ئەلدەربەگ: مۇدىرنىڭ دەرسى (ھېكايە)

elderbeg

مەخمۇت مۇھەممەت ئەلدەربەگ   

مۇدىرىنىڭ دەرسى

  

(ھېكايە)

تۇرۇپلا مەكتەپ مۇدىرى تۇرغۇننىڭ دەرسىنى ئاڭلاپ بېقىش نىيىتىگە كەلدىم-دە، دەرس ئاڭلاش خاتىرەمنى ئېلىپ ئۇدۇل مۇدىر دەرس بېرىدىغان سىنىپقا قاراپ يول ئالدىم. راستىنى ئېيىتقاندا خىزمەتكە چىققاندىن بىرى مەكتەپ مۇدىرىنىڭ بىرەر سائەت دەرسىنى ئاڭلاپ باقمىغان ئىدىم. پەقەت ئاڭلىغىنىم ئۇنىڭ ھەركۈنى ئەتىگىنى يىغىن زالىدا تومۇرلىرىنى كۆپتۈرۈپ، ھېلىلا يېرىلىپ كېتىدىغان قىياپەتتە ئوقۇتقۇچىلارغا سۆزلىگەنلىرى ئىدى.
_ ئادىلجان دەرس ئاڭلىغىلى ماڭغان ئوخشىمامسىز؟
_ ھەئە، دەرس سەتكىسىگە قارىسام بۇ سائەتتە مەكتەپ مۇدىرىمىزنىڭ دەرسى بار ئىكەن، دەرسىنى ئاڭلاپ تەجرىبە ئىگەللەي دېگەن مەقسەتتە كېتىۋاتىمەن،_ خىزمەتدىشىمنىڭ سورىغان سوئالىغا ئۇدۇللا جاۋاب بەردىم.
_ مەكتەپ مۇدىرى دەرسنى ئالامەت ياخشى سۆزلەيدۇ،_ دېدى خىزمەتدىشىم تامىقىنى چاكىلدىتىپ،_ چوقۇم ياخشى تەجرىبىگە ئىگە بولالايسىز.
_ مەنمۇ شۇ ئۈمىدتە.
ۋاقىت توشاي دېگەندە سىنىپقا كىرىپ ئارقا رەتتىكى پارتىلارنىڭ بىرگە چۆكتۈم. قوڭغىراق چېلىنىپ مەكتەپ مۇدىرى يەڭگىل قەدەملەر بىلەن سىنىپقا كىرىپ كەلدى.
ئوقۇغۇچىلار بىلەن بىرلىكتە ئورنۇمدىن تۇردۇم. مەكتەپ مۇدىرىنىڭ پاختىسى يوغان كۆزلىرى بىلەن كۆزۈم ئۇچرىشىپ قالدى. نېمە سەۋەبتىندۇر ئېيتاۋۇر مەكتەپ مۇدىرى سىنىپ ئىچىنى بىر رەت ئايلىنىپ چىققاندىن كېيىن ئولتۇرۇشقا ئىجازەت بەردى. بىرخىل غەلىتە سېزىم ئىچىدە ئوقۇغۇچىلار بىلەن بىرلىكتە ئولتۇردۇم، كۆزلىرىم مۇنبەردىكى مۇدىرغا تىكىلگەن ئىدى.
_ مەمەتجان!
مەن بىلەن يانداش ئولتۇرغان ۋىجىككىنە ئوغۇل خۇددى توك سوقىۋەتكەندەك ئەندىكىپ ئۆرنىدىن تۇردى.
_ مەمەتئىلى ئەپەندى كىم؟
_ ...
مەمەتجان سورالغان سوئالغا جاۋاب بېرىشنىڭ ئورنىغا تىرنىقىنى تاتلاپ، بېشىنى تۆۋەن سېلىپ تۇراتتى.بۇ خىل ھالەت بىرەر مىنۇت داۋاملىشىپ مۇدىرنىڭ ئاۋازى سىنىپ ئىچىدە يەنە جاراڭلىدى.
_ مەمەتئىلى ئەپەندى كىم دەۋاتىمەن؟
_ ...
مەمەتجان يەنىلا لام-جىم دېمەستىن ئەمدى بەدىنىنى ئىككى تەرەپكە ئىغاڭشىتىپ يەرگە قاراپ تۇراتتى. مۇدىرغا نەزىرىمنى ئاغدۇردۇم. ئۇنىڭ قارامتۇلغا مايىل يۈزلىرى تېخىمۇ قارىداپ، سارغۇچ بۇرۇتلىرى لىكىلداپ كېتىۋاتاتتى.
_ ھەي، لەقۋا! ئىككى كۈنلۈك دەم ئېلىشتا ئۆگىنىش قىلماي ئاناڭنىڭ ئوچىقىغا ئوت قالىدىڭمۇ؟
مۇدىرنىڭ بۇ سۆزىنى ئاڭلاپ، بۇ سۆز مەمەتجانغا ئەمەس گويا ماڭا قارتىلىپ ئېيتىلغاندەك تۇرۇپلا قالدىم. مۇدىر بىرىدە ماڭا، بىرىدە سىنىپتىكى بارلىق ئوقۇغۇچىلارغا سۆزلەۋاتقاندەك قىلاتتى.
_ مەكتەپكە نېمىدەپ كېلىشكىنىڭنى ئۇنتۇپ قېلىشما؟ مەكتەپتە ئوقۇدۇم دەپ، پارتا-ئورۇندۇق ساقلاپ يۈرۈشسەڭ پارتىيە-ھۆكىمەت بەرگەن ئۈچ ۋاخ تاماققا يۈز كېلىشەلەمسەن؟
سىنىپ ئىچىنى بىر خىل سۈرلۈكلۈك قاپلىدى. جۈملىدىن مەنمۇ ئېغىر تىنىشقىمۇ جۈرئەت قىلالماي خۇددى گۇناھكاردەك بېشىمنى تۆۋەن سېلىپ ئولتۇرۇپ كەتتىم.
_ ھازىر ۋەزىيەت چوڭ ياخشى، ئوقويمەن دېسەڭلار يۇقىرلاپ ئوقىيالايسىلەر،_ مۇدىر ئادىتى بويىچە دىمىقىنى قېقىپ سۆزىنى داۋاملاشتۇردى،_ بىرسى شارائىت ياخشى، بىرسى ئاتا-ئاناڭلارنىڭ ئىقتىسادى كۈندىن-كۈنگە ياخشىلىنىۋاتىدۇ، يەنە بىرسى پارتىيە-ھۆكىمەت قوللايدۇ...
مۇدىر نۇرغۇنلىغان ‹‹ بىرسى ›› لارنى مىسال ئېلىپ ئوقۇغۇچىلارغا ئىدىيىۋى تەربىيە بېرىپ بولغاندىن كېيىن دەرس باشلايدىغان ئوخشايدۇ دېگەن ئويدا ئولتۇرسام مۇدىرنىڭ ‹‹ تەربىيە ››سى تۈگەش ئۇياقتا تۇرسۇن تېخىمۇ ئېشىپ بېرىشقا باشلىدى.
_ بۇ مەكتەپتە ياخشى ئوقۇيمەن دېسەڭلار تەشكىلىي تۈزۈملەرگە ئاڭلىق رېئايە قىلىڭلار، تىرناق ئاستىدىن كىر ئىزدەيدىغان، مەكتەپ رەھبەرلىرىنىڭ ئىشلىرىدىن قۇسۇر تاپىدىغان ئىشلارنى قىلماڭلار.
مۇدىرنىڭ سۆزلىرىنى ئاڭلاپ، ئۇنىڭ دەرسخانا ئوقۇتۇشىنى ياخشىلاش ھەققىدە تېخى ھەپتە ئىلگىرى مەكتىۋىمىزدىكى بارلىق ئوقۇتقۇچىلارغا بەرگەن دوكىلاتى ئېسىمگە چۈشتى. ئۇ دوكلاتىدا:‹‹ دەرس مۇقەددەس، ئوقۇتقۇچى چوقۇم ئۆز مەسئۇلىيىتىنى جان پىدالىق بىلەن ئورۇندىشى، 45مېنۇت ۋاقىتتىن ئۈنۈملۈك پايدىلىنىپ كەلگۈسىنىڭ ئىزباسارلىرى بولغان ياش-ئۆسمۈرلەرنى ئەمەلىي بىلىشكە ئىگە قىلىشى لازىم ›› دېگەنىدى.سائىتىمگە قارىدىم. ۋاقىت تۇشۇشقا يەنە بەش مېنۇت بار ئىدى. مەن دەرس ئاڭلاش خاتىرىسىگە نېمە يېزىشنى بىلەلمەي خاتىرەمنى ياپتىم.
ياخشى تەرىپى بۇ قېتىملىق يىغىن ساق 45مېنۇتتا تۈگىدى. مۇدىر قانداق كىرگەن بولسا شۇ پېتى دەرسخانىدىن ئايرىلدى. مەنمۇ ئۇنىڭغا ئەگىشىپ دەرسخانىدىن چىقتىم. كاللامدا بولسا نۇرغۇنلىغان تېگى يوق خىياللار غەليان كۆتۈرمەكتە ئىدى.
(مەزكۇر ئەسەر ‹‹ئىشچىلار ۋاقىت گېزىتى››دە ئېلان قىلىنغان)

pari

ياخشى يېزىلغان ئەسەركەن  ئىجادىيىتىڭىز ئۈزۈلۈپ قالمىسۇن رەھمەت .

ئۆزقۇت

ئاغىنەم مەخمۇتجاننىڭ قەلەمىگە بەرىكەت تىلەيمەن.دوستۇم كۆپرەك ئەسەر يېزىپ تۇرۇڭلار... مۇدىرىنىڭ دەرىسىنى مەڭگۈ باشقلار ئاڭلمايدۇ...

گۈلزار

“موللامنىڭ ەىگىنىنى قىل ،قىلغىنىنى قىلما ” دىگەندەك ،ئەگەر بۇ مۇدىرنىڭ دەرسىنىنى دوراپ دەرس  ئۆتۈپ قويماڭ بولمىسا چۈشەندۈرۈشكىمۇ ئۈلگىرەلمەي قالىسىز . مۇدىرلار  ئۈچۈن بىر سائەتلىك  دەرس ئېلىپ كېلىپسىز .رەھمەت سىزگە .
来自: Android客户端

زەھرا

ئەمەلىيەتتە بۇ مەكتەپ مۇدىرى ناھايىتى ساپاسىز ،باشقىلارغا ھەيۋە قىلىشنى ياخشى كۆرىدىغان كىشى ئىكەن .مائارىپ قوشۇنىمىزدا بۇنداق ساپاسىزلار ئەمەل تۇتمىسا نېمەدېگەن ياخشى بولاتتى -ھە!

بەختىيار(بايقاش

ھەقىقەتەن ياخشى يېزىلغان ھېكايە ئىكەن،رەھمەت سىزگە!

Qol~Ogli

ئىلغار تەرىپى بۇ مودېر دەرس ئۆتىمەن دەپ سىنىپقا كىرىپتۇ ،  بەش يىل مودېرلەق قىلىپ بىرەر سائەت دەرس ئۆتۈش تۈگۈل بىرەر سائەت دەرسمۇ ئاڭلىمايدىغان مودېرلارنىچۇ ......؟

pari

ئۆزقۇت يوللىغان ۋاقتى  2013-7-1 22:49
ئاغىنەم مەخمۇتجاننىڭ قەلەمىگە بەرىكەت تىلەيمەن.دوستۇ ...

بىزنىڭ مۇدېرلار ئۇچۇق دەرس ئۈتۈپ بېرىدۇ .

خۇمارى

مۇدىرلارنىڭ دەرسكە كىرگىنىنى كۆرگىمىنىمگە خېلى يىللار بولۇپ قالدى. ئۇلار ئاغزىدا ۋەزخانلىق قىلىشنىلا بىلىپ قولىدىن ھىچ ئىش كەلمەيدىغان مەكتەپ مۇدىرلىرىمۇ ئاز ئەمەس.ئۇلار مائارىپنى ئەمەل كۆرسىتىش،ئادەم باشقۇرۇشنىڭ كوزۇرى دەپ قارايدۇ .بۇنداق مۇدىرلار باشقۇرۇۋاتقان  مەكتەپتىكى ئۇقۇتقۇچى-ئۇقۇغۇچىلارنىڭ ھالىغا ۋاي جۇمۇ !