تاغلار

alahidin

تاغلار

ئالاھىدىن ئابدۇرېشىت

زېمىن كۆركىگە قەد بەرگەن سېپىل-قورغانمىدۇ تاغلار؟
يىراق مەنزىل داۋانىدا قەدىم كارۋانمىدۇ تاغلار؟

ياتار باغرىدا سولماس بىر گۈزەللىك-چۈشتىكى دۇنيا،
ئىپار سەلكىن ھىدى گويا يېشىل بوستانمىدۇ تاغلار؟

باھار پەيزىدە چاقنايدۇ، ئەسىرلىك جۇتقا تەپتى بار،
قۇياش چوڭقۇرلۇقىدىن ئوخچىغان گۈلخانمىدۇ تاغلار؟

قىنىدىن ئۈركىگەن دەريا سادا بەرمەكتە چاقماققا،
زېمىننىڭ سۈكۈتىدىن دەۋرىگەن غەليانمىدۇ تاغلار؟

نىگاھلار جىلۋىسىدە قامىتى مەغرۇر ئىلاھىي سىن،
زېمىن يۈكسەكلىكى ئۇندا، ئاڭا قالقانمىدۇ تاغلار؟

قىيا تاشلارنى روھىمدىن غۇلاتتى بۈركۈتى شۇتاپ،
تامام قۇدرەتكە ساھىب ھەم ماڭا دەرمانمىدۇ تاغلار؟

سەبىي تۇيغۇمدا ئاق چوققا، جەسۇر روھىمدا يۈكسەكلىك،
ئانا خەلقىم سىماھىدەك كۈيۈمگە كانمىدۇ تاغلار؟!

1994. 11. 5


بۇ غەزەل«شىنجاڭ گېزىتى»دە ئېلان قىلىنغان.

نونى

رىتورىك سوراقنىڭ ئۈنۈمىدىن جايىدا پايدىلىنىپسەن.

نۇرانە

ئالاھىدىن ئەپەندى سىزنىڭ بەزى شېئىرلىرىڭىز كىشىگە ھوزۇر بېغىشلىسا ، يەنە بىر قىسىم شېئىرلىرىڭىز كىشىنى چوڭقۇر ئويغا سالىدكەن .
شېئىرلىرىڭىز بەك ياقتۇرۇپ ئوقۇيمەن رەھمەت سىزگە .