زۇلپىقار، تۇغۇلغان كۈنىڭگە مۇبارەك بولسۇن!
6 - ئاينىڭ 25 - كۈنى ياش بوكىس ماھىرىمىز زۇلپىقار مۇھەممەتئېلىنىڭ 18 ياشقا تولغان تۇغۇلغان كۈنى، شۇنداقلا ئۆسمۈرلىك ھاياتىنى ئاخىرلاشتۇرۇپ، ياشلىق مەزگىلىگە قەدەم باسىدىغان ئەھمىيەتلىك كۈن. بۇ قۇتلۇق كۈندە زۇلپىقار ئىچكىرىدە بولغاچقا، ئاتا - ئانىسى بىلەن بىرگە بۇ قۇتلۇق كۈننى ئۆتكۈزۈشكە ئىمكانىيەت بولمىدى. شۇڭا بىز تۇغۇلغان كۈن ھارپىسىدا زۇلپىقارنىڭ ئاتا - ئانىسى بىلەن ئۇچرىشىپ تىلىكىنى زۇلپىقارغا ھەم تورداشلارغا سۇنۇشنى لايىق تاپتۇق.
زۇلپىقارنىڭ ئاتىسى مۇنداق دەيدۇ: - مەن ئوغلۇمغا سالغان شۈمەككە مىڭ مەرتىۋە رازى، ئو يالغۇز مېنىڭلا ئوغلۇم بولماستىن، پۈتكۈل دولاننىڭ، شۇنداقلا پۈتكۈل ئويغۇرنىڭ ئوغلى. ئوغلۇم، ئىسمىڭغا لايىق زۇلپىقاردەك بولغىن، ھەممە سەندىن پەخىرلەنسۇن!
زۇلپىقارنىڭ ئانىسى مۇنداق دەيدۇ: - شىردەك ئوغلۇم، ئۆسمۈرلۈك ھاياتىڭىزنى غەلىبىلىك ئۆتكۈزدىڭىز، ئالغان نەتىجىللىرىڭىز خەلققە تەئەللۇق، ياشلىق دەۋرىڭىزگە قەدەم قويۇش ئالدىدا شان شەرەپتىن ھۇشىڭىزنى يوقاتماڭ، يېقىلغاندا ئورنىڭىزدىن دەس تۇرالىسڭىزلا ھەقىقىي ئەزىمەت ھېسابلىنىسز، شۇنى دەيمەنكى، چوقۇم شىردەك ياشاڭ!
---------------------------
كىچىكىدىنلا ئاتا تەربىيەسى ئاستىدا بوكىس ئىشتىياقىدا چوڭ بولغان زۇلپىقار مۇھەممەتئېلى 1994 - يىلى 6 - ئاينىڭ 25 - كۈنى مەكىت ناھىيەسىدە بوكس تىرېنېر ئائىلىسىدە تۇغۇلغان، جاپالىق مەشىق قىلىش ئارقىسىدا 2005 - يىلى 10 ياش ۋاقتىدا شىنجاڭ ماھارەت تەنتەربىيە مەكتىپىگە تاللانغان، ئۈزلۈكسىز جاپالىق مەشىق تۈرتكىسىدە 2007 - يىلى 5 - ئاينىڭ 6 - كۈنى قەشقەر ۋىلايەتلىك ئۆسمۈرلەر بوكس مۇسابىقىسى 38 كىلوگىراملىقلار گۇرۇپپىسىدا ئالتۇن مېدالغا ئېرىشىپ، بوكس ھاياتىنىڭ تۇنجى قەدىمىنى ئوڭۇشلۇق باسقان. تەبىئىي بوكس تالانتى بىلەن 2008 - يىلى 9 - ئايدا شىنجاڭ بوكس كوماندىسىغا تاللانغان، زۇلپىقار ھارماي - تالماي مەشىقنى داۋاملاشتۇرۇپ، ئۆزىگە قاتتىق تەلەپ قويۇپ، 2010 - يىلى شىنجاڭ 12 - نۆۋەتلىك ياش - ئۆسمۈرلەر بوكس تەنھەرىكەت مۇسابىقىسى 60 كىلوگىراملىقلار گۇرۇپپىسىدا چىمپىيۇن بولغان، شۇ يىلنىڭ ئاخىرى قازاقىستاندا ئۆتكۈزۈلگەن 8 دۆلەت تەكلىپ مۇسابىقىسىدە جۇڭگو شىنجاڭ كوماندىسىغا ۋاكالىتەن قاتنىشىپ، 69 كىلوگىراملىقلار گۇرۇپپىسىدا مىس مېدالغا ئېرىشكەن. 16 ياشلىق زۇلپىقارنىڭ بوكس مەيدانىدىكى چاققانلىقى، ئىنكاسىنىڭ تېزلىكى، چىدامچانلىقىنىڭ ئالاھىدە يۇقىرىلىقى تىرېنېرلارنىڭ ئالاھىدە دىققىتىنى تارتتى ھەم كەڭ تاماشىبىنلارنى ھەيران قالدۇردى. تىرېنېرلار زۇلپىقارغا چوڭ ئۈمىد باغلاپ، 2011 - يىلى 12 - ئاينىڭ 11 - كۈنى قازاقىستاننىڭ ئالمۇتا شەھىرىدە ئۆتكۈزگەن خەلقئارالىق 12 دۆلەت بوكس مۇسابىقىسىگە جۇڭگو شىنجاڭ كۇماندىسىغا ۋاكالىتەن قاتنىشىپ ئالتۇن مېدال ئالغان. 2012 - يىلى 3 - ئايدا ئۈرۈمچىدە ئۆتكۈزۈلگەن جۇڭگو شىنجاڭ بوكىس تەكلىپ مۇسابىقسىدە ئالتۇن مېدال ئالغان، 2012 - يىلى 5 - ئاينىڭ 10 - كۈنىدىن 13 - كۈنىگىچە قازاقىستان چىمكەنت شەھىرىدە ئۆتكۈزۈلگەن بوكىس تەكلىپ مۇسابىقىسىدە يەنە چىمپيونلۇقنى قولغا كەلتۈرگەن، ھازىرغىچە تۈرلۈك مۇسابىقىلەردە جەمئىي 5 ئالتۇن مېدال، 1 مىس مېدال قولغا كەلتۈرۈپ ياخشى نەتىجە ياراتقان.
ئەمدىلا 18 ياشقا كىرگەن زۇلپىقار مۇھەممەتئېلى بۇنىڭدىن كېيىنكى ماڭىدىغان يولنىڭ تېخىمۇ جاپالىق ئىكەنلىكىنى بىلىپ يەتكەچكە، مەشىق قىلىشنى بىر كۈنمۇ توختىتىپ قويغىنى يوق. ئاتا - ئانىسىنىڭ، يۇرتىدىكى ئۇرۇق - تۇغقانلىرىنىڭ، جۈملىدىن پۈتكۈل ئۇيغۇر خەلقىنىڭ ئۈمىدىنى ئاقلاش ۋە شان - شەرەپ كەلتۈرۈش ئۈچۈن پۈتۈن ۋۇجۇدى بىلەن جاپالىق مەشىق قىلىپ، خەلقئارالىق مۇسابىقىلەرگە تەييارلىنىۋاتىدۇ.
بىز زۇلپىقار مۇھەممەتئېلىنىڭ تۇغۇلغان كۈنىگە ياخشى تىلەكلىمىزنى تىلەش بىلەن بىرگە، بەدىنىگە باھادىرلارچە قۇۋۋەت، مۇشتۇمىغا ھەزرەتئېلى شاھىمەرداندەك كۈچ تىلەيمىز، تېخىمۇ چوڭ ئۇتۇقلار يار بولسۇن!
زۇلپىقار ھەققىدە يوللانغان باشقا تېمىلارنى بۇ يەردىن كۆرۈڭ:
1. http://bbs.misranim.com/thread-68333-1-1.html
2. http://bbs.misranim.com/thread-74256-1-1.html
3. http://bbs.misranim.com/thread-78722-1-1.html
يوللىغان ۋاقتى 2012-6-25 01:59:08
