ئانا لىرىكىسى

Qol~Ogli

           بىرنەچچە كۈندىن بېرى سەپەر ئۈستىدە بولغانلىقىم ئۈچۈن مۇنبەرگە كىرەلمىدىم ،نۇرغۇن ئېسىل تېمىلار يوللىنىپتۇ ،ئەجىرىڭلارغا تەشەككۈر ئەزىزلەر، مۇنبەرگە قۇرۇقلا كىرىشنى ئەپسىز بىلىپ، ياش شائىر «خانتەڭرى ئەدەبىيات مۇكاپاتى»نىڭ ساھىبى ئەكبەر ئىمام كۆك بۆرىنىڭ ئۆزەم ياقتۇرۇپ ئوقۇيدىغان شېئىرىنى ئالغاچ كەلدىم، ياقتۇرغايسىلەر :

ئانا لىرىكىسى
(1)
قەلبىمدە بىر دەستە بەخت بار ئانا،
قوبۇل ئەت مەن ئۇنى تۇتاي بىر ساڭا.
سۈزۈك تاڭ زىباسى كۈلگەن چېھرىڭدە،
بىر سەبىي يۈرەكتەك كۈلۈپ بەر ماڭا.

بىر تامچە نۇر بولۇپ ئېرىپ كەتكۈم بار،
جەننەتتەك بىباھا باغرىڭدا ئانا.
سەن بىلەن بىر چۈشنى تەڭ كۆرگۈم بار ھەم،
گۈل بىلەن بېزەلگەن كۆلنىڭ بويىدا.

بىر كۈي بار سەن ئۈچۈن ياڭرايدۇ ئانا،
ئېھتىمال ئاڭلالماي يۈرگەنسەن ئۇنى.
بۇ يۈرەك ئەركىنلىك لىق توغان تۈرمە،
روھلارنىڭ تەكتىدە ئۇنىڭ يىلتىزى.
(2)
سەن بىر قۇر نەزمىگە ئايلانساڭ ئانا،
مەن سېنى يازارمەن قايسى شەكىلدە.
تاراملاپ ياش تۆكۈپ كېتەرمەنمۇ -يا،
رۇخسارىڭ رەڭلەنگەن ئاتەش كۆزۈمدە.

ئاددى بىر شېئىرۋاز ئوغلۇڭمەن ئانا،
بىر كوبلېت قاپىيەسىز لىرىك شېئىردەك.
ساۋاتلىق بولسىمۇ پەرىشتا-خىزىر،
ئوقالماس ئېھ، ئۇلار مېنى سېنىڭدەك.

تەڭرىنىڭ قۇت نامى كەزگەن دىلىمدا،
تەڭرىنىڭ نۇرىدەك پارلايسەن ئانا.
مەن ساڭا بىر دەستە سۈكۈتتىن بۆلەك،
نەچچە قۇر نەزمىلا پۈتتۈممەن مانا.

«ئاخىرقى پۇرسەت»توپلىمىدىن

بەختىيار(بايقاش

رەھمەت سىزگە،بۇ شېئىرنى ئوقۇپ بەكمۇ سۆيۈندۈم.

گۈلزار

بىر تامچە نۇر بولۇپ ئېرىپ كەتكۈم بار،
جەننەتتەك بىباھا باغرىڭدا ئانا.
سەن بىلەن بىر چۈشنى تەڭ كۆرگۈم بار ھەم،
گۈل بىلەن بېزەلگەن كۆلنىڭ بويىدا.

بۇ ھەر بىر ئىنساننىڭ يۈرەك سۆزى ئىكەن . ئانا باغرىغا قانغان كىم بار دەيسىز . ئانا باغرى  ئىللىق بىر ماكان . ئۇ  بارلىق ئازاپ - ئوقۇبەتلەرنى سىڭدۈرەلەيدۇ ھەم مۈزلىغان يۈرەكلەرنى ئىللىتالايدۇ .
مەن بىر ئانا بولساممۇ يەنىلا ئاشۇ ئانا باغرىغا قانمىغان بىر ئانىمەن. ئانامنىڭ باغىرىدا مەڭگۈ پەپىلنىپ ئۆتۈشنى ئارزۇ قىلىمەن ، قايغۇ - ھەسرەتلىرىمنى  ئانامنىڭ باغرىدا ئۇنتۇيمەن .
رەھمەت  

بايقاش

ئانىلىرىمىزنى قانچىلىق تەرىپلىسەك ئەرزىيدۇ. ھەرقېتىم ئانا توغرىسىدا گەپ بولسا يۈرىكىم سېغىنىش ئىلكىدە تىپىرلاپ كىتىدۇ. ئانىلىرىمىز سالامەت بولسۇن، توغراق يېشىدا ياشىسۇن. بۇ شىئېرنى ياقتۇردۇم.

زەپەر

ئانىلارنى ياخشى تەرىپلەپسىز .  شۇ جاپاكەش ئانىلارنى قانچىلىك تەرىپلىسەكمۇ ئەرزىيدۇ . رەخەمت سىزگە . مىھرىبان ئانىلارغا كۈچ مەدەت بىرەيلى