بولدى، ئۇنۋان ئالمايمەن (نونى)

نونى

بولدى، ئۇنۋان ئالمايمەن

ئۇنۋان سېنىڭ ، ئېلىۋال ! بولدى ،ئۇنۋان ئالمايمەن ،
سەنلا ئېلىپ بېيىۋال ! بولدى، ئۇنۋان ئالمايمەن ،
نىكاھلىنىپ تېگىۋال! بولدى ،ئۇنۋان ئالمايمەن،
يۈرىكىڭگە تېڭىۋال ! بولدى ئۇنۋان ئالمايمەن ،
راست گېپىم بۇ بىلىۋال! بولدى،ئۇنۋان ئالمايمەن .
.
يىگىرمە يىل ئۆتۈپتۇ تالاشقانغا يول قويۇپ ،
يۈرمەپتىمەن بىراۋغا خوش-خوش ئېيتىپ دوڭغۇيۇپ ،
توخۇ سويسام تەپمىدى ،ئالدى خەقلەر قوي سويۇپ ،
ئالدى ھەتتا بەزىلەر ئاقچا قويۇپ - پۇل قويۇپ ،
سەنمۇ دەرھال سېتىۋال ! بولدى ،ئۇنۋان ئالمايمەن .
.
سالالمايمەن داستىخان ،پاقلان ،قېتىق زاغرام يوق ،
مەن بىر قوپال ئەركىشى ،سېنىڭكىدەك ياڭزام يوق ،
ئۇتالمايمەن كۆڭۈلنى ،تولغان بەدەن -ساغرام يوق ،
ئۈنسىز تۆھپە قوشىمەن ،چالىدىغان ناغرام يوق ،
سەن ناغراڭنى چېلىۋال ! بولدى ،ئۇنۋان ئالمايمەن .
.
ئۇنۋان ئۈچۈن ساتمايمەن پەزىلەتنى-قىممەتنى ،
تالىمايمەن ئىت كەبى ئۆز قەۋمىمنى -مىللەتنى ،
كولىمايمەن ئۆزگىنىڭ يېغىرىنى -ئىللەتنى ،
يېزىپ بېرەي پۈتمىسەڭ بەش مىنۇتتا ھۆججەتنى ،
ئېلىپ ئابروي تېپىۋال! بولدى ،ئۇنۋان ئالمايمەن .
.
ئەۋلاد غېمى قىپقويدى مېنى خىزمەت تەلۋىسى ،
ئۆتۈپ كەتتى شۇنچە يىل قىلماي نومۇر غەلۋىسى ،
توشسا ئەمدى ئامال يوق يۈرىكىمنىڭ سەبرىسى،
چۈنكى ، ئۇنۋان ساڭا باپ - سەن باشلىقنىڭ نەۋرىسى ،
مۇرادىڭغا يېتىۋال ! بولدى، ئۇنۋان ئالمايمەن .
.
ماڭغان ھەر بىر ئىزىمدىن نىشان قالسا كۇپايە ،
تۆككەن ئەجىر -تەرىمدىن ئەل نەپ ئالسا كۇپايە،
بىر يۇتۇم داغ چاي بىلەن دوسقان سالسا كۇپايە ،
شادلىنىپ ئۆز بەختىدىن سۇناي چالسا كۇپايە ،
نېمە قىلساڭ قىلىۋال  ! بولدى ،ئۇنۋان ئالمايمەن .

مەنبە :ئۆز قەلەم

2013-يىل 5-ئاينىڭ20-كۈنى
قەشقەر مائارىپ ئىنىستىتوتى

ئەزىزى

ئوخخو ،كارامەت بەلەن يېزۋىتىسپسىز جۇمۇ، مۇشۇ ساترانى كۆرۇپ مىنىڭمۇ ئۇنۋان ئالغۇم كەلمەيۋاتىدۇ. بۇنى ئالماقنىڭ تەسلىكىنى بىر دىمەڭ

كەشپى

ياخشى يېزىلغان ساتىرا ئىكەن ،  ئوقۇپ بەھىرلەندىم ، رەخمەت سىزگە .

كۈنقۇت

ھەقىقەتەن ياخشى يېزىلغان ساتىرا ئىكەن، ھازىر دىمىسىمۇ ئۇنۋان ئالماق ھەقىقەتەن تەس بولۇپ كەتتى.

باتۇق

مۇشۇ ئۇنۋان  دىسە تارىختىكى تەڭسىز شەرتنامىلەر كۆز ئالدىمغا كىلىدۇ.

ئامان

كارامەت يېزىپ قويۇپسىز نونى بۇرادەر، شېئىرىڭىزنى ئوقۇۋېتىپ كۈلۈپ تېلىقىپ قالاي دىدىم. ئۇنۋان ئېلىش ئۈچۈن ئۆزىنىڭ كىشىلىك قەدىر-قىممىتى ۋە ئار-نۇمۇسىنى قولدىن بېرىپ قويۇۋاتقان ئوقۇتقۇچىلىرىمىزنى، ئۇنۋان باھالاشنى نەپ ئېلىشنىڭ ۋاستىسى قىلىۋالغان مەنسەپدارلىرىمىزنى تازا كېلىشتۈرۈپ ھەجۋى قىپسىز.
قولىڭىزغا دەرت كەلمىگەي، ئىسىل ئىجادى يازمىلىرىڭىز ئۈزۈلۈپ قالمىغاي، رەھمەت.

سەييارە0

ئوقۇتقۇچىلارنىڭ ئۇنىۋان ئېلشىدىكى نەخ گەپنىلا دەپسىز.

زەپەر

بەك ياخشى يېزىپ قۇيۇپسىز نونى ئەپەندىم .ئۈنۋان ئېلىش ئۈچۈن ئۈزىنىڭ كىشىلىك قەدىر قىممىتىنى يۇقاتقان پەشكەشلەرنى ياخشى جايلاپسىزدە . ئۈنۋان ئېىش شۇنچىۋىلا قىيىنمۇدۇ. مەن بەك ئاسانلا ئالغانتىم . ئۇنى دىمىسەممۇ جەمىيەت ھازىر بۇزۇلۇپ كەتتى

نونى

مۇنبەرداشلارنىڭ  ئىلھام بەرگىنىگە كۆپ رەھمەت !

ئىلھام88

رەخمەت ، قولۇڭىزغا دەرت بەرمىسۇن ! ئىككىمىز تەغدىرداش ئىكەنمىز ماڭىمۇ 20يىل بولدى ئالى ئۇنۋان ئالالمىغىلى؟