سەن كەلسەڭ
سەن كەلسەڭ زېمىننىڭ روھى باشقىچە،
بۇلاقلار ئوينايدۇ كۈلۈپ تاشقىچە.
چاڭقىغان توغراقلار بىلىنى رۇسلاپ.
ياشىرار قايتىدىن قېرى-ياشقىچە.
سەن كەلسەڭ ھاياتلىق قايتا ئويغىنار،
دەريالار دولقۇنلاپ ھەريان تولغىنار.
ياپيېشىل مەخمەللەر دالا ئېتىزدا،
ئاجايىپ گۈلزارلىق چىمەنگە تولار.
سەن كەلسەڭ ھەممە ياق بولىدۇ جەننەت،
روھىمىز، قەلبىمىز قاقىدۇ قانات.
كەل نەۋرۇز بىز ساڭا ئەجەب ئىنتىزار،
ياشنايدۇ سەن بىلەن نەچچە مىڭ ھايات.
سەن كەلسەڭ ئېرىقتا سۇلار شىۋىرلاپ،
بۇلبۇللار چىمەنگە قىلىدۇ خىتاب.
جەنۇبتىن قارلىغاچلار كېلىپ ۋىچىرلاپ،
پىشايۋان ئىچىگە كىرەر ئۇۋىلاپ.
سەن كەلسەڭ شۇ قاقاس چۆللەر چىمەنزار،
مەجنۇنتال كۇچۇكلاپ غازاڭ چىقىرار.
سەن كەلسەڭ خىسلەتلىك شاماللىرىڭغا،
ئەگىشىپ كېلىدۇ جەزبىدار باھار،
سەن كەلسەڭ چىچەكلەر چاچار خۇشپۇراق،
ۋىسالغا ئالمىشار ھەسرەتلىك پىراق.
ئارمانلار ئىزلىگەن ئاشىق-مەشۇقلار،
ئېيتىشار ئۆزئارا سۆيگۈدىن قوشاق.
سەن كەلسەڭ جەرەنلەر كېلەر ئويناقلاپ،
توشقانلار بۆجەنلەپ تۆگە تايلاقلاپ.
ئېتىزدا دېھقانلار، ئاۋۇلدا قويچى،
ئىشلەيدۇ توختىماي شۇنچە ئالدىراپ.
كەل نەۋرۇز يېڭىچە باھارنى ئىلىپ،
تەبرىكلەپ ئوينايلى سامالار سېلىپ.
دەريادا ئېقىتار يىراق-يىراققا،
شائىرە-شائىرلار ئەشئارلار يېزىپ.
چەرچەن مەدەنىيەت يۇرتىدىن پولات نىياز
يوللىغان ۋاقتى 
