ۋۇجۇدقا چىققاچ ئارزۇ-خىياللار، شاد كۈلۈشتى سەبى چىرايلار

dulani · ۋاقتى: 2013-10-1 19:39:17

ئاقسۇ ۋىلايىتىنىڭ ئاۋات ناھىيىسى بىلەن ئاقسۇ تۈرمىسى(قورولدۆڭ ئەمگەك بىلەن ئۆزگەرتىش ئورنى)ئارىلىقىدا ناھىيە بازىرى بىلەن بولغان ئارىلىقى 60 كىلومېتىر بولغان قارداش كەنتىدىكى دېھقانلار ئەزەلدىن چارۋىچىلىق بىلەن شۇغۇللىنىپ تارقاق ئولتۇراقلىشىپ كەلگەن . ئوقۇش يېشىغا توشقان پەرزەنتلىرىنى ئوقۇتۇشقا يېقىن ئەتراپتا مەكتەپ بولمىغاچقا ئوقۇتالماي كەلگەن ئىدى. ناھىيىلىك پارتكوم، خەلق ھۆكۈمىتى بۇ ئورۇنغا بىر مەكتەپ سېلىشنى ئۇزۇندىن بېرى پىلانغا ئالغان بولسىمۇ، چارۋىچىلارنىڭ ئولتۇراقلىشىشى تارقاق بولغاچقا بۇ ئىش ئەمەلگە ئاشماي كەلگەن ئىدى. 2009-يىلى دۆلەتنىڭ سوتسىيالىستىك يېڭى يېزا بەرپا قىلىش چاقىرىقىنىڭ تۆرتكىسى بىلەن بۇ جايغا رەتلىك قىلىپ 40نەچچە ئائىلىلىك يەر تەۋرەشكە چىداملىق ئۆي سېلىنىپ تارقاق ئولتۇراقلاشقان چارۋىچىلار كۆچۈرۈپ كېلىندى. شۇنىڭ بىلەن 2012-يىلى ناھىيە مەبلەغ ئاجرىتىپ، بۇ جايغا ئۆلچەملىك مەكتەپ قۇرۇلۇشى، كەنت كومىتېتى ئىشخانا قۇرۇلۇشى، كەنت شىپاخانا قۇرۇلۇشىنى بىر تۇتاش پىلانلاپ قۇرۇلۇش ئېلىپ بېرىش ئارقىلىق،يىل ئاخىرىدا قۇرۇلۇش پۈتۈپ بۇ جايدىكى خەلقنىڭ پەرزەنتلىرىنى ئوقۇتۇش، ئۆسمۇرلەرنىڭ بىلىم ئېلىش ئارزۇسى دەسلەپكى قەدەمدە كاپالەتكە ئىگە قىلىندى. 2013-يىلى بۇ كەنتكە ۋىلايەت ناھىيىدىن بولۇپ جەمئى 6نەپەر كادىر خىزمەت گۇرۇپپىسى بولۇپ چۈشكەن بولۇپ، بۇلار بۇ ئەھۋالنى كۆرۈپ يېزا، ناھىيدىكى مۇناسىۋەتلىك ئورۇنلارغا ئەھۋالنى ئىنكاس قىلىپ ئوقۇتقۇچى مەسىلىسىنى ھەل قىلىپ ئوقۇتۇش ئېلىپ بېرىش ئۈستىدە ئىزدىنىپ، ناھىيىلىك مائارىپ ئىدارىسىنىڭ بۇخىزمەتكە ئەھمىيەت بېرىشى نەتىجىسىدە 2013-يىلى 9-ئاينىڭ 9-كۈنى 6ياشتىن 13ياشقىچە بولغان ئوقۇش يېشىدىكى 30 نەپەر ئوقۇغۇچى، ئىككى نەپەر ئوقۇتقۇچىدىن تەركىپ تاپقان ‹‹قارداش يۇلغۇن باشلانغۇچ مەكتىپى›› رەسمى قۇرۇلۇپ ئوقۇش باشلىدى.
بۇ مەكتەپنىڭ قۇرۇلۇپ ئوقۇش باشلىشى بىلەن بۇ كەنتتىكى بارلىق ئاتا-ئانىلار خوشاللىقىدا ‹‹ پەرزەنتلىرىمىز ئەمدى كۆزى ئوچۇق قارىغۇ بولۇپ قالمايدىغان بولدى››، ‹‹ بىز ئوقۇيالمىغان بولساقمۇ پەرزەنتلىرىمىز ئوقۇش، بىلىم ئېلىش پۇرسىتىگە ئېرىشتى›› دەپ خوشال بولۇشتى.