ئوتتۇرا مەكتەپ ئوقۇغۇچىلىرى ۋە يان تېلېفون

Qol~Ogli

3     -قېتىملىق تېخنىكا ئىنقىلابىنىڭ روشەن بەلگىسى بولغان كومپيۇتېر ئىنسانىيەت دۇنياسىنى كىچىكلىتىپ يىراقنى يېقىن قىلدى، يان تېلېفون تۇرمۇشىمىزدا كەم بولسا بولمايدىغان بىر مۇھىم قىسمىغا ئايلاندى. تەكشۈرۈشلەرگە قارىغاندا، ھازىر يان تېلېفون ئوتتۇرا-باشلانغۇچ مەكتەپ ئوقۇغۇچىلىرىنىڭ تۇرمۇشىدىكى زۆرۈر بۇيۇم بولۇپ قالغان.

     ياخشى ئەخلاقىي پەزىلەت ئوقۇغۇچىلارنىڭ مەكتەپ ھاياتىدىلا ئەمەس پۈتكۈل ئادىمىيلىكتە كەم بولسا بولمايدىغان زۆرۈر شەرت. ئوقۇغۇچىلارنىڭ يان تېلېفون ئىشلىتىشىنى ئىستاتىستىكا قىلىنىشىچە، ئائىلە بىلەن ئالاقىلىشىش %38.55، ئۇچۇر يوللاش %2.17، ئويۇن ئويناش %19.13، تورغا چىقىش %8.99، (مۇڭدىشىش) %44.1 نى ئىگىلەيدىكەن.

     يان تېلېفون ئوقۇغۇچىلارنى بەزلەيدىغان روھىي غالىبلىقنىڭ ۋاسىتىسى بولۇپ قالدى. بۇ ھادىسىلەر يالغۇز ئوقۇتقۇچىلارنىڭ چەكلىشى ئارقىلىقلا ھەل بولمايدۇ، مۇھىمى ئوقۇغۇچىلارنىڭ ئۆز-ئۆزىنى ئىدارە قىلىش ئىقتىدارىنى يېتىلدۈرۈش زۆرۈر.

     تەكشۈرۈشلەرگە قارىغاندا، %68.2 ئوقۇغۇچى، %12.8 ئوقۇتقۇچى، %43.3 ئاتا-ئانا يان تېلېفون ئالاقىلىشىشكە پايدىلىق دەپ قارايدۇ. لېكىن يان تېلېفون ئوقۇغۇچىلار ئارىسىدىكى زۆرۈر بولمىغان ئالاقىنى كۈچەيتىۋېتىدۇ. ئوتتۇرا مەكتەپ ھاياتى ئوقۇغۇچىلارنىڭ ياشلىق دەۋرىگە قەدەم قويۇش باسقۇچى بولۇپ، ھەممىگە قىزىقىدىغان دەۋرى. شۇڭا ساغلام بولمىغان ئۇچۇرلار ئوقۇغۇچىلارنىڭ يامان ئادەت يېتىلدۈرۈشىنىڭ پىلتىسى بولۇپ قېلىشى مۇمكىن. بۇنىڭغا قارىتا ئاتا-ئانىلار پەرزەنتلىرى ئۈچۈن مەخسۇس ۋاقىت ئاجرىتىپ، بالىلارنى تاشقى مۇھىت بىلەن ئۇچرىشىشقا شارائىت يارىتىپ، ساياھەت قىلدۇرۇش، دوستلار ئارا ئۇچرىشىشقا ئېلىپ بېرىشى، پەرزەنتلەرنىڭ ساغلام پىسخىكا يېتىلدۈرۈشىگە سەل قارىماسلىقى زۆرۈر.

     ساغلام تەندە ساپ ئەقىل بولىدۇ. يان تېلېفون ئوقۇغۇچىلارنىڭ ساغلام ئۆسۈپ يېتىلىشىگە زىيانلىق. لوندون ئۇنىۋېرسىتېتىنىڭ ئادەم مېڭىسى ۋە ھۈجەيرە تەتقىقاتى بىلەن شۇغۇللىنىدىغان پىروفېسسور گارنىڭ كۆرسىتىشىچە: ئاق چاشقان ئۇدا تۆت سائەت رادىياتسىيە دولقۇنى ئىچىدە تۇرسا چوڭ مېڭە ھۈجەيرىسىدە، DNA قۇرۇلمىسىدا زىيانغا ئۇچراش ئىزناسى قالىدىكەن. ياش-ئۆسمۈرلەر يان تېلىفون ئىشلەتكەندە چوڭ مېڭىسى قوبۇل قىلغان رادىياتسىيە چوڭلارغا قارىغاندا %50 يۇقىرى بولىدىكەن. ئەمەلىيەتتە ياش-ئۆسمۈرلەرنىڭ ئىممۇنىتېت كۈچى چوڭلارنىڭكىدىن ئاجىز. شۇڭا رادىياتسىيەنىڭ تەسىرىگە تېخىمۇ ئاسان ئۇچرايدۇ.

     ئەمەلىيەت شۇنى ئىسپاتلايدۇكى، يان تېلېفون رادىياتسىيەسى ياش-ئۆسمۈرلەرنىڭ نېرۋا سىستېمىسىغا زىيان كەلتۈرۈپ، باش ئاغرىش، ئەستە تۇتۇش قابىلىيىتى تۆۋەنلەش، ئۇيقۇسى قېچىشتەك ھادىسىلىرىنى كەلتۈرۈپ چىقىرىدۇ. ئىگىلىشىمىزچە، %12 ئوقۇغۇچى دەرسخانىدا يان تېلېفون ئوينايدىكەن، %36 ئوقۇغۇچى ئەھۋالغا قاراپ ئوينايدىكەن. %71.6 ئوقۇغۇچىنىڭ يان تېلېفونى دەرسخانىدا ئوچۇق ھالەتتە تۇرىدىكەن.

      ھازىر ئوقۇغۇچىلاردا كىمنىڭ يان تېلېفونى ئەڭ نوچى، كىمنىڭ يان تېلېفونىنىڭ ئىقتىدارى ئەڭ يۇقىرى، كىمنىڭ يان تېلېفونىنىڭ باھاسى ئەڭ قىممەت ئىكەنلىكىنى سېلىشتۇرۇش ھەتتا دوراپ سېتىۋېلىش ئەھۋاللىرى كۆرۈلمەكتە. ئەينى ۋاقىتتا كومپيۇتېر تۇرمۇشىمىزنىڭ بىر قىسمىغا ئايلىنىپ، ئاتا-ئانىلار پەرزەنتلىرىنى تورخانىلاردىن قانداق قايتۇرۇپ كېلىشنى ئويلاشقان بولسا، ھازىر پەرزەنتلەرنى «مىكرو كومپيۇتېر»دىن قانداق ئاجرىتىش جەمئىيەتنىڭ، مەكتەپنىڭ بولۇپمۇ ئاتا-ئانىلارنىڭ جىددىي ئويلىشىشىغا تېگىشلىك مەسىلىدۇر.



مەنبە:ئۇيغۇر رادىئو تورى

bayawat

ۋەزيەت مۇشۇنداق ھالەتتنى ياراتقانلىقى ئۇچۇن  بۇ يانفۇندىن قۇتۇلماق تەس،
来自: Android客户端

گۈلزار

ھازىر يانفۈن ئوتتۇر مەكتەپ ئوقۇغۇچىلىرىدا ئوموملىشىپلا قالماي بەلكى باشلانغۇچ مەكتەپ ئوقۇغۇچىلىغىمۇ  تەسىرىنى كۆرسەتمەكتە . قايسىلا بالىغا قارىسىڭىز بېشىنى كۆتۈرمەي يانفۇن ئويناۋاتقان ، ئۇلارنىڭ كاللىسىدا  ئۆگىنىش ،   ئاتا - ئانىلار بىلەن مۇڭدىشىش ،   ئۆز -ئارا پىكىر ئالماشتۇرۇش ، سىرتلارغا چىقىپ ساپ ھاۋادىن نەپەسلىنىش دىگەنلەرنى ئويلاپمۇ قويمايدۇ . بۇ مەسىلە ھەممىمىزنى ئويلاندۇرماقتا . قانداق قىلىش كېرەك ؟

يۈسەن

توغرا ،،،يېقىنىدن بۇيان ئۇقۇغۇچىلار ئارىسىدا يانفۇن ئوينايدىغان ئۇقۇغۇچىلار ھەقىقەتەن كۆپىيىپ كەتتى.بىزنىڭ مەكتەپلەردە ئۇقۇغۇچىلارنىڭ يانفۇنى يىغىۋېلىنىپ ئاتا- ئانىسىغا تارقىتىلىپ بىرىلگەن بولسىمۇ ئەمما ئۈنىمى دىگەندەك ياخشى بولمايۋاتىدۇ....