پەخرىيە ئەشرەپ بىلەن ئەلكۈيى ئېكرانىدا سۆھبەت

umidwar

ئەسسالامۇئەلەيكوم،ئەلكۈيى تورىدىكى بارلىق تورداشلار ئالدى بىلەن شىركىتىمىز ۋە تورىمىز نامىدىن ھەر بىر كۈنۈڭلارنىڭ خۇشال -خوراملىق ئىچىدە ئۈتىشىگە،توردىكى مەنىۋى ھاياتىڭلارنىڭ تېخىمۇ گۈزەل ۋە يارقىنلىق بۇلىشىغا چىن دىلىمىزدىن تىلەكداشمىز.ھەممەيلەننىڭ ئەلكۈيى تورى ئارقىلىق ئەلنىڭ ئارزۇسىغا ئاداققىچە ھەمدەم بۇلىشىمىزنى،تىرىشىشىمىزنى ئۈمىد قىلىمىز.
جەسۇرلۇق ۋە باتۇرلۇق،قەيسەرلىك ۋە ئەقىل - پاراسەت،تىرىشچانلىق ۋە يىڭىلمەس روھ خەلقىمىزنىڭ ئۇزۇن يىللاردىن بۇيان ئۆز تۇرمۇشىدا ئەكس ئەتتۈرۈپ كەلگەن ئېسىل پەزىلەتلىرىنىڭ بىرى بولۇپ ھېسابلىنىدۇ.ئارىمىزدا تارىختىن بۇيان ئوخشىمىغان دەۋىرلەردە ئوخشىمىغان قەھرىمانلار،ئىپتىخارلىق ئوغلانلار،پەخىرلىك قىزلار مەيدانغا كەلگەن بۇلۇپ،ئۇلار ئۆزىدىكى جەسۇرانە روھى ۋە نەتىجىلىرى بىلەن باشقىلارغا ئۈلگە ۋە مەدەت بولۇپ كەلگەن.
ھالا بۈگۈنكى كەلگەندە بىز دە  بۇنداق ئىپتىخارلىق،پەخىرلىك ئىشلار ھەرگىزمۇ توختاپ قالغىنى يوق،يېقىندا ئۈرۈمچى شەھەرلىك تولۇق ئوتتۇرا مەكتەپنىڭ ئوقۇغۇچىسى، پەخىرلىك ئۇيغۇر قىزى پەخرىيە ئەشرەپ مەملىكەتلىك ئالىي مەكتەپ ماتېماتىكا ئىمتىھانىدا 150 نومۇر يەنى تولۇق نومۇر ئېلىشتەك تارىخى رىكورتنى ھەمدە ئومۇمىي نومۇردا 711 نومۇرغا ئىرىشىپ  ئادەمنىڭ ھاياجىنىنى ۋە قايىللىقىنى قوزغايدىغان،ھەر بىر ئوقۇغۇچىغا ئىلھام، مەدەت ئېلىپ كېلىدىغان گۈزەل مىنۇتلارنى،پەخىرلىك ھېس -تۇيغۇلارنى ئېلىپ كېلىش بىلەن بىرگە، 1984-يىلىدىن باشلاپ شىنجاڭ ئۇيغۇر ئاپتونوم رايونىدا مەملىكەتلىك ئالىي مەكتەپكە قوبۇل قىلىش بىر تۇتاش ئىمتىھانى ئېلىنىشقا باشلىغاندىن بۇيانقى شىنجاڭدىكى تۇنجى تەبئىي پەن ماتېماتىكىسىدا تولۇق نومۇرغا ئېرىشكۈچى بولۇش شەرىپىگە ۋە  2011-يىللىق تەبىئىي پەنلەر بويىچە ئەلىيۇلئەلالىق شەرىپىگە ئىرىشىپ،خەلقىمىزگە كاتتا شان - شەرەپ ئېلىپ كەلدى.

بۇ مۇناسىۋەت بىلەن بىز پەخىرلىك ئۇيغۇر قىزى ئەلىيۇلئەلا پەخرىيە ئەشرەپنى شىركىتىمىزگە ئالاھىدە تەكلىپ قىلىپ <<ئەلكۈيى ئېكرانى>> پروگراممىسى ئارقىلىق كەڭ تورداشلارنىڭ پەخرىيە بىلەن كەڭ -كۇشادە سىردىشىشىغا شارائىت يارىتىپ بىرىش، پەخرىيەگە بولغان كۆڭۈل ئىزھارىنى بايان قىلىش ھەمدە ئۇنىڭ مۇشۇنداق زور شان - شەرەپكە ئېرىشىشتىكى جەسۇرانە روھىنى خەلقىمىزگە بىلدۈرۈش مەقسىتىدە <<پەخىرلىك ئۇيغۇر قىزى پەخرىيە ئەشرەپ بىلەن ئەلكۈيىدە سۆھبەت>>ناملىق زىيارەت فىلىمىنى ئىشلەپ كەڭ خەلقىمىزگە سۇندۇق.

ئەلكۈيى تورىدىن زىيارەتنىڭ FLVشەكلىنى كۆرۈش
 

چۈشۈرۈپ كۆرۈش ئادرېسى

زىيارەت جەريانىدىكى بىر قىسىم رەسىملەردىن ئارىيەلەر

پەخرىيە ئۆزىنىڭ ماتىماتىكىدا 150 نومۇر ئالغانلىقىنى بىلگەندىكى خۇشاللىق مىنۇتلارنى سۆزلەپ بەرمەكتە

پەخرىيە <<ئەلكۈيى ئېكرانى>>زىيارىتىدە

پەخرىيە <<ئەلكۈيى ئېكرانى>>زىيارىتىدە

پەخرىيە ئەشرەپ ئەلكۈيى رىياسەتچىسىنىڭ سۇئالىنى زەن سېلىپ ئاڭلاۋاتىدۇ

زىيارەت داۋامىدا  ئەلكۈيى شىركىتىدىكى بىر قىسىم خىزمەتچى-خادىملار پەخىريە ئەشرەپ بىلەن  خاتىرە سۈرەتكە چۈشتى

زىيارەت جەريانىدا بىز پەخرىيەنىڭ ماتىماتىكىدىلا ئەمەس بەلكى ،ئۇنىۋېرسال ساپاسىنىڭ يېشىغا ماس بولمىغان ھالدا يوقىرىلىقىنى، مىجەزىنىڭ ئوچۇق - يورۇق،كەمتەر ۋە ئېغىر -بېسىق ھەمدە پائالىيەتچانلىقى كۈچلۈك،دادىل قىز ئېكەنلىكىنى بايقىدۇق،ھەمدە قەلبىمىزدە  ئۇنىڭدىن پەخىرلىنىش تۇيغۇسى تېخىمۇ ئۇلغايدى.
پەخرىيەنىڭ نەتىجىسى بىزگە ئۈزلۈكسىز تىرىشىش،قەتئىي بەل قۇيىۋەتمەسلىك،ئۆزىگە ئىشىنىش ۋە چىدام غەيرەتلا بولىدىكەن،ھەرقانداق قىيىنچىلىق ئۈستىدىن غالىپ كەلگىلى بولىدىغانلىقىنى،ئەتراپلىق بىلىم ئېلىش،مۇۋاپىق روھىي ھالەتنى ساقلاش مۇۋەپپەقىيەت قازىنىشتا كەم بولسا بولمايدىغانلىقىنى كۆرسىتىپ بەردى.بىز ئەلكۈيى تورى ۋە بارلىق تورداشلار نامىدىن بۇنىڭدىن كىيىن ئارىمىزدىن پەخرىيەگە ئوخشاش ياراملىق ئىزباسارلارنىڭ جىقراق چىقىشىنى چىن دىلىمىزدىن ئۈمىد قىلىمىز ۋە پەخرىيەنىڭ ئالىي مەكتەپتىكى ئوقۇش ھاياتىنىڭ تېخىمۇ مەنىلىك ۋە غەلبىلەرگە ئىچىدە ئۆتىشىنى ،ئۆز ئارزۇسى بويىچە كەلگۈسىدە بىر ياراملىق دوختۇر بولۇپ يىتىشىپ چىقىشىغا تىلەكداشمىز

كامالىي ئېھتىرام بىلەن:
ئەلكۈيى تور تېخنىكا چەكلىك شىركىتى
<<ئەلكۈيى ئېكرانى>> پروگرامما بۆلۈمى

2011-يىلى 6-ئاينىڭ 30 كۈنى

dil-naz

ئەلكۈيى تورىنىڭ پەخىرلىك قىزىمىز بىلەن مانا مۇشۇنداق دەل ۋاقتىدا سۆھبەت ئورۇنلاشتۇرۇپ، بىزگە سۇنغانلىقىدىن خۇشال بولۋاتىمەن!!!رەھمەت سىلەرگە!!!
كۆرىۋىتىپ كۆزىمدىن ئىختىيارسىز ياش ئەگىدى. مەنمۇ شۇنچىلىك ھاياجانلىنىپ تۇرۇپتىمەن.خۇدى ئۆز سىڭلىمدەك سۆيىنىپ كەتتىم .دېمىسىمۇ ھەممىمىزنىڭ پەخىرلىنىشكە ئەرزىگۈدەك تىرىشچان ،ئەقىللىق قىزكەن.
راستىنلا تېرىشچانلىق ئەڭ موھىمكەن .ئۇ قىزمۇ توغرا دېدى.ئىنتاھان نەتىجىسى چىقىش ئالدىنقى بىر باشلىنىش. كېيىنكى باشلىنىش بولسا ئۇ قىزنىڭ ئۇزال يوللاردىكى ئوقۇش ھاياتى!!!
ئىشنىمىزكى سىڭلىمىز پەخىريەنىڭ ئاشۇنداق تىرىشچانلىقى ،ئەقىللىقىلىقى، بىلەن كيېنكى قەدەملىرىمۇ مۇۋاپىقىيەتلىك بىسىلغۇسى !!!!
ياشاپ كېتىڭ پەخىرلىق قىز!!! اللاھ تىنىڭىزنى سالامەت ، ئەقلىڭىزنى زىيادە قىلغۇسى!!!!

arman03

.ئەقىللىق قىز ئىكەن، كارامەت نەتىجە قازىنىپتۇ. بېشىغا دوپپا كىيگەن سۈرىتى  بىلەن تېخىمۇ جۇلالىنىپتۇ.

parixta799

ياشاپ  كېتىڭ  پەخرىيە!سىزنى  تەربىيەلەپ  ئۆستۈرگەن ئاتا-ئانىڭىزغا  ئالەمچە  تەشەككۈر!
بۇندىن  كېيىنكى  قەدەملىرىڭىزگە  زور  ئۇتۇقلار  يار  بولسۇن!
سىزنىڭ  ئەلكۈيى  ئېكرانى زىيارىتىدە  دىگەن  گەپلىرىڭىزنى  ئاڭلاپ  ئولتۇرۇپ،
ئىختىيارسىز  كۆزلىرىمدىن  ياشلار  تۈكۈلدى،سىزدىن  تولىمۇ  پەخىرلەندىم،ھەتتا
خىزمەتداشلىرىمغا  :قاراڭلار،بىزنىڭ  مىللىتىمىزدىن  مۇشۇنداق  قىز  چىقىدۇ!
دەپ توۋلاپ كەتتىم.ئۇلارمۇ  ئاغزىنى  ئېچىپلا  قېلىشتى.....

tagnur

كۈلدى ئەل،ئاپرىن ئوقوپ،ئاختى دەريا،شاۋقۇن ئورۇپ ،
پەخىريە ئۇيغۇر قىزى ، خۇشال بۈگۈن ، شەرەپ قۇچۇپ .

ياغدى ئەلدىن ، تالاي ئالقىش ،ئۇيغۇر ئۈچۈن غەزەل قېتىپ ،
قۇشلار ئارا ، بەيگە قىلىپ ،تاپسۇن شەرەپ ، قانات قېقىپ .

ئەل ئۈچۈن ، مىللەت ئۈچۈن ، تۆھپە قوشۇپ ، سۈيىدە ئېقىپ ،
مىھىر بېرىڭ ،زەمزەم بولۇپ، قۇياش كەبى ، نۇرلار چېچىپ .

بىلىم ئېلىپ ، باغلاپ ئىمان ، ھەقنى كۆزلەپ ، ئەلنى كېزىپ ،
خۇشال قىلىڭ، ساپ ئەجىردە، مىللەت ئۈچۈن ، دەستە تىزىپ .

كەلسە تۆھمەت  ، ئۆسەك توقۇپ ، ھەق يولىنى ، تار قىلىپ ،
يەكسان قىلىڭ ،يەر چىشلىتىپ ،پەن - بىلىمنى ، خەنجەر قىلىپ .

ھايات سەرخىل ، قىسمەت تولا ، سىناپ تۇرار ، پۇرسەت بېرىپ .
كەلسە ئامەت ، كەلسە ئاپەت ،مەزمۇت تۇرۇڭ ،كەتمەي ئېزىپ .

مەنبە---- ،‹ تاڭنۇر ›

pakzad

بۇ قىزنىڭ زىيارىتىنى باشقا تورلادىن كۆرگەن ئىدىم ،ئاخىرى بىر ئۇيغۇرچە توردا ئۆز تىلىمىزدا زىيارىتىنى ئاڭلاپ ئۆلتۇرۇپتىمەن .<<ئەلكۈيى ئېكرانى>> پروگرامما بۆلۈمىدىكىلەر يارايسىلەر .مۇشۇنداق قىزىق نۇقتىلارنى ۋاقتىدا خەۋەر قىلدىڭلار .
ئالىي مەكتەپ ماتىماتكا ئىمتىھانى ھازىرغىچە مىللىي ئوقۇغۇچىلارغا قىيىن بولۋاتقان بىر نوقتا ئىدى ،شۇڭا نومۇر چىكى تۇرغۇزغاندا ماتىماتكىغا ئايرىم ئەڭ تۆۋەن نومۇر چىكى بىكىتىلەتتى .
بۇ پەخىرلىك سىڭلىمىز بۇ نوقتىغا باشقىچە ئىنىقلىما بەردى ،ئەسلى ماتىماتىكا مىللي ئۇقۇغۇچىلارنىڭ ئاجىز نوقتىسى ئەمەس ئىكەنلىكىنى ،تىرىشسا يەنىلا ئۇمىت بار ئىكەنلىكىنى ئىسپاتلىدى ، ياشاپ كىتىڭ ،سىز كىيىنكى قارارلىق ئۇكا سىڭىللىرىڭىزغا بىر مەدەت بولدىڭىز .

armanlirim

پەخرىيەنىڭ غەلبىسى بىزگە زور ئۈمىد-ئارزۇلارنى ئېلىپ كەلدى،زىيارەتنى تولۇق كۆرۈپ چىقتىم،ئادەتتە تەبىئىي پەنگە ياخشى بالىلار سەل كەم سۆز كۆرىنەتتى،بىراق بىزنىڭ پەخرىيە بىز پەخىرلەنگۈدەك،ھاياجانلانغۇدەك قىز ئىكەن.ئۇنىڭ يېزىقچىلىققا قىززىقىدىغانلىقى،دوختۇرلۇق كەسپىنى ياخشى كۆرىدىغانلىقىنى سۆزلىگەندە كەلگۈسىدە تەتقىقاتلاردا بۇلىدىغان،دۇنيادىكى ئەڭ داڭلىق تىببىي مەكتەپلەردە دوكتور ئاشتىلىق ئۇنۋانىغا ئىرىشىدىغان پەخرىيە ئەشرەپ كۆز ئالدىمغا كىلىۋاتىدۇ.
سىڭلىم تولىمۇ  توغرا ئېيتتىڭىز،سىزدىكى كەمتەرلىكنى ھازىرقى نەتىجەم پەقەت بىر باشلىنىش دېگەن  جۈملىگە يېغىنچاقلىساق ئېسىل پەزىلىتىڭىزنى كۆرىۋالماق تەس ئەمەس ئىكەن.ئەمدى ئالدىڭىزدا سىزنى تېخىمۇ چوڭ غەلبىلەر كۈتۈپ تۇرىدۇ،سىزنىڭ خەلقىڭىز قوللايدۇ،سىز ئۇيغۇرغا بىر شانلىق تارىخ ياراتتىڭىز.سىزدىن ھازىرمۇ سۆيۈنىمەن،ئۆز ۋاقتىدا ئالىي مەكتەپ ئىمتىھانى بەرگەندە مەن 20نەچچە نومۇرنى ھاسىراپ - ھۆمۈدەپ ئاران ئالغان ئىدىم،يۈزلىرىم قىزاردى،ئالىي مەكتەپتىكى ئوقۇشۇمدىمۇ ئالىي ماتىماتىكىنى شۇنداق تىرىشىپ ئۆگىنىپمۇ ئاران نەچچە قېتىمدا لاياقەتلىك بولغان ئىدىم،سىزدىكى تالانت ۋە تىرىشچانلىق ئۆزىڭىزدىكى پەزىلەتلەرگە بىلەن تېخىمۇ لاۋۇلداپتۇ.

durak

نۇرغۇن بىشارەتلەر ، شەپىلەر ، ھادىسىلەر ئۇيغۇرلارنىڭ مەدىنىيەت - تەپەككۇر جەھەتتە تارىخىي مىقياستا  قايتا گۈللىنىش دەۋرىگە قەدەم  قويۇۋاتقانلىقىنى چۈشەندۈرۈۋاتامدۇ  قانداق... پەخرلىك سىڭلىمىز پەخرىيە !

  بۈيۈك  ئاللاھ ، مىللىتىمىز  ئەزالىرىغا ئەقىل ، زېھىن  ئاتا  قىلىش  بىلەن  بىرگە مۇستەھكەم  ئىمان - ئېتىقاتمۇ ئاتا  قىلغايلا ( ئامىين ! )

مۇبارەك

نومۇر ئېلان قىلىنغان شۇ كۈنلىرى مەكتەپداشلار تورىدا قايسىدۇر بىرى يېزىپتىكەن قىسقىلا قىلىپ. ھەيران قالغانتىم. ئارقىدىنلا بىر ماقالە ئېلان قىلىندى، شۇ ماقالىدىن ئېنىق تەپسىلاتىنى ئوقۇغانتىم، خەنزۇ مۇخبىر يېزىپتىكەنغۇ دەيمەن.

711نومۇر! ماتېماتىكىدا 150! نېمە دېگەن نوچى-ھە!
ئۆزۈمنىڭ ئەينى چاغدا ئالغان نومۇرىنى دېيىشتىنمۇ خىجىل بولىۋاتىمەن. ماتېماتىكىدا ئائىلە ئوقۇتقۇچىسى تەكلىپ قىلىپ بېرىپ يۈرۈپ 65 نومۇرنى ئاران ئالغانتىم. شۇ نومۇرلىرىمغىمۇ دادام كۆتۈرۈپ پىقىرتىۋەتكەنىدى خۇشاللىقتىن. پەخرىيەنى پىشانىسىگە سۆيۈپ قويۇپتۇ ئاتا-ئانىسى. ئەلۋەتتە، ئۇنداق ياخشى نومۇرغا سۆيۈپ قويىدۇ-دە، مەنمۇ سۆيۈپ قوياتتىم قېشىدا بولغان بولسام.

ئىشقىلىپ، خېلى كۆپ تىرىشچانلىق، كېچىكىدىن يېتىلدۈرگەن ياخشى ئادەتلەرنىڭ مىۋىسى دەپ قارايمەن. شۇنىڭدەك مېھرىبان ئاتا-ئانىسىنىڭ ئەتراپلىق تەربىيىسى، مەكتىپىنىڭ ئىلغار ئوقۇتۇش تەجرىبىسىمۇ ئوخشاشلا مۇھىم ئورۇندا تۇرىدۇ. پەخرىيە تېخى ئەمدى ئالىي مەكتەپكە ئىمتىھان بەرگەن كىچىك قىز بالا بولسىمۇ، بىراق شۇنداق ئۆزىنى تۇتىۋالغان، چىقىۋاتقان گەپلىرى ئورۇنلۇقكەن. بۇنىڭدىن ئەتراپلىق تەربىيىنىڭ ياخشىلىقىنى، ئوقۇغان كىتابىنىڭ كۆپلىكىنى ھېس قىلىۋالماق تەس ئەمەس. ئەمما پەخرىيەنىڭ دوختۇرلۇق كەسپىنى تاللىغانلىقىغا سەل ھەيران قالدىم. مەملىكەت بويىچە ئالدىنقى قاتاردا تۇرىدىغان قۇرۇلۇش تېخنىلوگىيىسى، بىناكارلىق، قاتناش قۇرۇلۇشى...دېگەندەك كەسىپلەرنى نېمىشقا تاللىمىغاندۇ...دەپ. بەلكىم بوۋىسىنىڭ ئۈمىدى ھەم ئۆزىنىڭ قىزىقىشى، ئارزۇسى شۇنداق بولسا كېرەك. (بۇ يەردە دوختۇرلۇق كەسپىنى تۆۋەن كۆرۈپ ئىنكاس يېزىلىۋاتقىنى يوق جۇمۇ)

قوشۇمچە: بۇ قىز مېنىڭ تۇرپانلىق بىر ساۋاقدىشىمغا بەك ئوخشايدىكەن. [s:2]

karakurum

يارايسىز،پەخرىيە،ھەقىقەتەن ئىسمىڭىزغا لايىق قىزكەنسىز. ئۇلۇق ئاللا  بۇندىن كېيىنكى يولىڭىزنى تېخىمۇ يورۇق،داغدام قىلسۇن.تېنىڭىز نى ساق،ئەقلىڭىز نى سۈزۈك،ئىمان ئېتىقادىڭىزنى مۇستەھكەم،ئىرادىڭىزنى سۇنماس  قىلسۇن.كۆز ئالدىمدا كەلگۈسىدىكى دۇنياۋى بىر ئالىمەنىڭ  يارقىن سىماسى نامايەن بولماقتا.داۋاملڭق تىرىشىڭ،خەلقىڭىز سىزدىن  زور ئۈمىتلەرنى كۈتىدۇ .