خەلقىم سەن كۈلسەڭ كۈلىمەن!

ئەلتۈرك


            خەلقىم سەن كۈلسەڭ كۈلىمەن

         (تۇرسۇن نىياز غەزىلىگە تەخمىس)

خەلقىم سەن كۈلسەڭ كۈلىمەن كۈلمىسەڭ كۈلگۈنۈم يوقتۇر،
بەختىم كۈلگەن بىر سەن بىلەن سەنسىز خۇشال كۈنۈم يوقتۇر.
چۈنكى سەنسىز ھەقىقەتتىن سۆزلەيدىغان سۆزۈم يوقتۇر.
جاھان گۈلزارىدا خەلقىم سىنىڭدەك ئۇز گۈلۈم يوقتۇر،
كى بولسا باشقىدىن بىرسى كۆرۈشكە كۆز نۇرۇم يوقتۇر.

قەدىم ئۇلۇغ تارىخىڭنى يۇلتۇزلار يورۇتتى ئاقلاپ،
يەپ تۇرسىمۇ زۇلمەت ئۇزاق تارىخىڭ نۇرىنى يالماپ.
ھەقىقەت كۆمۈلمەس ئىكەن ھەرقانچە كۆمسىمۇ قاتراپ،
تۇرار ئەنە تۈمەن يىللىق شەرەپلىك تارىخىڭ چاقناپ،
بۈيۈك نامىڭ ئاتالماستىن يېزىلغان قۇرلۇرۇم يوقتۇر.

دۇنياۋى ساز قامۇسلىرىڭدىن پەخىرلىك ئۈزۈكلۈكسەن،
گۈزەللىكىڭگە ياراشقان نۇر ئۈزۈكتە  سۆيۈملۈكسەن.
قاراپ ھەرگىز تويمايمەن گۈزەللىكىڭگە ئۆمۈرلۈكسەن،
جاھان رەنالىرى ئىچرە سۆيۈملۈكسەن كۆيۈملۈكسەن،
سىنىڭدەك مىھرىبان غەمخان يۆلەنچىم مۇڭدۇشۇم يوقتۇر.

گۈزەل تاج دوپپاڭنى كەيسەڭ بولىسەن ئەجەپ ئىسكەتلىك،
تارىخىڭمۇ بەك ئۇزۇن پۈتۈلگەن تارىخقا تىلخەتلىك.
ئەرتۇڭا ئەۋلادى بولغاچ تارىختا سەن بەك قۇدرەتلىك،
جاسارەتلىك باھادىرسەن ئالىپ ئەرتۇڭا خىسلەتلىك،
گۈزەل ئەخلاق پەزىلەتتە پەخىرلەنمەس كۈنۈم يوقتۇر.

سىنىڭسىز مەن  يوقالغايمەن بولۇپ بىرتال چۈرۈك كەسلەم،
كىسەل بولسام تېپىلماس ھېچ سىنىڭسىز بىر شىپا مەلھەم.
سەندىن قۇۋەتكە تولغاچمەن بۇلاقىڭدىن ئىچىپ زەمزەم،
ياشاپ كەلدىم گۆدەكلىكتىن پىشىڭگە باش قويۇپ ھەردەم،
بۈيۈك ئەجرىڭنى ئاقلاشتىن بۆلەك مەقسەت ئويۇم يوقتۇر.

مۇرادىمدۇر بەختىڭ ئۈچۈن ئانا تۇپراققا تېرىلسام،
گۈزەللىكىڭ ئۈچۈن ھەمىشە گۈل بولۇپلا ئېچىلسام.
نۇرغا پۈركۈپ چىرايىڭنى جاھالەت باغرىنى تىلسام،
قەسەمبىللا ئىرادەمگە مۇخالىپ زەررە ئىش قىلسام،
يورۇق دۇنيا ماڭا زۇلمەت مېڭىشقا تۈز يولۇم يوقتۇر.

مۇرادىڭغا يىتىپ خەلقىم كۆڭلۈڭنى خوشال ئەتكەندە،
باھار قۇياشى چىقىپ ھەردەم غەم نەشتىرى كەتكەندە.
بەختىڭدىن كۈلۈپ ئايدا كۆڭلۈمگە كۈلكە ئەۋەتكەندە،
يېڭى شانلىق سەپەردە كۆزلىگەن مەنزىلگە يەتكەندە،
شۇكۈنكى بەختىيار بايرام كۈنىڭدەك چوڭ تويۇم يوقتۇر.

2013-نورۇز

زەپەر

مەنبەسىنى ئەسكەرتىپ قۇيۇڭ

گۈلزار

خەلقىم سەن كۈلسەڭ كۈلىمەن كۈلمىسەڭ كۈلگۈنۈم يوقتۇر،
بەختىم كۈلگەن بىر سەن بىلەن سەنسىز خۇشال كۈنۈم يوقتۇر.
چۈنكى سەنسىز ھەقىقەتتىن سۆزلەيدىغان سۆزۈم يوقتۇر.
جاھان گۈلزارىدا خەلقىم سىنىڭدەك ئۇز گۈلۈم يوقتۇر،
كى بولسا باشقىدىن بىرسى كۆرۈشكە كۆز نۇرۇم يوقتۇر.

بەك ياقتۇردۇم رەھمەت . بۇندىن كېيىنكى ئىجادىيەتلىرىڭىزگە ئۇتۇق تىلەيمەن .

مەتتۇردى

بەك ياقتۇردۇم رەھمەت . بۇندىن كېيىنكى ئىجادىيەتلىرىڭىزگە ئۇتۇق تىلەيمەن .

ئەلتۈرك

تورداشلارنىڭ ئىلھام بەرگىنىگە رەھمەت!