باشلىقسەن (مۇخەممەس)

ZAMRAN

باشلىقسەن
(مۇخەممەس)

ۋاھاپ زۇنۇن(زەمران)


سىياسەتتە تۈزۈمدە سۆزۈڭ قاتتق باشلىقسەن،
تۇرسا خەلق پىيادە ئۆزۈڭ ئاتلىق باشلىقسەن،
‹جۇجاڭ›چىقىپ سايلىغان ئىستىداتلىق باشلىقسەن،
‹شوجاڭ›دىگەن ئەمەلگە بولغان ياتلىق باشلىقسەن،،
ئەلنىڭ قەلىب تۆرىدە لېكىن چاغلىق باشلىقسەن.
.
كۈندە ئۈچۋاخ يىغىن دەپ قەھىر چېچىپ قاۋايسەن،
خىرىس قىلىپ ياۋاشنىڭ پاچىقىدىن تالايسەن،
سۆڭەك تاشلاپ بەرگەننىڭ تاپىنىنى يالايسەن،
تاما قىلىپ گۆشنى ھەم يانجۇقىنى مارايسەن،
پۈتۈن ئەلگە تونۇشلۇق ئوتۇغاتلىق باشلىقسەن.
..
باش ھەرپىگە ئىسمىڭنىڭ‹شوجاڭ›بىللە قېتىغلىق،
سوۋغا-سالام ئۆيۈڭگە خۇددى سەلدەك ئېقىغلىق،
سەندىن كىچىك باشلىقلار تىزىملىككە چېتىغلىق،
يانجۇقۇم بوش دىگەنگە يېشىل چىراق يېقىغلىق،
نەزىرىدە ئەمەلنىڭ ئېھتىياتلىق باشلىقسەن.
.
بولۇپ قالسا توي-تۈكۈن خىزمەتداشلار ئۆيىدە،
بولالمايمىز مىھماننىڭ قولنى چايقار سۈيىدە،
مېھمان بولۇپ يايرىساق نەغمە-ناۋا كۈيىدە،
تۈزۈم قاتتىق پەرمانلار قۇلقۇمىزنىڭ تۈۋىدە،
باشقۇرۇشقا ئېپىڭ بار ئىجادچانلىق باشلىقسەن.
.
ئۇرۇق سالساق ئېتىزغا بىخ سۈرگۈچە سېسىتتىڭ،
مىۋە سالساق قۇرۇتۇپ يېلىمىنى ئېقىتتىڭ،
خۇددى كونا ژىندەك ھەممىنى تەڭ ئېچىتتىڭ،
يارلىقىڭدا ئۆزەڭنى ھەممىمىزگە بېقىتتىڭ،
ئەلنى ئۇرغان توقماققا تومۈر ساپلىق باشلىقسەن.
.
جۈمەكتىكى سۇلارمۇ بۇيرۇقۇڭسىز ئاقمايدۇ،
كەچ كىرسىمۇ لامپىلار ئۆز مەيلىچە يانمايدۇ،
ئامانلىقتا تۇرغانلار پۇتنى سوزۇپ ياتمايدۇ،
ناشتىلىققا خاتىرجەم بىر تال ياڭاق چاقمايدۇ،
ھەممىگە تەڭ چات كېرگەن ئۇزۇن چاتلىق باشلىقسەن.
.
بېغى كەڭرى مەكتەپنىڭ بادام،ئەنجۈر،ئۈزۈم بار،
مېۋىسىنى ئۈزمەسكە تۈزۈپ قويغان تۈزۈم بار،
ساناپ قويدۇڭ ھەممىنى كۈندە كۆرەر كۆزۈڭ بار،
قاراپ شۆلگەي ئېقىتساق بىزگە ئاچچىق سۆزۈڭ بار،
ھالال تەرلىك خەلقىڭگە بىئىنساپلىق باشلىقسەن.
.
زېرىكتۈردى ھەممىنى ئادالەتسىز يارلىقىڭ،
ئەمەل مەنسەپ دۇنياغا تويماس ئاچۇ –زارلىقىڭ،
ئەلگە قىلچە نەپ بەرمەس ئىچىڭ قوتۇر تارلىقىڭ،
كېلىپ قالسا مەيلىغۇ بىر كۈنلەردە خارلىقىڭ،
ئەمەل،پايدا  ئالدىدا تويماس قاپلىق باشلىقسەن.
.
يورۇق چۈشمەس ئېلىڭگە سەن ياندۇرغان چىراقتىن،
قۇتۇلالماي يۈرەمدۇق سەن كەلتۈرگەن پىراقتىن،
تىللاپ يۈردۇق ئوڭ-تەتۈر سېنى يېقىن-يىراقتىن،
سۆز باشلىما گەپ ئېچىپ ئەمدى ئادەم سىياقتىن،
لامپا دىسەك نۇرۇڭ يوق قانچە ۋاتلىق باشلىقسەن؟
.
باردۇر يىراق-يېقىندا يۈلەنچۈگۈڭ ساناقسىز،
ھىس قىلمايسەن ئۆزەڭنى شۇڭا ھەر چاغ ياراقسىز،
ئۆتمەس كۈنۈڭ بىھۇدە قاۋاقلاردا ھاراقسىز،
نەپسىڭ ئاچماس يۈرسەڭمۇ ناشتىلىقسىز تاماقسىز،
يۈلەنچۈككە تايانغان يانتاياقلىق باشلىقسەن.
.                                             
ھىلە ،قىلتاق كۆپ سېنىڭ تۇتۇپ ماڭغان يولۇڭدا،
كىچىك بېلىق سۈزمىدىڭ چويلا تۇتقان قولۇڭدا،
پۇرسەتپەرەس غالچىلار يۈرۈپ ئوڭ ۋە سولۇڭدا،
ئۆز نەپسىنى گوللاشتى مۇكاپاتلىق پۇلۇڭدا،
ئېلىم-بېرىم ھىساپتا ئىجتىھاتلىق باشلىقسەن.
.
تەۋرىسەڭمۇ ئىرغاڭلاپ جۇت-شىۋىرغان ئالدىدا،
ئۈششۈك تەگمەي شاخلىرىڭ قالدى داۋام دالدىدا،
كۆكلەۋەردىڭ شۇ سەۋەپ مەيلى يامغۇر قارلىدا،
ھالاكەتتىن يىراق بوپ بەلكى ئۆڭكۈر غارلىدا،
غولۇڭ مەھكەم يىلتىزىڭ ئوغۇتلاغلىق باشلىقسەن.
.
قويدۇڭ كىچىك ئەمەلگە ساڭا يېقىن تۇغقاننى،
مېھنىتىڭنى چوڭ بىلىپ شەرىتىڭنى ئۇققاننى،
تائام كەلسە ئالدىغا سەنچۈن گېلنى بوققاننى،
ھەر دەقىقە يۈرۈگى سېنى دەپلا سوققاننى،
يېقىنلىرىغا يار-يۈلەك ئىلتىپاتلىق باشلىقسەن.
.
سۆرەپ يۈردى بەزىلەر لالما ئىت بوپ چاناڭنى،
يۇندىسىدا جان بېقىپ چايقاپ ئىچىپ قاچاڭنى،
ھوزۇرلاندى چىشلىشىپ سەندىن ئاشقان پاتاڭنى،
بېقىپ تۇردى سەمرىتىپ توخۇ ،قوي ۋە كالاڭنى،
خوشامەتتىن سېلىنغان چوڭ قوتانلىق باشلىقسەن.
.
ئاسمىنىڭدا غالچىلار چولپان بولۇپ چاقنايدۇ،
سايلام بولسا ھەر قېتىم ساڭا بېلەت تاشلايدۇ،
ئۆزى چۈشۈپ پەگاغا سىنى تۆرگە باشلايدۇ،
پاقلان گۆشى سەن يىسەڭ تېرىسنى ئاشلايدۇ،
خوشامەتتە ھۆرمەتلىك ئەتىۋارلىق باشلىقسەن.
...
ماختاپ تۇرار  داۋامەت قىلىپ ياخشى گېپىڭنى،
كەلسە-كەلمەس ئۇسۇلغا چېلىپ قېلىن دېپىڭنى،
قىلىپ ساڭا جان –پىدا چېپىپ ھارماي چېمىڭنى،
ئويناپ يۈرسەڭ غېمىڭ يوق ئۇ غەملىدى غېمىڭنى،
جېنى پىدا كەتمەنگە تۈگۈمەس چاملىق باشلىقسەن.
.
كۆزۈڭ چۈشكەن خانىمنىڭ خىزمىتىنى قوللايسەن،
‹بىرىنجى دەپ›ھەر ئايلىق خۇلاسىگە يوللايسەن،
ئىشخاناڭغا چاقىرتىپ نومۇر بىلەن گوللايسەن،
تاقىۋېلىپ ئىشىكنى ھەر تەرەپتىن ئوۋلايسەن،
شەرمەندىنىڭ باغرىدا بىھايالىق باشلىقسەن.
.
ھال- ئەھۋالىم بار دېسە كەچتە سائەت بەش دېدىڭ،
كىرسە بەشتە ئۇيالماي لېپتىگىڭنى يەش دېدىڭ،
بىتاقەتمەن دەردىڭدە كۆڭلۈم شۇنچە غەش دېدىڭ،
قول ئۇزۇتۇپ مەيدىگە بۇ نىمانچە لەش دېدىڭ،
قېلىنلىقنىڭ بابىدا داپيۈز ئاتلىق باشلىقسەن.
.
خانىملارغا ئىجازەت ئۇپا ،قەلەم قاشلىق دەپ،
ساغرىسىغا مەيدىگە كۆز تاشلىدىڭ ياشلىق دەپ،
بىر قارىشىم سۈننەتتۇر ئىككى قاراش ئاچلىق دەپ،
قاردەك ئاپپاق چېچىڭنى بوياپ قارا  چاچلىق دەپ،
ئاياللارنى ئالداشتا گېپىڭ تاتلىق باشلىقسەن.
.
كىم شاخلىسا گېپىڭنى كۈندە ھارماي بەردىڭ دەك،
يوپكا ،چاپان، پايپاققا ھەر تەرەپتىن قويدۇڭ چەك،
قاپاق تۇرسە غوتۇلداپ غەيۋەت قىلدىڭ دەپ جىنتەك،
ئات تارتالماس ھالىڭنى خانىم بولامدۇ ھەي سەندەك،
ئۆچ ئىلىشقا ئامال كۆپ پىر ئۇستاتلىق باشلىقسەن.
.
چىقىپ تۇردۇڭ ھەرىدەك نازلىنىشتىن ياتلىسا،
قىلغان ئەسكى ئىشىڭنى باشقىلارغا داتلىسا،
توغرا ئۆتۇپ ئالدىڭدىن ئېىرىقىڭدىن ئاتلىسا،
خوش – خوش دىمەي ۋاقتىدا كۆڭلىدە غۇم ساقلىسا،
يۆتكەش ئۈچۈن يىراققا ئىلتىماسلق باشلىقسەن.
.
پەرۋانە بوپ يېنىڭدىن بىردەم نىرى كەتمىسە،
تەرلىرىڭنى يەلپۈتۈپ كۈندە قەن چاي دەملىسە،
چايناپ نازۇ – نېئمەتنى يۇتماي ساڭا تەڭلىسە،
يۇتماي ئاشۇ تەڭلەشتىن لېۋىڭگە لەۋ لەۋلىسە،
ئۆستۇرۇشكە شۇلارنى قەسەمياتلىق باشلىقسەن.
.
ئەملىڭنى پەش قىلىپ رىستۇرانغا توۋلىدىڭ،
ئۇسۇل، ساما ،تانسىغا ھەرقەدەمدە زۇرلىدىڭ،
قوپسا مەندىن باشقىغا قوپمىغىن دەپ مورلىدىڭ،
كېتەي دىسە خەپ ئەتە! ئەتىسىنى خورلىدىڭ،
رېستۇراندا ئۆزگىچە كۈي- ناۋالىق باشلىقسەن.
.
ئاشتى يېشىڭ ئەللىكتىن بۇ نىمانچە قىلغۇلۇق،
ھەر تەرەپتە گەپ بولدى، چەكتىن ئاشتى خۇمسىلىق،
قاچانلاردا بولارسەن شۇ ئەمەلگە تويغۇلۇق،
نىمە دىسەڭ شۇ بولدى، بولىۋەردى بولغۇلۇق،
قوشقا قاتقان كالىدەك بىر ئىزتاپلىق باشلىقسەن.
.
تەكشۇرۇشنى ئاڭلىساڭ لوزىنكاڭنى كەشتىلىدىڭ،
يالغان ساناق دوكلاتنى خامىنىڭغا چەشلىدىڭ،
يىمىكىگە بىئەجەل پاقلىنىڭنى پەشلىدىڭ،
ھەر كۈن كېلىش ۋاقتىنى سەھەر سائەت بەشلىدىڭ،
باھالاشنى كۈتۈشتە ئىپتىخارلىق باشلىقسەن.
.
كۈندە ئاچچىق دەرت يۈتۈپ خىزمەتنى خىل ئىشلىدۇق،
قىبلىگاھ دەپ سىنىپنى بور توزاننى چىشلىدۇق،
شۇنچە ئىشلەپ قولۇڭدا ھەق ئادالەت كۆرمىدۇق،
قانائەتكە رام بولۇپ ئاھ خۇدا! دەپ كىشنىدۇق،
بىزار بولغان خەلقىمىز ئەڭ ئازاپلىق باشلىقسەن.
.
نەزىرىڭدە قاپاق خار قىممىتى چوڭ باراڭنىڭ،
نەزەر سىلىپ قاراپ باق كىم شىپاسى ياراڭنىڭ،
ئىشلىسەكمۇ ئايدا ساق خىيالى بولۇپ ساراڭنىڭ،
تۇتىۋەردىڭ مائاشنى ھەققى باردەك ئاناڭنىڭ،
سۆزلىيەلمەس ھەق ئۈچۈن بىزۇۋانلىق باشلىقسەن.
.
ئەھۋالى شۇ مەكتەپنىڭ ھەقىقەتنى دەپ قويدۇم،
مۇقام كونا بولسىمۇ ئاڭلىسۇن دەپ چەپ قويدۇم،
كىسەللەرگە شىپالىق يىڭى دورا تېپ قويدۇم،
رېتسىپىنى يېنىمغا مەھكەم قاتلاپ سېپ قويدۇم،
مەيلى بولغىن مىنىڭدىن يامانلاقلىق باشلىقسەن.
.
2012-يىل 10-ئاينىڭ 19-كۈنى

مەنبە : ئۆز قەلەم

سىرداش

بىرقىسىم باشلىقلارنى ياخشى  سۆكۈپسىز، قەلىمىڭىز كۈشلۈككەن

ئامان

بەك ياخشى يېزىپسىز بۇرادەر،  تىلى راۋان، ئوي- پىكىر چۈشۈنىشلىك، رىتىم، تۇراق ۋە قاپىيەلىرى دەل جايىغا چۈشكەن ياخشى شېئىر بوپتۇ. قولىڭىز تېخىمۇ بەرىكەتلىك بولغاي.

alahidin

باش ھەرپىگە ئىسمىڭنىڭ‹شوجاڭ›بىللە قېتىغلىق،
سوۋغا-سالام ئۆيۈڭگە خۇددى سەلدەك ئېقىغلىق،
سەندىن كىچىك باشلىقلار تىزىملىككە چېتىغلىق،
يانجۇقۇم بوش دىگەنگە يېشىل چىراق يېقىغلىق،
نەزىرىدە ئەمەلنىڭ ئېھتىياتلىق باشلىقسەن.
ئاۋۇ «يېشىل چىراق»نى «قىزىل چىراق»قا ئالماشتۇرۇپ قوي ۋاھاپ مۇئەللىم. چۈنكى، بۇ باشلىق يانچۇقى بوشلارغا يېشىل چىراق ياندۇرۇپ بەرمەيدۇ!

saba007

زامرران ئەپەندىم ، رىئاللىقنىڭ ئۇچقۇنلىرى چاقناپ تۇرغان بۇ ئىلھامى مۇخەممەسلىرىڭىزدە ،ئادىمىيلىككە گاداي بولغان، ئئقىل-پاراسەت تۇنۇكلىرى ئەخلەت، نىجاسەتلەر بىلەن ئېتىلىپ قالغان قىسمەن شەخسلەر يەنچىلىپ كېتىپتىغۇ....

نونى

قاپىيە ۋە بوغۇم چەكلىمىسى تۈپەيلىدىن قىسمەن سۆزلەرنىڭ شەكلى ئۆزگىرىپ كەتكەنلىكىنى ھېساپقا ئالمىغاندا ، شېئىر ناھايىتى ياخشى چىقىپتۇ.بۇنىڭدىن كېيىن شېئىر يازغاندا ئىملا ۋە تەلەپپۇز قائىدىسىگە ھۆرمەت قىلىشىڭنى سەمىمىي تەۋسىيە قىلىمەن.

سىرداش

قامچا  دىسە   بولىدۇ  بۇ  شىئېرنى