇئەللىم ئوقۇغۇچىنى ئىزدەيدۇ، ئالىي مەكتەپتە بولسا ئوقۇغۇچى مۇئەللىمنى ئىزدەيدۇ. بۇ يەردىكى ئىزدەش مۇناسىۋىتى، تۇلۇق ئوتتۇرىدا ئوقۇتقۇچى ھەر سائەت، ھەر مىنۇت ئوقۇغۇچىنىڭ ياخشى ئۆگىنىشىنى تەكىتلەپ، ئۇنى ياخشى ئۆگىنىشكە مەجبۇرلاپلا تۇرىدۇ. ئەمما ئالىي مەكتەپتە بۇنداق ئىش مەۋجۇت ئەمەس، پەقەت ئوقۇغۇچى ئۆزى ئېھتىياجلىق بولسا ئوقۇتقۇچىنى ئىزدەپ ئۆگىنىدۇ، ئەگەر ئىزدىمىسە ھېچكىم ئۇنى سەن ئوقۇتقۇچىنى ئىزدە دېمەيدۇ.       3. تۇرمۇش ئۇسۇلى ئوخشىمايدۇ. تولۇق ئوتتۇرىدا ئوقۇتقۇچى ئوقۇغۇچىغا قانداق ياشاشنى ئۆگىتىدۇ. ئوقۇغۇچىلارغا ناھايىتى كۆيۈنىدۇ. ئەمما ئالىي مەكتەپتە بولسا ئوقۇغۇچى پەقەت ئۆزىگە تايىنىدۇ خالاس. ئالىي مەكتەپتە ئاساسەن سىزگە كۆيۈنىدىغان ئادەم يوق، پەقەت ئۆزۈم خان، ئۆزۈم بەگ بولۇپ ياشايسىز، دەل مۇشۇنداق بولغاچقا سىزنىڭ ئۆزىڭىزنى كونترول قىلىش كۈچىڭىز ئالاھىدە ياخشى بولۇشى كېرەك. بولمىسا چوڭ زىيان تارتىدىغىنى يەنىلا سىز بولۇپ قالىسىز.       4. ئوقۇتقۇچىنىڭ دەرس ئۆتۈش ئۇسۇلى ئوخشىمايدۇ. تۇلۇق ئوتتۇرىدا دەرسلىك مەزمۇنى ئاز، سالمىقى ئانچە ئېغىر ئەمەس، ۋاقىت كۆپ، مۇئەللىمنىڭ دەرس سۆزلەش سۈرئىتى ئاستا، ئوقۇتقۇچى ئېنىق چۈشەندۈرۇپ ئوقۇغۇچىنىڭ ۋاقتىدا چۈشىنىپ ئۆزلەشتۈرۈۋېلىشىنى ئاساس قىلىدۇ. ئەمما ئالىي مەكتەپ بولسا بۇنداق ئەمەس. ئالىي مەكتەپتە دەرس مەزمۇنى كۆپ، سالمىقى ئېغىر، ئوقۇتقۇچىنىڭ دەرس سۆزلەش سۈرئىتى تېز، ئوقۇتقۇچى دەرسنى ئاساسەن ۋاقتىدا ئۆتۈپ، زىممىسىدىكى ۋەزىپىنى تۈگىتىپ بولۇشنى ئاساس قىلىدۇ، ئوقۇغۇچىنىڭ ئۆزلەشتۈرۈپ كېتىشىنى ئاساسەن ئويلاشمايدۇ. ئوقۇتقۇچى پەقەت دەرسىنى ئۆتۈپ بولسىلا ۋەسسالام، ئىش تامام، ئۆز يولىغا راۋان بولىدۇ. ئوقۇغۇچى ئاساسەن ئۆزلۈكىدىن ئۆگىنىشنى چىڭ تۇتۇشى تەلەپ قىلىنىدۇ. دۆلىتىمىزنىڭ شىنجاڭ تولۇق ئوتتۇرا سىنىپىغا يارىتىپ بەرگەن شارائىتلىرى:       دۆلىتمىز 2000 - يىلدىن باشلاپ شىنجاڭدىكى ئاشۇ يېزا - قىشلاقلاردىكى نامرات ئوقۇغۇچىلارنىڭ تېخىمۇ يۇقىرىلاپ ئوقۇش پۇرسىتىگە ئېگە قىلىپ، ئىچكرىدىكى ھەرقايسى تەرەققىياتى دۆلىتىمىزدە ئالدىنقى قاتاردا تۇرىدىغان شەھەرلەردە ئىچكىرى تولۇق ئوتتۇرا شىنجاڭ سىنىپىنى تەسىس قىلىپ، بىزدەك نامرات دېھقان پەرزەنتلىرى ئۈچۈن تېپىلغۇسىز شارائىت يارىتىپ بەردى. دۆلىتىمىز شارائىتنى يارىتىپ بەردى، ئەمدى چايناپ ئېزىپ ئىچۈرۈپ قويۇشنىڭ ئورنى يوق، شۇڭا پۇرسەتنى چىڭ تۇتۇپ بۇ ئەۋزەل شارائىتتىن تولۇق پايدىلىنىش ياكى پايدىلىنالماسلىق يەنىلا بىزنىڭ ئۆزىمىزگە قاراشلىق.       ئىچكىرى شىنجاڭ تولۇق ئوتتۇرىدا ئوقۇۋاتقان ئوقۇغۇچىلارغا تەمىنلەنگەن تاللاشقا بولىدىغان كەسىپنىڭ تاللاش پىرىنسىپى:       ئىچكىرى شىنجاڭ تولۇق ئوتتۇرىدا ئوقۇۋاتقان ئوقۇغۇچىلار دۆلەتلىك بىرتۇتاش ئىمتىھانغا قاتنىشىشتا ئىچكىرىدىكى بارلىق شىنجاڭ سىنىپىدىكى ئوقۇغۇچىلىرى ئوخشاش بىر ئىمتىھان قەغىزىدە ئىمتىھان بەرمەيدۇ، ئەكسىچە قايسى ئۆلكىدە تۇلۇق ئوتتۇرا ئوقۇغان بولسا شۇ ئۆلكىنىڭ ئىمتىھان قەغىزىگە ئىمتىھان بېرىدۇ. لېكىن ئالىي مەكتەپكە قوبۇل قىلىش ئۆلچەم نومۇرى ئوخشاش بولىدۇ. ئۇلار ئاساسەن 5 - ئايدا ئارزۇ تولدۇرۇپ، 5 - ئاينىڭ 20 - كۈنىدىن بۇرۇن ئارزۇ تولدۇرۇش جەدۋىلىنى تاپشۇرۇپ بولىدۇ ھەمدە 6 - ئايدا ئىمتىھانغا قاتنىشىدۇ، يەنى بىر ئاي بۇرۇن ئارزۇ تولدۇرىدۇ. ئارزۇ تولدۇرۇشتا دۆلەتلىك مائارىپ سىستېمىسى بەلگىلەپ بەرگەن مەكتەپنىڭ بەلگىلەنگەن كەسپىنى تاللايدۇ، بەلگىلەنمىگەن كەسىپنى تاللاشقا يول قويۇلمايدۇ. بېيجىڭ پېداگوكىكا ئۇنىۋېرسىتېتى، شەرقىي جوڭگۇ (خۇادۇڭ) پېداگوكىكا ئۇنىۋېرسىتېتى، ئوتتۇرا جۇڭگو (خۇاجۇڭ) پېداگوكىكا ئۇنىۋېرسىتېتى، شەنشى پېداگوكىكا ئۇنىۋېرسىتېتى، شىنەن پېداگوكىكا ئۇنىۋېرسىتېتى(ھازىر ئىسمى شىنەن ئۇنىۋېرسىتېتىغا ئۆزگەرتىلگەن)، شەرقىي شىمال پېداگوكىكا ئۇنىۋېرسىتېتى(بۇ ئۇنىۋېرسىتېتلار 2006 - يىلى مەن ئىمتىھانغا قاتناشقاندا مۇشۇلارلا بار ئىدى، ھازىر كۆپەيدىمۇ يوق بىلمەيمەن) قاتارلىق ئۇنىۋېرسىتېتلارغا قوبۇل قىلىنغان ئوقۇغۇچىلار ئالىي مەكتەپنىمۇ ھەقسىز ئوقۇش پۇرسىتىدىن بەھرىمەن بولىدۇ.       شۇڭا پات يېقىندا ئارزۇ تولدۇرۇش ئالدىدا تۇرغان ئاشۇ بىزنىڭ ئىز باسارىمىز بولغان ئىنى - سىڭىللىرىمىزنىڭ مۇشۇ ئەۋزەل شارائىتنىڭ بىرى بولغان ئالىي مەكتەپ ئارزۇ تولدۇرۇش ئىشى ئۈچۈن ئاز - تولا پايدىلىنىش ئۇچۇرى بولۇپ قالار، دەپ بۇ يازمىنى يوللىدىم. تۆۋەندە ئىچكىرى شىنجاڭ تولۇق ئوتتۇرا سىنىپىدىكى ئارزۇ تولدۇرماقچى بولغان ئوقۇغۇچىلاردا بىرقەدەر كۆپ ساقلىنىدىغان خاتالىقلار ئۈستىدە ئۆز كۆز قارىشىمنى ئوتتۇرىغا قويۇپ ئۆتەي.       ئارزۇ تولدۇرۇشتىكى بىرقانچە خاتالىقلار:       1. ئارزۇ تولدۇرماقچى بولغان ئوقۇغۇچىلار ئۆزىنىڭ ئەمەلىي ئەھۋالىنى ياخشى چۈشەنمەيدۇ. ئوقۇغۇچىلار ئارزۇ تولدۇرغاندا ساقلىنىدىغان ئەڭ چوڭ خاتالىق ئوقۇغۇچىلار پەقەت ئالىي مەكتەپنىڭ دەرىجىسىگىلا قاراپ، باشقا شارائىتلارنى ئويلاشمايلا ئارزۇ تولدۇرۇشتەك ئېغىر خاتالىقلارنى سادىر قىلىدۇ. ئوقۇغۇچىلار پەقەت مەكتەپنىڭ دەرىجىسىگىلا قاراپ، مەكتەپ تەمىنلىگەن تاللاشقا بولىدىغان كەسىپنى ئويلاشمايدۇ. بۇنىڭ بىلەن بەزى مەكتەپلەرنىڭ گەرچە دەرىجىسى ئالدىدا بولسىمۇ، لېكىن تاللاشقا تەمىنلىگەن كەسىپ (ئىچكىرى شىنجاڭ تولۇق ئوتتۇرىدا ئوقۇۋاتقان ئوقۇغۇچىلار ھەرگىزمۇ دۆلەتلىك مائارىپ ئىدارىسى بەلگىلەپ بەرگەن مەكتەپلەردىكى بارلىق كەسىپنى تاللاش ھوقۇقى يوق، پەقەت بەلگىلەپ بېرىلگەن مەكتەپنىڭ بەلگىلەنگەن كەسپىنى تاللىيالايدۇ. شۇڭا بۇ نۇقتا چوقۇم كاللىڭىزدا ئايدىڭ بولۇشى كېرەك) نىڭ قانداقلىقى بىلەن ئويلاشمايدۇ. يەنى بۇ يەردە مۇنداق بىر خاتالىق كۆرۈلۈشى مۇمكىن. بەزى مەكتەپلەرنىڭ ئۇنىۋېرسال دەرىجىسى ئالدىدا بولسىمۇ، لېكىن ئىچكىرى شىنجاڭ تولۇق ئوتتۇرىدا ئوقۇۋاتقان ئوقۇغۇچىلارنىڭ تاللىشىغا تەمىنلەپ بېرىلگەن كەسىپ ئالدىدا بولماسلىقى مۇمكىن ھەمدە شۇنىڭدەك بەزى مەكتەپلەرنىڭ گەرچە دەرىجىسى ئالدىدا بولمىسىمۇ، لېكىن ئىچكىرى شىنجاڭ تولۇق ئوتتۇرىدا ئوقۇۋاتقان ئوقۇغۇچىلارنىڭ تاللىشى ئۈچۈن تەمىنلەنگەن كەسىپ بىرقەدەر ياخشى بولۇشى مۇمكىن. شۇڭا سىزگە ئېيتىدىغىنىم، ھەرگىزمۇ مەكتەپنىڭ دەرىجىسىگە ئالاھىدە دىققەت قىلىپ كەتمەڭ. چوقۇم ئەمەلىيەتنى چىقىش قىلغان ئاساستا ئۆزىڭىزنىڭ ئەمەلىي ئەھۋالىغا قاراپ ئارزۇ تولدۇرسىڭىز بولىدۇ. (بۇ يەردە بۇ خەتنى ئاشۇ ئىچكىرى شىنجاڭ تولۇق ئوتتۇرىدا ئوقۇۋاتقان ئوقۇغۇچىلارنىڭ كۆرۈشى ناتايىن، بىراق ئاشۇ ئوقۇغۇچىلارنىڭ ئاتا - ئانىسى ياكى باشقا ئۇرۇق - تۇغقانلىرى كۆرۈشى مۇمكىن، شۇڭا كۆرگەنلەرنىڭ مۇناسىۋەتلىك ئوقۇغۇچىلارغا يەتكۈزۈپ قويۇشىنى شۇ ئارقىلىق ئاشۇ ئوقۇغۇچىلارنىڭ كەلگۈسىنى توغرا بەلگىلىشى ئۈچۈن پايدىلىنىش ئۇچۇرى تەمىنلەپ بېرىشىنى ئۈمىد قىلىمىز)       2. ئۆزىگە تولۇق ئىشەنچ قىلالماسلىق. ھەممىمىزگە ئايان، چىڭخۇا ئۇنىۋېرسىتېتى، بېيجىڭ ئۇنىۋېرسىتېتى ۋە بېيجىڭ پېداگوكىكا ئۇنىۋېرسىتېتى قاتارلىق مەكتەپلەر دۆلىتىمىزدىكى ئالدىنقى قاتاردىكى مەكتەپلەر ھەمدە ئۇنىڭدىن باشقا يەنە نۇرغۇن مەكتەپلەرمۇ بار. بۇ يەردە يېڭى ئارزۇ تولدۇرغان ئوقۇغۇچىلاردا ساقلىنىدىغان مەسىلە مەكتەپنىڭ دەرىجىسىنى بىر كۆرۈپلا بىر بولسا ئۆزىنىڭ ئىقتىدارىغا سەل قاراپ، ئالدىنقى قاتاردىكى مەكتەپلەرنى تاللاشقا جۈرئەت قىلالماي ئۆزىچە بەزى ئانچە ياخشى بولمىغان مەكتەپلەرنى تاللاپ قويىدىغان ياكى ئۆزىگە بەك ئىشىنىپ كەتكەچكە دەرىجىنى چوڭ تاللاپ قويىدىغان مەسىلە ساقلىنىدۇ، ياكى شۇ ئوقۇغۇچىلار پەقەت مەكتەپنىڭ دەرىجىسىگىلا قاراپ كەتكەندە، بىرىنچىدىن ئۆزىنىڭ ئىقتىدارىغا سەل قاراپ مۇۋاپىق مەكتەپنى تاللىيالماسلىقى ياكى ئىقتىدارىغا ئارتۇقچە ئىشىنىپ مەكتەپنى بەك چوڭ تاللىۋېتىپ مەغلۇب بولۇشى مۇمكىن. شۇڭا ئۆزىڭىزنىڭ ئەمەلىي ئىقتىدارىنى ئوبدان دەڭسەپ بولۇپ، ئاندىن مۇۋاپىق مەكتەپ تاللىشىڭىزغا تىلەكداشمەن.       3. مەكتەپ پۇلىدىن ئارتۇقچە ئەنسىرەپ كېتىش. ھەممىمىزگە ئايان شىنجاڭدىكى ئاشۇ يېزا - قىشلاقلاردا تۇرمۇش كەچۈرۈۋاتقان دېھقان ئائىلىلىرىنىڭ كىرىمى دېگۈدەك يۇقىرى ئەمەس، شۇڭا ئۇلارنىڭ ئەڭ ئەنسىرەيدىغىنى مەكتەپ پۇلىنى قانداق تۆلەش مەسىلىسىدىن ئىبارەت. بۇ دەل مېنىڭ ئەينى ۋاقىتتا سادىر قىلغان ئەڭ چوڭ خاتالىقىم. شۇڭا بۇنىڭدىن كىيىنكى ئىنى - سىڭىللارنىڭ ئوخشاش خاتالىق سادىر قىلماسلىقى ئۈچۈن مەزكۇر يازمىنى ئالاھىدە يېزىپ ئولتۇرۇپتىمەن. بەلكىم كۆپچىلىكمۇ بىلىدىغانسىلەر، دۆلىتىمىز ھەر يىلى ئىچكىرى شىنجاڭ تولۇق ئوتتۇرا سىنىپىدىن ئىمتىھانغا قاتناشقان ئوقۇغۇچىلاردىن مەلۇم ساندا تاللاپ يەنە ئالىي مەكتەپنىمۇ ھەقسىز ئوقۇتۇش شارائىتىنى ھازىرلاپ بەردى، بۇ يەردە ئېيتىلىۋاتقان شارائىت دەل پېداگوكىكا ئۇنىۋېرسىتېتلىرىدىن بولغان بېيجىڭ پېداگوكىكا ئۇنىۋېرسىتېتى، شەرقىي جۇڭگو (خۇادۇڭ) پېداگوكىكا ئۇنۋېرسىتېتى، ئوتتۇرا جۇڭگو (خۇاجۇڭ) پېداگوكىكا ئۇنىۋېرسىتېتى، شەنشى پېداگوكىكا ئۇنىۋېرسىتېتى، شىنەن پېداگوكىكا ئۇنىۋېرسىتېتى(ھازىرقى ئىسمى شىنەن ئۇنىۋېرسىتېتى)، شەرقىي شىمال پېداگوكىكا ئۇنىۋېرسىتېتى(2006 - يىلى ئىمىتىھانغا قاتناشقاندا مۇشۇ ئۇنىۋېرسىتېتلارلا بار ئىدى، ھازىر كۆپەيدىمۇ يوق بىلمەيمەن) قاتارلىق ئۇنىۋېرسىتېتلارغا قوبۇل قىلىنغان ئوقۇغۇچىلار ئالىي مەكتەپنىمۇ ھەقسىز ئوقۇش پۇرسىتىدىن بەھرىمەن بولىدۇ. ئەمما بۇ يەردىمۇ بىر خاتالىق سادىر قىلىش مەسىلىسى مەۋجۇت، بولۇپمۇ بۇ بىرقەدەر يۇقىرى بولغان خاتالىق سادىر قىلىش نۇقتىسى. بىز ھەممىمىز ھەقسىز دېسە ئەلۋەتتە بۇنداق شارائىتنى قولدىن بېرىشنى خالىمايمىز. يۇقىرىقى مەكتەپلەرنىڭ ئالىدىغان سانى چەكلىك، مەن ئىمتىھان بەرگەندە يۇقىرىقى ئالتە مەكتەپكە بىز پۈتۈن شىنجاڭ تولۇق ئوتتۇرا سىنىپىدىن 2006 - يىلى دۆلەتلىك بىرتۇتاش ئىمتىھانغا قاتناشقان 1500 گە يېقىن ئوقۇغۇچىغا بېرىلگەن سان ئاران 100 نەپەر ئىدى (ھازىر قانچە ئىكەنلىكى ماڭا نامەلۇم، لېكىن بىر نۇقتا ماڭا مەلۇم، يەنى بۇ يىل دۆلەتلىك بىرتۇتاش ئىمتىھانغا قاتنىشىدىغان شىنجاڭ تولۇق ئوتتۇرا سىنىپىنىڭ ئوقۇغۇچىلىرى 4000 غا يېتىدۇ)، شۇڭا بۇ سانغا كىرىشتە رىقابەت بەك كۈچلۈك، بۇ سانغا كىرىش ئۈچۈن سىز دەرستە ياخشى بولۇپ، دۆلەتلىك بىرتۇتاش ئىمتىھاندىن ياخشى نومۇر ئالسىڭىزلا بۇ سانغا كىرەلەيسىز. شۇڭا بۇ ساننى مەيلى نامرات بولسۇن ياكى باي بولسۇن تالىشىدىغانلار ناھايىتى كۆپ، چۈنكى بۇ سانغا كىرگەنلا ئادەم 4 يىللىق ئالىي مەكتەپ ھاياتىنى بىر پۇڭ تاپشۇرماي، ئەكسىچە مەكتەپنىڭ ھەر ئايلىق تارقاتقان تۇرمۇش پۇلى(ئىلگىرى ئۇقۇشۇمچە بېيجىڭ پېداگوكىكا ئۇنىۋېرسىتېتىنىڭ ئوقۇغۇچىلارغا تارقىتىدىغان تۇرمۇش پۇلى ھەر ئايلىقى 478 يۈەن ئىكەنلىكىنى بىلگەن ئىدىم، ھازىر قانچە ئىكەنلىكىنى بىلەيمەن) بىلەن خاتىرجەم ئۆتكۈزىدۇ. بۇ يەردە بەزى ئائىلە شارائىتى ياخشى بولغان ئوقۇغۇچىلار دەرستە ياخشى بولسا قورقمايلا بۇ سانغا كىرىشكە ئىنتىلىدۇ. ئەمما مەسىلە ئاشۇ ئائىلە شارائىتى ناچار ئوقۇغۇچىلاردا، ئۇلار بەلكىم دەرستە ئانچە ياخشى بولماي قېلىشى ياكى ئۆزىگە تولۇق ئىشەنچ قىلالماسلىق سەۋەبلىك مەكتەپ ئوقۇش پۇلىدىن ئەنسىرەپ، مەجبۇرىي ھالدا ئۆز قىزىقىشىنى تاشلاپ، يۇقىرىقى مەكتەپلەردىكى ئوقۇتقۇچىلىق كەسىپنى تاللىشى مۇمكىن (بۇ دەل مېنىڭ ئەينى ۋاقىتتا سادىر قىلغان ئۆمرۈمدىكى ئەڭ چوڭ خاتالىقىم)، بىراق مەجبۇرى تاللىغانلىق سەۋەبىدىن، بىرى شاللىنىپ كېتىش مەسىلىسى كېلىپ چىقىشى مۇمكىن، يەنە بىرى شاللانمىغان تەقدىردىمۇ ئالىي مەكتەپتە ياخشى نەتىجىلەرنى قولغا كەلتۈرۈشى قىيىنچىلىققا دۇچ كېلىشى مۇمكىن. شۇڭا گەپنى يىغىپ ئېيتساق، سىز ھەرگىزمۇ ئالىي مەكتەپ ئوقۇش پۇلىدىن ئارتۇقچە ئەنسىرەپ كەتمەڭ. ھازىر دۆلىتىمىزنىڭ سىياسىتى ياخشى، مەيلى سىز يۇقىرىقى ئالتە مەكتەپتىن باشقا مەكتەپلەرگە ئۆتۈڭ، يەنىلا مەكتەپلەرنىڭ سىزگە تەمىنلەپ بەرگەن ھەرخىل ياردەم پۇلىدىن بەھرىمەن بولالايسىز. ئەلۋەتتە بۇ سىزنى ئاشۇ ياردەم پۇلىدىن بەھرىمەن بولۇش پۇرسىتىنى چىڭ تۇتۇش - تۇتالماسلىقىڭىزغا باغلىق. چۈنكى ئالىي مەكتەپلەرنىڭ ئوقۇغۇچىلارغا تەمىنلەيدىغان ياردەم پۇلى مەيلى سىز بەھرىمەن بولۇڭ ياكى بولالماڭ يەنىلا ئوخشاش ئېلىپ بېرىلىۋېرىدۇ (بۇ يەردە ئالاھىدە تەكىتلەيدىغىنىم، سىز ئالىي مەكتەپكە چىققان بىرىنچى يىلىدىن پايدىلىنىپ «ئالىي مەكتەپتە زادى نېمە ئۆگىنىش كېرەك؟ (读大学究竟读什么)» دېگەن كىتابنى تولۇق ئوقۇپ چىقىشىڭىزنى ئالاھىدە تەۋسىيە قىلىمەن، ئەگەر خەنزۇچىنى ئوقۇمايتىم دېسىڭىز، بۇ كىتابنى بىزنىڭ ئەلسۆي تەرجىمە گۇرۇپپىسى تەرجىمە قىلىپ ئىلقۇت بلوگىدا تارقىتىۋاتىدۇ، شۇنى كۆرسىڭىزمۇ بولىدۇ، يەنە بىر تەۋسىيە قىلىدىغان ماتېرىيال دوكتۇر لى كەيفۇنىڭ «جۇڭگولۇق ئوقۇغۇچىلارغا يېزىلغان خەت (写给中国学生的信)» نى چوقۇم ئوقۇپ چىقىشىڭىزنى ئالاھىدە تەۋسىيە قىلىمەن، بۇ ماتېرىيال جەمئىي 7 پارچە، ھەجىم جەھەتتىن ئىككى يۈز بەتلىك كىتابتىن قېلىشمايدۇ، بۇ ماتېرىيالنىمۇ ئەلسۆي تەرجىمە گۇرۇپپىسى ئاللىبۇرۇن تەرجىمە قىلىپ توردا تارقاتتى ھەم ئېلكىتابىنىمۇ تارقاتتى، ئىلقۇت بلوگىدىن مەزكۇر تەرجىمە ماتىرىياللىرىنى تاپالايسىز — قايتا تولۇقلاندى _ (ي.م.ئىلقۇت). سىز بەھرىمەن بولۇش پۇرسىتىنى قولدىن بېرىپ قويسىڭىز باشقىلار سىزنىڭ ئورنىڭىزدا ئۇنىڭدىن بەھرىمەن بولىدۇ. شۇڭا بۇنداق شارائىتتىن قانداق پايدىلىنىش ئۆزىڭىزگە باغلىق.       شۇڭا يەنە بىر قېتىم تەكىتلەيدىغىنىم، ھەرگىزمۇ پۇلنىڭ كۆزىگە بەك قاراپ كەتمەي، ئۆزىڭىز ياخشى كۆرگەن مەكتەپنىڭ ئۆزىنىڭ قىزىققان كەسپىنى خاتىرجەم تاللىشىڭىزنى تەۋسىيە قىلىمەن. ھەرگىز ئالىي مەكتەپكە چىقىپ بولۇپ پۇشايمان قىلماسلىقىڭىزغا تىلەكداشمەن. (2)       ئىچكىرىدىكى شىنجاڭ تولۇق ئوتتۇرا سىنىپىدا ئوقۇۋاتقان ئوقۇغۇچىلار تولۇق ئوتتۇرىنى پۈتتۈرۈپ ئالىي مەكتەپكە چىققاندىن كېيىن يۈز بېرىدىغان بىرقانچە مەسىلە:       1. تەرتىپسىزلىك ھالىتى ئېغىر. تولۇق ئوتتۇرىدا مەكتەپتە ئوقۇغۇچىلارغا بولغان باشقۇرۇش چىڭ بولغانلىقتىن، ئوقۇغۇچىلار ئاساسەن ئەركىن پائالىيەت ئېلىپ بارالمايدۇ، يەنى تولۇق ئوتتۇرىدا ئوقۇغۇچىلارنىڭ پائالىيەت چەمبىرىكى مۇنداق بىر ئۈچبۇلۇڭ، يەنى ياتاق ــــــ ئاشخانا ــــــ سىنىپتىن ئىبارەت ئۈچبۇلۇڭنى ھاسىل قىلغان بولۇپ، ئوقۇغۇچىلارنىڭ شۇغۇللىنىدىغىنى پەقەت ئەتىگىنى ئەتىگەن (ئادەتتە نورمال ئەھۋالدا مەكتەپنىڭ ۋاقىت تەرتىپى ئەتىگەن سائەت 5:30 ياكى 6:00) دە ئورنىدىن تۇرۇپ ئەتىگەنلىك گېمناستىكىغا قاتنىشىش، ئاندىن كېيىن ئاشخانىغا كىرىپ ئەتىگەنلىك تاماق يېيىش، ئاندىن كېيىن ئۇدۇللا سىنىپقا چېپىشتىن ئىبارەت. دىققەت بۇ يەردە گەرچە مەكتەپنىڭ ۋاقىت تەرتىپى سائەت 5:30 ياكى 6:00 بولسىمۇ، لېكىن ئادەتتە ئوقۇغۇچىلارنىڭ كۆپ ساندىكىلىرى سائەت 5:00 تىن باشلاپ، بەزىلىرى ھەتتا سائەت 4:00 تىن باشلاپ ئورنىدىن تۇرۇپ كېتىش ئەھۋاللىرى بىرقەدەر ئومۇملىشىپ كەتكەن. نېمە ئۈچۈن بۇنداق بولىدۇ؟ چۈنكى بىرىنچىدىن، ئوقۇغۇچىلارنىڭ تاپشۇرۇقى كۆپ، ئالدىنقى ئاخشىمى ئىشلەپ بۇلالمىغان تاپشۇرۇقلارنى ئەتىسى ئەتىگەن ئورنىدىن تۇرۇپ تولۇقلاپ ئىشلىمىسە بولمايدۇ. ئىككىنچىدىن، ئوقۇغۇچىلار يادىلاشقا تېگىشلىك مەزمۇنلار كۆپ، شۇڭا ئەتىگەن تۇرۇپ يادىلىمىسا بولمايدۇ. مۇشۇنداق قىلىپ ئەتىگەنلىك دەرس باشلانغان بولۇپ، چۈشلۈكى ئادەتتىكى ئەھۋالدا مەكتەپنىڭ ۋاقىت تەرتىپى 2 سائەت دەم ئېلىش بولسىمۇ، لېكىن سىز كۆزىتىدىغان بولسىڭىز ئوقۇغۇچىلارنىڭ يەنىلا ئامال بار يېرىم سائەتتە تامىقىنى يەپ بولۇپ، ھەممىسىنىڭ دېگۈدەك سىنىپقا كىرىپ رەتلىك ئولتۇرۇپ تاپشۇرۇق ئىشلەۋاتقانلىقىنى كۆرىسىز. كەچلىكىمۇ ئاساسەن مەكتەپنىڭ ۋاقىت تەرتىپى بويىچە 2 سائەت دەم ئېلىش بولسىمۇ، لېكىن سىز يەنىلا ئوقۇغۇچىلارنىڭ پەقەت يېرىم سائەت ۋاقىت سەرپ قىلىپ تاماق يەپ بولۇپ بىردەك سىنىپقا كىرىپ تاپشۇرۇق ئىشلەۋاتقانلىقىنى ياكى مەيداندا كىتاب يادىلاۋاتقانلىقىنى كۆرەلەيسىز (يۇقىرىقى ۋاقىت تەرتىپى بەلكىم ھەرقايسى شىنجاڭ تولۇق ئوتتۇرا سىنىپىنى ئاچقان ئۆلكە ۋە شەھەرلەرنىڭ ئوخشاش بولماسلىقىغا قاراپ ئوخشاش بولماسلىقى مۇمكىن، مەن پەقەت ئۆزۈم ئوقۇغان جياڭسۇ ئۆلكىسىنىڭ ۋۇشى شەھىرىدىكى مەكتەپنى مېسال قىلىپ سۆزلىدىم، شۇڭا چوقۇم يۇقىرىقىدەك بولىدۇ، دېگەن گەپ ئەمەس، لېكىن شۇنداق چىڭ بولىدىغانلىقى ئېنىق، پەقەت ۋاقىت ئالدى كېيىنلىك تەرتىپى ئوخشىماسلىقى مۇمكىن).       مۇنداقچە قىلىپ مەزمۇننى يىغىنچاقلىساق، ئوقۇغۇچىلارنىڭ بىر كۈنلۈك پائالىيىتى تۆۋەندىكىچە بولىدۇ: ئەتىگەن سائەت 5:30 ياكى 6:00 دە ئورنىدىن تۇرۇپ ئەتىگەنلىك گېمناستىكىغا چىقىش، يېرىم سائەتتىن بىر سائەتكىچە ۋاقىت سەرپ قىلىپ تامىقىنى يەپ بولۇش (دىققەت، ئاشخانىنىڭ ۋاقىت بەلگىلىمىسى بولغاچقا تاماقنى ۋاقتىدا يەپ بولالمىسڭىز ئاشخانا تاقىلىدۇ، بۇنىڭ بىلەن چۈش بولغىچە ئاچ قالىسىز)، ئەتىگەن سائەت 6 يېرىمدا سىنىپقا چىقىپ بولۇش، چۈشتە سائەت 11 يېرىم ياكى 12 دە دەرستىن چۈشۈپ، يەنە يېرىم سائەت ياكى 1 سائەت ئىچىدە تاماق يەپ بولۇش، چۈشتە سائەت 1:00 ياكى 1:30 دا سىنىپقا كىرىپ بولۇش، چۈشتىن كېيىن سائەت 5:00 ياكى 5:30 دا تاماققا چىقىش ۋە يەنىلا يېرىم سائەت ياكى 1 سائەتتە تاماق يەپ بولۇش، كەچ سائەت 6:30 دا سىنىپقا كىرىپ كەچلىك مۇزاكىرىگە قاتنىشىش، سائەت 9:30 دا ياكى 10:00دا كەچلىك مۇزاكىرىدىن چۈشۈپ ياتاققا قايتىپ ئۇخلاش (بۇ ۋاقىتتا كۆپ ئوقۇغۇچىلارنىڭ يەنىلا ياتاقتا ئالدىراش تاپشۇرۇق ئىشلەش ئەھۋالى ئېغىر) بولىدۇ (بۇ مەزمۇنلار پەقەت شىنجاڭدىكىلەرنى ئىچكىرىدىكى شىنجاڭ تولۇق ئوتتۇرا سىنىپىدا ئوقۇۋاتقان ئوقۇغۇچىلارنىڭ ئەھۋالىدىن ئاز - تۇلا خەۋەردار قىلىش مەقسىتىدە يوللاندى، باشقىچە چۈشەنمەسلىكىڭىزنى تەۋسىيە قىلىمەن)، يەنى يۇقىرىدا ئېيتقان ياتاق ــــــ ئاشخانا ــــــ سىنىپتىن ئىبارەت ئۈچبۇلۇڭ مۇشۇنداق ھاسىل بولغان بولۇپ، ئوقۇغۇچىلارنىڭ ئاساسەن ئەركىن پائالىيەت ۋاقتى يوق دېيەرلىك.       شۇڭا يۇقىرىقى چۈشەندۇرۇشتىن تولۇق ئوتتۇرىدا ئوقۇغۇچىلارنى مەكتەپ ھەقىقەتەنمۇ چىڭ تۇتىدىغانلىقىنى بىلىۋالغىلى بولىدۇ.       ئوقۇغۇچىلار پەقەت ياتاق ــــــ ئاشخانا ــــــ سىنىپتىن ئىبارەت ئۈچبۇلۇڭنى مەركەز قىلىپ كۈن ئۆتكۈزىدىغان بولغاچقا تولۇق ئوتتۇرا ھاياتى ناھايىتى ئالدىراش ھەم بېسىم بىلەن ئۆتىدۇ. ئەمما بۇ ئوقۇغۇچىلار ئالىي مەكتەپكە چىققان ھامان ئالىي مەكتەپنىڭ بىردىنلا بوش ئىكەنلىكىنى ھېس قىلىپ ئۆزىنى قويۇۋېتىشى، شۇ قۇيىۋەتكەنچە ئۆزىنى تۇتۇۋالالماي دەرستە يېتىشەلمەسلىكى مۇمكىن. شۇڭا ئالىي مەكتەپ ئوقۇغۇچىلارنىڭ ئۆزىنى كونترول قىلىش ئىقتىدارىنىڭ ناھايىتى يۇقىرى بولۇشىنى تەلەپ قىلىدۇ.       2. ئالىي مەكتەپتە ئۆزىنى ئۆلتۈرىۋېلىش ئەھۋاللىرى ئېغىر (بۇ خىل ئەھۋال ھازىرغىچە تېخى شىنجاڭلىق ئوقۇغۇچىلاردا كۈرۈلگىنىنى ئاڭلاپ باقمىدىم، لېكىن ئىچكىرىدىكى ئوقۇغۇچىلاردا دائىم مۇشۇنداق ئەھۋاللار يۈز بېرىدۇ. ھەتتا مەن ئالىي مەكتەپكە يېڭى چىققاندا سىياسەت دەرسى ۋاقتىدا مۇئەللىمنىڭ مۇنداق سۆزىنى ئاڭلاپ ھەيران قالغانمەن: «ئاخشام ئولتۇرسام بىر ساۋاقداش: <مۇئەللىم، سىنىپىمىزدا بىر ئوقۇغۇچى بىنادىن سەكرەپ ئۆزىنى ئۆلتۈرۈۋالدى.> دەيدۇ، مەن ئۇنىڭغا <بۇ ناھايىتى نورمال ئەھۋال> دەپ جاۋاب بەردىم. سىلەرگە دېسەم، بىزنىڭ بۇ مەكتەپتە 30 مىڭغا يېقىن ئوقۇغۇچى ياشايدۇ، بۇنداق كۆپ ئادەمدىن بىر كۈندە بىرەر ئادەمنىڭ ئۆلۈپ كېتىشى نورمال ئىش.» مەن بۇنى ئاڭلاپ ناھايىتى ھەيران قالغان ئىدىم. ئەمەلىيەتتە مۇئەللىم تىلغا ئالغان ئوقۇغۇچى بىزنىڭ ياتاق بىناغا قوشنا بىنادىن سەكرەپ ئۆلۈۋاپتىكەن، بىز بۇنى بىلمەي ئۆتۈپتۇق. شۇڭا ئالىي مەكتەپتە ئۆزىنى ئۆلتۈرۈۋېلىش ئەھۋالى يەنىلا مەۋجۇت. بۇنىڭ ئاساسلىق سەۋەبى: تولۇق ئوتتۇرا ھاياتى ناھايىتى ئالدىراش ھەم بېسىم بىلەن ئۆتكەن ئوقۇغۇچىلار ئالىي مەكتەپكە چىققان ھامان ئالىي مەكتەپنىڭ بىردىنلا بوش ئىكەنلىكىنى ھېس قىلىپ ئۆزىنى قويۇۋېتىشى، شۇ قۇيۇۋەتكەنچە ئۆزىنى تۇتۇۋالالماي دەرستە يېتىشەلمەسلىكى سەۋەبىدىن بولىدۇ. شۇڭا پەرزەنتىڭىزنىڭ بۇنداق ئەھۋالغا دۇچ كېلىشنىڭ ئالدىنى ئېلىشڭىز كېرەك.       3. ئىشلار ئۆزى ئويلىغاندەك بولماسلىق. ئوقۇغۇچىلار بەلكىم ئارزۇ تاللىغاندا بەزى كەسىپلەرنىڭ ئىسمىنى كۆرۈپلا بىر قېتىملىق قىزىقىش بىلەن كۆپ ئويلانمايلا تاللاپ قويۇپ، ئالىي مەكتەپكە چىققاندا بولسا تاللىغان كەسپىنىڭ ئۆزى ئويلىغاندەك ئەمەسلىكىنى بايقاپ، ئۆزىنىڭ ئارزۇنى خاتا تاللاپ قويغانلىقىدىن گۇمانلىنىپ، ئۆگىنىشكە ئۆزىنى قاراتماي، مىڭ تەستە كەلگەن پۇرسەتنى قولدىن بېرىپ قويۇشى مۇمكىن. بۇ يەردە كەسىپ ئىسمى بىلەن ئۆگەنگەن دەرس ماس بولماسلىق دېگىنىمىز، ئالىي مەكتەپلەرنىڭ خاراكتېرى ئوخشاش بولمايدۇ. بەزى مەكتەپلەر تەبىئىي پەننى ئاساس قىلغان بولىدۇ، بەزى مەكتەپلەر ئىجتىمائىي پەننى ئاساس قىلغان بولىدۇ ھەمدە بۇ مەكتەپلەردە بەزى كەسىپلەرنىڭ ئىسمى ئوخشاش بولسىمۇ، لېكىن تەرەققىيات يۆنىلىشى ئوخشاش بولمايدۇ. مەسىلەن، بەزى ئىجتىمائىي پەننى ئاساس قىلغان مەكتەپلەرمۇ كومپيۇتېرغا ئائىت بولغان ئۇچۇر تېخنىكىسى كەسپىنى ئاچقان بولۇپ، بۇ كەسىپلەرنى باشقا تەبىئىي پەننى ئاساس قىلغان مەكتەپلەرمۇ ئاچقان بولىدۇ، ئەمما بۇ ئىككى خىل خاراكتېردىكى مەكتەپلەرنىڭ ئۆتىدىغان دەرسلىكىنىڭ سالمىقى ئوخشىمايدۇ. شۇڭا ھەرگىزمۇ كەسىپنىڭ ئىسمىغا قاراپلا يېنىكلىك بىلەن كەسىپ تاللاشتىن ساقلىنىش كېرەك.       مەسىلەن، سىز تور ئىزدەش موتورىدىن «ئۇچۇر باشقۇرۇش ۋە ئۇچۇر سېستىمىسى (信息管理与信息系统)» دەپ ئىزدىسىڭىز بۇ كەسىپنى بەزى مەكتەپلەر تەبىئىي پەننى ئاساس قىلغان فاكۇلتېتلاردا ئاچقان بولسا، بىزنىڭ مەكتەپكە ئوخشاش مەكتەپلەر بولسا ئىجتىمائىي پەننى ئاساس قىلغان فاكۇلتېتدا تەسىس قىلغان (بىزنىڭ مەكتەپتە بۇ كەسىپ باشقۇرۇش فاكۇلتېتىدا)، بۇ ئىككى خىل خاراكتېردىكى فاكۇلتېتتا ئۆتۈلىدىغان دەرس ۋە فاكۇلتېتنىڭ تەلىپى ئوخشاش بولمايدۇ. شۇڭا ئەمەلىيەتنى ئاساس قىلغان ھالدا ئىش كۆرۈڭ. (3) ئەسسالام كەڭ تورداشلار،       مەن بۇ يازمىنى ئالدىنقى قېتىم ئىككى پارچە يازغان ئىدى، لېكىن يېزىپ بولۇپ دىيارىم تورى، سەلكىن تورى قاتارلىق توردا ئىلان قىلغاندىن كېيىن كۆپ ساندىكى تورداشلار مەزكۇر يازمىنىڭ ئاساسىي مەقسىتىنى خاتا چۈشۈنىۋالغان چېغى، سەل قالايمىقان ئىنكاس قالدۇرۇپتىكەن، شۇڭا مەن بۇ يازمىنى قايتا داۋاملاشتۇرۇشتىن يالتىيىپ قالغان ئىدىم. لېكىن ئىلقۇت بلوگىدا بەزى تورداشلار ئالاھىدە تەلەپ قىلىپ تۇرۇۋالغان بولغاچقا يەنە قايتا يېزىشقا مەجبۇر بولۇپ قالدىم.       مەن ئالدىنقى قېتىم بۇ يازمىنى يېزىپ بولۇپ، دىيارىمدىكى ئاشۇ تورداشلارنىڭ ئىنكاسىنى كۆرگەندىن كىيىن ئۆزۈمگە «قانداق قىلىمەن، بۇنداق چۈشەنمىگەن خەقكە ۋاقتىمنى ئىسراپ قىلىپ مۇشۇنداق ئۇچۇرلار بىلەن تەمىنلەپ» دەپ ئويلاپ، كېيىن قايتا يازماسلىق قارارىغا كەلگەن ۋە شۇنىڭدىن كېيىن ئۇزۇندىن بۇيان ئارزۇ قىلىپ كېلىۋاتقان، ئەمما يازالمىغان ئۆزۈمنىڭ تۇنجى ئەسىرى «ھايات چاقچىقى» ناملىق ئەسەرنى يېزىشقا كىرىشىپ كەتكەن ئىدىم، ھازىر ئالدىراش شۇنى يېزىۋاتىمەن، ئىلگىرى مۇۋاپىق تېما تاپالمىغان بولغاچقا قەلەم باشلىيالمىغان ئىدىم، بۇ مېنىڭ تۇنجى ئەدەبىي ئەسىرىم بولۇپ قالىدۇ. ئاللاھ خالىسا بۇ ئەسەر پاتئارىدا تورداشلار بىلەن يۈز كۆرۈشكۈسى. شۇڭا يېقىندىن بېرى بەك ئالدىراش بولۇپ كەتتىم. بۈگۈن دەرستىن چۈشۈپ ئىلقۇت بلوگىغا قارىسام كارۋان ئىسىملىك بىر تورداش مېنىڭ مۇشۇ يازمىنى داۋاملاشتۇرۇپ ئاشۇ نىشانى غۇۋا بولغان ئوقۇغۇچىلار ئۈچۈن يول كۆرسىتىشىم ھەققىدە تەلەپ قىلىپ ئىنكاس قالدۇرۇپتۇ. ئەمەلىيەتتىغۇ مېنىڭ ئۇنچە يۇقىرى قابىلىيىتىممۇ يوق، پەقەت ئۆزۈم 7 يىلدىن بىرى ئىچكىرىدە ئوقۇش جەريانىدا كۆرگەن - ئاڭلىغانلىرىم ۋە ئويلىغانلىرىمنى سۆزلەپ بېرەلەيمەن خالاس، شۇڭا تورداشلارنىڭ قىزىقساڭلار كۆرۈپ، قىزىقمىساڭلار دىققەت ئېتىبارىڭلارنى بۇ يەرگە مەركەزلەشتۈرۈپ ۋاقتىڭلارنى ئىسراپ قىلىپ ئولتۇرماسلىقىڭلارنى ۋە قالايمىقان پىكىر قىلماسلىقىڭلارنى ئۈمىد قىلىمەن.       كارۋان ئەپەندىگە:       ئىنكاسىڭىزنى كۆرۈپ خېلى روھلىنىپ قالدىم، مەن سىزنى قانداقسىگە ئۇنتۇپ قالاي، ھېلىمۇ ئىسىمدە.       بىراق يازما ئىشىغا كەلسەك، ھازىر مېنىڭچە بۇ يازمىنى يېزىش ۋاقتى ئۆتۈپ كەتتىغۇ دەيمەن. ئىچكىرىدىكى بالىلار ئاساسەن ئارزۇ تاللاش نىشانىنى بەلگىلەپ بولدىغۇ دەيمەن. بولىدۇ مەن ئازراق ئۇچۇر بىلەن تەمىنلەي، لېكىن بۇ ئۇچۇرلار ئاللىبۇرۇن قىممىتىنى يوقاتقان بولۇشى ياكى كېلەر يىلى ئىمتىھان بېرىدىغان ئوقۇغۇچىلار ئۈچۈن قىممىتى بولۇپ قالار، ئەسلى مەن شۇنداق بىر يازما ئارقىلىق ئاشۇ نىشانى ئېنىق بولمىغان ئوقۇغۇچىلار ئۈچۈن ئازراق بولسىمۇ نىشانىنى ئايدىڭلاشتۇرۇۋېلىشى ئۈچۈن ئاز - تولا ئىش قىلىپ بېرەي دېگەن، لېكىن مەزكۇر يازمامنى دىيارىم تورىدا ئېلان قىلغاندىن كېيىن بەزى كىشىلەرنىڭ يازما مەزمۇنىنى خاتا چۈشىنىۋالغانلىقىنى كۆرۈپ چىقىرىۋەتكەن ۋە يېزىشتىن يالتىيىپ قالغان ئىدىم.       شۇنىڭدىن كېيىن بىر ئەسەر يېزىشقا تۇتۇش قىلىپ قالغان ئىدىم، ھازىر ئالدىراش شۇ ئەسەرنى يېزىش بىلەن بەند بولۇپ كەتتىم.       مەن شۇنداق بولسىمۇ ئۈمىدىڭىزنى يەردە قويماي، ئازراق يازما بىلەن تەمىنلەي، بەلكىم، ئانچە قىممىتى بولماسلىقى مۇمكىن، ئەگەر تېخىمۇ كۆپ ئۇچۇرغا ئىگە بولىمەن دېسىڭىز مېنىڭ ئېلخېتىمگە خەت قالدۇرۇڭ، مەن سىزگە تېلېفون نومۇرىمنى دەپ بېرەي، شۇ چاغدا تېلېفون قىلىسىڭىز مەن ئۆزۈم بىلىدىغان بارلىق ئۇچۇرلارنى سىزگە ئايرىم سۆزلەپ بېرەي.       ئېلخەت: ilqut@qq.com (دىققەت، مەزكۇر يازما بۇنىڭدىن بىر يىل بۇرۇن يېزىلغان، ھازىر ئەسلى ھالىتىنى ساقلاپ قېلىش ئۈچۈن بۇ مەزمۇننىمۇ قىستۇرۇپ قويدۇم—ي.م.ئىلقۇت)       ئالدىنقى قېتىم دېگىنىمدەك، ئارزۇ تولدۇرۇشتا ھەرگىزمۇ كەسىپنىڭ ئىسمىغا ئالدىنىپ ئۆمۈرلۈك پۇشايمانغا قالىدىغان ئىش قىلماڭ. بۇ ھەقتە ئالدىنقى قېتىم خېلى تەپسىلىي توختالغان، بۇ يەردە قايتا تەكرارلانمايدۇ.       تۆۋەندە توختالماقچى بولغىنىم:       ئەڭ مۇھىم بولغان نۇقتا ئوقۇش پۇلى ھەققىدە توختىلىمىز. ھەممىمىزگە ئايان گەرچە تولۇق ئوتتۇرا (ئىچكىرى شىنجاڭ سىنىپى) نى ھەقسىز (ئەلۋەتتە، ئاز بىر قىسىم ئائىلە ئەھۋالى ياخشىراق ساۋاقداشلار ئازران ھەق تۆلەيدۇ) ئوقۇغان بولساقمۇ، لېكىن ئالىي مەكتەپ ئۇنداق ئەمەس، ئالىي مەكتەپ ئۈچۈن ئوقۇش پۇلى تاپشۇرۇشىمىزغا توغرا كېلىدۇ ھەم بۇ ھەق بىزدەك ئاشۇ نامراق ئوقۇغۇچىلار ئۈچۈن ئاسان ئىش ئەمەس ھەم ئەڭ باش ئاغرىتىدىغان ئىش. بىراق سىز ئوقۇش پۇلىنىڭ ئىشىنى ئاڭلاپلا خۇدىڭىزنى يۇقىتىپ قويماڭ، ئۈمىدۋار بولۇڭ.       سىزگە بىر ئۇچۇرنى سۆزلەپ بېرەي، ئىچكىرىدىكى ئالىي مەكتەپلەرنىڭ شىنجاڭ تەۋەسىدىكى مەكتەپلەردىن پەرقلىنىدىغان ئەڭ چوڭ بىر ئالاھىدىلىكى ئۇلار ھەرگىزمۇ شىنجاڭ تەۋەسىدىكى (ئاشۇ ئانا دىيارىمىزدىكى) مەكتەپلەردەك پۇل تاپشۇرۇشنى سۈيلىگەن ۋاقىتتا ئەگەر ۋاقتىنچە تاپشۇرالمايمەن دېسىڭىز «ئۇنداق بولسا بېرىپ پادىڭىزنى بېقىڭ، بۇ يەر دېگەن پۇلى بارلار ئوقۇيدىغان جاي» دەپ دەككىڭىزنى بەرمەيدۇ. مەن شىنجاڭدىكى بىر نەچچە ساۋاقداشلىرىمدىن ۋە باشقا دوستلىرىمدىن ئاڭلىغان. شىنجاڭ تەۋەسىدىكى ئالىي مەكتەپلەرگە ئەگەر ھال ئېيتىپ ئائىلە ئىقتىسادىم ياخشى ئەمەس ئىدى، دېسىڭىز ئاڭلايدىغىنىڭىز يۇقىرىقىدەك سۆزلەر، «پۇلىڭىز بولسا ئوقۇڭ، پۇلىڭىز بولمىسا يولىڭىزغا راۋان بولۇڭ، بۇ يەر دېگەن پۇلى بارلار ئوقۇيدىغان جاي، سىزگە خەير - خاھلىق قىلىدىغان ساخاۋەت ئورنى ئەمەس»، «پۇل تاپشۇرالمىسىڭىز بېرىپ ئانىڭىزنىڭ ئۇچىقىغا ئوت قالاڭ، بۇ يەردە سىزگە ھېچ نەرسە يوق»…       قاراڭ، ئۇلارنىڭ (ئاشۇ بىزنىڭ ئەزىز دىيارىمىزدىكىلەرنىڭ) سىزگە قىلغان «چىرايلىق» سۆزلىرىنى؟ بۇنىڭغا نېمە دېگۈلۈك؟ ئەلۋەتتە دەردىڭىزنى ئىچىڭىزگە يۈتۈپ يولىڭىزغا راۋان بولىسىز شۇ.       لېكىن مەن سىزگە دېسەم، ئەگەر سىز ئىچكىرىدىكى ئالىي مەكتەپلەردە تۇرمۇش يېتەكچى ئوقۇتقۇچىڭىز ياكى سىنىپ مەسئۇلىڭىزغا «ئائىلە ئەھۋالىم ياخشى ئەمەس ئىدى» دەپ مۇۋاپىق ئىسپات كۆرسەتسىڭىز ھەم سەۋەبىڭىز پۇت دەسسەپ تۇرالىسا، ئۇلار سىزگە ھەرگىز ئاۋۇ قېرىنداشلىرىمىزدەك «چىرايلىق» سۆز قىلماستىن، بەلكى «بولىدۇ، ھازىرچە خاتىرجەم بولۇپ دەرسىڭىزنى ياخشى ئوقۇڭ، ئارتۇقچە ئويلىنىپ كەتمەڭ، چوقۇم ھەل بولىدۇ»، «ئۇنداقتا مەكتەپ بىلەن ئالاقىلىشىپ سىزگە ئۆسۈمسىز قەرز بېجىرىپ بېرەيلى، سىز ھەرگىز كۆڭلىڭىزنى يېرىم قىلماڭ»، «سىز بىر ئىلىتماس تەييارلاڭ، مەن سىزگە ياردەم پۇلى ھەل قىلىشقا تىرىشىپ باقاي، لېكىن سىز ھەرگىز ئارتۇقچە ئويلىنىپ ئوقۇشىڭىزغا تەسىر يەتكۈزمەڭ»، « ھېچقىسى يوق، سىز ئاۋۋال باشقا ئىشلارنى ئويلىماي، دەرسىڭىزنى ياخشى ئوقۇڭ، مەكتەپ سىزنى پۇل تاپشۇرمىدىڭ دەپ ھەيدىۋەتمەيدۇ» دەپ سىزگە قانداق قىلىش ھەققىدە ئېنىق يول كۆرسىتىدۇ.       شۇڭا سىزگە ئالاھىدە ئەسكەرتىدىغىنىم، ھەرگىزمۇ پۇلنىڭ كۆزىگە قاراپ، ئۆمۈرلۈك پۇشايمانغا قالىدىغان ئىشنى قىلماڭ. ئەگەر قىلىشنى خالىسىڭىز ئالىي مەكتەپلەردە دەرسىڭىزگە دەخلىي يەتكۈزمىگەن ئاساستا قىلىدىغان ھەرخىل پۇل تېپىش پۇرسىتى كۆپ. مەكتەپلەر مەخسۇس قىيىنچىلىقى بار ئوقۇغۇچىلار ئۈچۈن تەمىنلىگەن پۇل تېپىش پۇرسىتى بىلەن تەمىنلەيدۇ، سىز مۇشۇلار ئارقىلىق ئۆزىڭىزنىڭ تۇرمۇش پۇلىڭىزنى تامامەن ھەل قىلالايسىز، ئەلۋەتتە بۇلار سىزنىڭ دەرسىڭىزگە دەخلى يەتكۈزمىگەن ئاساستا بولىدۇ. شۇڭا سىز ئارزۇنى ئۆزىڭىزنىڭ قىزىقىشى بويىچە خاتىرجەم تاللاۋېرىڭ، ھەرگىز پۇلنىڭ كۆزىگە قاراپ قالماڭ، بۇنى پەقەت سىز تىرىشسىڭىزلا ھەل قىلىپ كېتەلەيسىز.       يازمىنى مۇشۇنچىلىك يازاي، يۇقىرىدا ئېيتقاندەك، مەن يېقىندا بەك ئالدىراش بولۇپ كەتتىم، ئەگەر تېخىمۇ تەپسىلى ئۇچۇرغا ئىگە بولاتتىم دېسىڭىز ئېلخەتكە خەت قالدۇرۇڭ، مەن تېلېفون نومۇرۇمنى ئېيتىپ بەرسەم تېلېفون قىلسىڭىز بولىدۇ. مەن ھەر ۋاقىت سىز ئۈچۈن ئەتراپلىق مۇلازىمەت قىلىشقا تەييار، چۈنكى مەن ئەينى ۋاقىتتا يول كۆرسىتىدىغان كىشىلەرنىڭ بولماسلىقى بىلەن چوڭ خاتالىقلارنى سادىر قىلغان، بۇ خاتالىقلارنىڭ سىزنىڭ ياكى سىزنىڭ پەرزەنتىڭىز ۋە ياكى بىرەر ئۇرۇق - تۇغقىنىڭىزنىڭ سادىر قىلىشىڭىزلارنى خالىمايمەن، دۆلىتىمىز بىزنى ياخشى سىياسەت بىلەن تەمىن ئەتتى، ئەمدى بۇ سىياسەتتىن قانداق قىلىپ مۇۋاپىق پايدىلىنىش دەل بىز ئۆزىمىزمنىڭ ئىقتىدارىغا باغلىق.       دېمەكچى بولغىنىمنى يىغىنچاقلسىام:       1. ئارزۇ تولدۇرۇشتا مەكتەپ دەرىجىسگە بەك قاراپ كەتمەڭ، كەسىپ ۋە قىزىقىشىڭىزنى ئاساس قىلىپ تاللاڭ.       2. كەسىپ ئىسمىغىلا قاراپ بەزى ئارتۇقچە خاتالىق سادىر قىلىشتىن ساقلىنىڭ، تەجرىبىسى بارلاردىن كۆپرەك سوراڭ، تاپالمىسىڭىز مانا مەندىن سورىسڭىز مەن ھەر ۋاقىت كۈچۈمنىڭ يېتىشىچە ياردەمدە بولىمەن.       3. پۇلنىڭ كۆزىگە بەك قاراپ كەتمەڭ. ئىسىڭىزدە بولسۇن: شىنجاڭ تەۋەسىدىكى مەكتەپلەر بىلەن ئىچكىرىدىكى مەكتەپلەر ئاسمان - زېمىن پەرقلىنىدۇ. شۇڭا يەنىلا تەجرىبىسى بارلاردىن كۆپرەك سوراڭ.       ئىلگىرى - كېيىن بولۇپ بىرنەچچە پارچە يازما تەييارلاپتىمەن. بۇ يازمىلار ئاساسەن يەتتە يىلدىن بېرى ئۆزۈمنىڭ ئىچكىرىدە كۆرگەن - ئاڭلىغانلىرىم ۋە ئويلىغانلىرىم ھەققىدە بولۇپتۇ، بۇ يازمىلارنى ئاشۇ ئىچكىرى شىنجاڭ سىنىپىدا ئوقۇۋاتقان، ئالدىمىزدا جىددىي ئىمىتىھان بېرىش ئالدىدا تۇرۇۋاتقان ئوقۇغۇچىلارنىڭ كۆرۈشى ناتايىن، چۈنكى ئۇلاردا بۇنداق پۇرسەت يوق. ئۈمىدىم پەقەت مۇشۇ يازمىنى كۆرگەن تورداشلارنىڭ ئىچكىرىدە پەرزەنتى ئوقۇۋاتقان ئاتا - ئانىلار ئۈچۈن يەتكۈزۈپ قويۇشىنى ۋە ياكى ئۇرۇق - تۇغقانلىرىغا يەتكۈزۈپ قۇيۇشىنى تەسىيە قىلىمەن.       مەزكۇر يازمامنىڭ سىزگە ئاز - تولا ياردىمى بولۇپ قالسا، يەنە داۋاملىق ئىلقۇت تورى ۋە ئۇنىڭ قارىمىقىدىكى بلوگلارنى زىيارەت قىلىپ تۇرۇشنى ئۇنۇتماڭ، بەلكىم ئۇ يەرلەردە سىز ئېھتىياجلىق بولغان مۇھىم مەزمۇنلار سىزنى كۈتۈپ تۇرۇۋاتقان بولۇشى مۇمكىن.       ھۆرمەت بىلەن:       ئىلقۇت بىلوگىدىن: ياسىنجان مەتروزى ئىلقۇت       --------------------       مەنبە: ئىلقۇت بلوگى http://blog.ilqut.com/index.php/archives/304.html

يولۋاس

	بىلىپ قويسا بولغۇدەك گەپلەر ئىكەن!

kkokyar

	راستىنلا بىلىپ قۇيۇشقا تىگىشلىك مەسىلىلەر ئىكەن،ياخشى تىمىا يوللاپسىز،ئۆزىڭىزنىڭ شەخسى بىتىڭىزدىلا ساقلىماي تېخىمۇ ياخشى ئەسەرلىرىڭىزنى يوللىغايسىز..........

ئىلقۇت

	kkokyar يوللىغان ۋاقتى  2012-8-11 00:32 راستىنلا بىلىپ قۇيۇشقا تىگىشلىك مەسىلىلەر ئىكەن،ياخش ... ئەمدى بەزىدە مۇنبەر باشقۇرغۇچىلىرى تەستىقلىماي قويىدىكەن. شۇڭا نۇرغۇن يازمىلىرىمنى بۇ يەرگە كۆچۈرۈشكە مۇمكىن بولمايدىكەن. شۇڭا تورداشلار ئەگەر تېخىمۇ كۆپ يازمىلىرىمغا قىزىقسا كۈلبەمگە بېرىپ كۆرسە بولىدۇ. بۇ يەردە كۆپچىلىككە ئالاھىدە تەۋسىيە قىلىدىغان بىر يازما بار، كۆپچىلىكنىڭ كۆرۈپ چىقىشىنى چىن دىلىمدىن ئۈمىد قىلىمەن. ئالاھىدە تەۋسىيە: ئالىم خالىققا ئوچۇق خەت http://blog.ilqut.com/index.php/archives/3771.html

qaynam

	ئىسراپچىلىق ، شىنجاڭ ئوقۇغۇچىلىرىنى تۈركۈملەپ ئىچكىرىگە ئاپىرىپ ئوقۇتۇش ئىسراپچىلىق . ئاشۇ ئالى بىلىملىك ئوقۇتقۇچىلارنى شىنجاڭغا ئەكىلىپ ، مۇشۇ ئوقۇغۇچىلارغا دەرىس بەرسە ، دۆلەتنىڭ شەخىسنىڭ كىرىمنى ئازلاتمامدۇ .

nifit

	5-قەۋەتتىكى تورداشىنىڭ كىپىمۇ ئورۇنلۇقمۇ نىمە ؟

nazli007

	مىنىڭ قۇشۇپ قويدىغىنىم   بالاڭلارنى  ئىچكىرگە ئەۋەتىشتىن بۇرۇن ئۈزۈڭلارنىڭ ئانا تىلنى ئوبدانراق ئۈگىتىپ ئەۋەرتەسىلە ئىچكىرگە .............بولمىسا 57 مىللەت كۈپيىپ قالغۇدەك

uyghur

	ھەي ، ئىچكىرىدىكى تولۇق ئوتتۇرا مەكتەپلەرگە بېرىپ قايمۇقۇپ مەكتەپتىن ھەيدەلگەنلىرىنى ، ئالىي مەكتەپ ئىمتىھانىدىن ئۆتەلمىگەنلىرىنى بىزنىڭ مەكتەپ ھەر يىلى 20-30 نى قۇبۇل قىلىمىز ، بۇلتۇر مېنىڭ سىنىپىمدىلا 13 بالا بار ئىدى ، ھەرخىل سەۋەب بىلەن ئىچكىرى تولۇق ئوتتۇردىن چېكىنگەن ، ھەممىسى نوقتىلىق ئالىي مەكتەپلەرگە ئۆتۈپ كەتتى،  5 بالا بار 500 دىن يۇقىرى نومۇر ئالغان ، ئۇلارنىڭ تەسىراتىنى ئاڭلىدىم ، ئىمتىھاندىن كېيىن . ئۇلار دەيدۇ : مۇئەللىم شىنجاڭنىڭ ئالىي مەكتەپ ئىمتىھان سۇئاللىرى تەسمىكىن دېسە ئاساندەك ، ئاسانمىكىن دېسە تەستەك كۆرۈنىدىكەن ، بىراق بىزنىڭ ئىچكىرىدىكى مەكتەپلىرىمىزدىكى قاراتمىلىقى بار تەكرار ئاستىدا قاتناشقان ئالىي مەكتەپ ئىمتىھان سوئالىغا قارىغاندا شىنجاڭنىڭ سۇئالى ھەقىقەتەن قىيىنكەن دەيدۇ . لېكىن ، تاللاش پۇرسىتى شىنجاڭدا يەنىلا كۆپ ئىكەن دەيدۇ ، ئالدىنقى يىلى ئادەتتىكى بىر ئالىي مەكتەپكە ئۆتەلمىگەن ئوقۇغۇچى بىزنىڭ مەكتەپتە بىر يىل تەكرار ئوقۇپ فۇدەن ئونۋېرسىتىتىغا كىرىپ كەتتى . ئىچكىرىدە ئوقۇغاندا فۇدەننى چۈشۈمدىمۇ كۆرەلمەيتتىم ، بىر يىل قايتا ئوقۇغۇنىمدىن تولىمۇ خوش بولدۇم دەپ كەتتى ~ توۋا ، بىزنىڭ دىيارىمىزدا تولۇق ئوتتۇرا بولمىسا ئىدى كاشكى ، بالىلىرىمىزدىن زىرىككەندەك ئۇلارنى يىراققا پالىۋەتمەيلى ئالدىراپ ، ئالدىمغا ئۇ يەر ۋاي ئانداقەي ، ۋاي مانداقەي ، بۇ يەردە بولسا ياخشى تەربىيەلىيەلمەيسەن دەپ ئارىغا گەپ قىستۇرىدىغانلار ئۈچۈن گېپىم يوق . ئىچكىرى تولۇق ئوتتۇرا ياخشى بولغاندىكىن دىيارىمىزدىن ھەر يىلى ھەر 5 ئوقۇغۇچىدىن كەمىدە بىرسى ئاران تولۇق ئوتتۇرىدا ئوقۇيالايدۇ ، شۇڭا ياخشلىرىغا كۆز تاشلىماي ، ئاشۇ ساۋاتىنىمۇ چىقىرالماي تولۇقسىزدىن چىقىپ كېتىدىغان ‹‹ئىككى ئاساسەن›› نىڭ ‹‹قۇربان››لىرىدىن ھەر يىلى 7-8 مىڭنى دېمەيلى ، بىر 70-80 نى  قايسى مىللەتنىڭ يېېزىقىدا بولسۇن ئاچىقىپ ساۋادىنى چىقىرىپ ، ھېچ بولمىسا ئاساسى قانۇننى ئوقۇيالىغىدەك قىلىپ ئەكىلىپ بېرەلىسە ئاندىن ھەقىقەتەن ئاپىرىن ، بولمىسا شۇ كونىلارنىڭ تەمسىلى كەپ قالىدۇ دېمەي بولمىدى ، ‹‹پاقلان گۆشى بولسا ، مېھمان ئۇزاتماق نېمە تەس ›› !  بەس ~!

uyghur

	تېما ناھايىتىمۇ ئەھمىيەتلىك يوللىنىپتۇ ، پەرزەنتى ئىچكىرى شىنجاڭ تۇلۇق ئوتتۇرىدا ئوقۇۋاتقان ئاتا-ئانىلارنىڭ ھەممىسىگە تۇنۇشلۇق، ھازىر دەل ئىچكىرى شىنجاڭ تۇلۇق ئوتتۇرىدا ئوقۇۋاتقان ئوقۇغۇچىلارنىڭ(تۇلۇق 3-يىللىقتا) ئالىي مەكتەپ ئارزۇسىنى تاللاش مەزگىلى، يەنە 20 كۈندىن كىيىن ھەممە ئوقۇغۇچىلار ئارزۇ تاللاشقا چۈشۈپ كېتىدۇ. بۇ يەردە بىر مەسىلە ساقلانغان بولۇپ، بۇ مەسىلە دەل ھازىر ئىچكىرى شىنجاڭ تۇلۇق ئوتتۇرىدا ئوقۇۋاتقان ئوقۇغۇچىلار ھەرگىزمۇ شىنجاڭدا ئوقۇۋاتقان ئوقۇغۇچىلاردەك 6-ئايدا ئاۋۋال ئىمتىھاننى بېرىپ بولۇپ ئاندىن ئارزۇ تاللىماستىن، بەلكى ئاۋۋال ئىمتىھان بېرىپ بولۇپ ئاندىن ئارزۇ تاللايدۇ. قىىزىل رەڭلىك جايلاردە ، مەسىلە بارمۇ قانداق ؟ مۇمكىن بولسا تۈزىتىۋېتەلسە !~

ئىلقۇت

	uyghur يوللىغان ۋاقتى  2012-8-12 15:32 تېما ناھايىتىمۇ ئەھمىيەتلىك يوللىنىپتۇ ، پەرزەنتى ئى ... ھە، خاتا بولۇپ قاپتۇ، ئاۋۋال ئارزۇ تولدۇرۇپ بولۇپ ئاندىن ئىمتىھان بېرىدۇ دېمەكچى ئىدىم. رەھمەت.