ئەي قېرى

泉的男孩

ئەي قېرى
(ساتېرا)

ئالاھىدىن ئابدۇرېشىت

ئىشلىدىڭ مۇنبەردە ئەللىك يىل ئالامەت، ئەي قېرى،
يەتتى يەتمىشكە يېشىڭمۇ ساق-سالامەت، ئەي قېرى،
خىزمىتىڭ يەتتى ئېشىپ، چەكتىڭ رىيازەت، ئەي قېرى،
شۇ سەۋەب تەشكىل ساڭا بەردى ئىجازەت، ئەي قېرى،
چىقمىدىڭ ئەمما ئارامغا دۆت-ھاماقەت، ئەي قېرى.

بەللىرىڭ يادەك ئېگىك، ئاغزىڭدا چىشمۇ قالمىدى،
ئويلىساڭ سەن كۆرمىگەن تومۇزمۇ، قىشمۇ قالمىدى،
بىر زامان خالامۇ باقتىڭ، ئاغرىنىشمۇ قالمىدى،
ساڭا ئاخىر بۆلگۈدەك مەكتەپتە ئىشمۇ قالمىدى،
قالمىدى ئەمدى مانا سەندە ئىناۋەت، ئەي قېرى.

«ئىلتىماس»ىڭغا مۇدىر تەستىقمۇ سالدى نەچچە رەت،
سەن ئۈچۈن قاتراپ يۈرۈپ جاۋابمۇ ئالدى نەچچە رەت،
ۋە لېكىن تەستىق دېگەن كۆتۈڭدە قالدى نەچچە رەت،
سېنى «خوش!» دەپ ئۇزۇتۇپ ئېغىزمۇ تالدى نەچچە رەت،
جان دېگەن تەندە ھامان تۆت كۈن ئامانەت، ئەي قېرى.

ئۆسىمىش ئىش ھەققى دەپ يۈردۈڭ ئۆزۈڭنى خوش قىلىپ،
رودىپايدەك سۆرۈلۈپ بەرمەي ئورۇننى بوش قىلىپ،
زارلىماس كىممۇ ئىشىڭنى بۆلسە خەققە قوش قىلىپ،
پۇل دېسە، ئۇنۋان دېسە يۈرسەڭ بىراۋنى «پوش» قىلىپ؟
يوقمىدۇ سەندە پەقەت شۈكرى-قانائەت، ئەي قېرى؟

ئىش دېسە كەلدىڭ ئەجەپ يەتمىش يېشىڭنى پەش قىلىپ،
چىڭقىسا دوختۇرغا چاپتىڭ پۇت-قولۇڭنى لەش قىلىپ،
كۆزلىرىم كۆرمەس دېدىڭ، قەستەنگە تۆتنى بەش قىلىپ،
بىنومۇس، داپ يۈزلۈكۈڭ كەلدى كۆڭۈلنى غەش قىلىپ،
بىزدىكى ۋىجدانغا سەن قىلدىڭ خىيانەت، ئەي قېرى.

پۇتلۇشۇپ يۈرگەچكەسەن، بىزلەرگە نۆۋەت كەلمىدى،
ئىلتىماس يازساق ئارامغا زادى پۇرسەت كەلمىدى،
يەنە يۈز يىل ياشىماققا ياكى رۇخسەت كەلمىدى،
خورىدى جان قىينىلىپ خوپ، تەنگە يا ئەت كەلمىدى،
سەن تۈپەيلى كەلدى بىزگە كۆپ مالامەت، ئەي قېرى.

كەلمىدى ئۇنۋانغا سان، توشتى دېدى نىسپەت يەنە،
ياتقىنىڭ ياتقان ئىگەللەپ كەلسىمۇ نۆۋەت يەنە،
توشتى دەپ ئىش ئورنىمۇ، چۈشتى تېخى ھۆججەت يەنە،
يەنە ئىشلەيمەن دېدىڭ، بەردىڭ تالاي تىلخەت يەنە،
يوپۇرۇپ يۈردۈڭ قۇلاق، بولماي خىجالەت، ئەي قېرى.

تېز بوشات ئورۇننى ئەمدى، دەيدۇ ھەممە «خەپ!» سېنى،
قوغلىساق سۈرگۈنگە چۈشكەن مادىدەك بىئەپ سېنى،
سېسىتار كۇس-كۇس بىلەن گوياكى تاپتەك گەپ سېنى،
ئۆلۈكۈڭنى يولدا قويغاي تويمىغان شۇ نەپ سېنى،
قېرىغاننىڭ يۈزىگە چاچما نىجاسەت، ئەي قېرى!

تەۋپىق تورىدىن ياقتۇرۇپ قالغاچقا يوللىدىم

بەختىيار(بايقاش

ئۇستاز ئالاھىدىن ئابدۇرېشىتنىڭ يازغان ھەربىر شېئىرنى ياقتۇرۇپ ئوقۇيمەن،رەھمەت سىزگە!

بەختىيار(بايقاش

بۇ شېئىرلارنى ئوقۇۋىتىپ ئىختىيارسىز ھالدا ئۆمەرجان ئالىم ئېيتقان مۇنۇ ناخشا يادىمغا كېلىپ قالدى:
‹‹ تۇغماس توخۇ ياتىدۇ،ئۇۋلىقىنى ئىگەللەپ،
تۇغمايدۇ يا كاتەكنى تۇغقانلارغا بەرمەيدۇ...››
دېمەك،بۇ خىل كىشلەرمۇ يوق ئەمەس.

كەشپى

ئالاھىدىن مۇئەللىمنىڭ تېنىگە سالامەتلىك يار بولسۇن ، ساتىرا ھەقىقەتەنمۇ ياخشى يېزىلىپتۇ .

Alyar08

ياخشى يېزىلغان شىئېر ئىكەن. قەلەم ئىگىسىگە ۋە يوللىغان تېما ئىگىسىگە رەھمەت.
بىزنىڭ دىيارىمىزدا پىنسىيىگە ئىلتىماس يازىدىغانلار كۆپ، ئەمما تۈرلۈك سەۋەپلەر بىلەن تەستىقلانمايۋاتىدۇ. كۆپ قىسىم پىشقەدەملەرنىڭ قارىشى تەن سالامەتلىكى ياخشىراق ۋاقتىدا دەم ئېلىشكە چىقىپ، ئارامخۇدا كۈننىڭ سېرىقىنى كۆرۈش. بىزنىڭ بىرنەچچە سەبدىشىمىز پىنسىيىگە چىقىپلا  ئۇزۇن ئۆتمەي بىزدىن مەڭەۈلۈك خوشلاشتى. .....
دەم ئېلىش يېشى ياكى خىزمەت تارىخى سەل مۇۋاپپىقلاشتۇرۇلسا ياخشى بۇلامدىكىن دەيمەن.

ئۇيغۇرۇم

ھەقىقەتەن ياخشى يېزىلغان شېئىر ئىكەن مەنمۇ بەك تەسىرلەندىم،  يېزىپ تۇرۇڭ! يوللاپ تۇرۇڭ ! قەلىمىڭىز ھەرۋاقىت تەۋرەپ بارچە دىللارنى سۈيۈندۇرسۇن .


    كۆپ رەھمەت ....................................!

Qol~Ogli

پېشقەدەملەرگە بىلدۈرگەن «ھۆرمىتىڭىز» گە  « ئاپىرىن » . سىزمۇ بارارسىز شۇ ياشقا ؟