«1–ئۆكتەبىر» ئالتۇن ھەپتىلىكىدە ئاپتونوم رايونىمىز 2 مىليون 834 مىڭ 800 ئادەم قېتىم ساياھەتچىنى كۈتۈۋالدى

ئاپتونوم رايونلۇق بايرام ۋە دەم ئېلىش كۈنلىرى ئىشخانىسىنىڭ مۇدىرى ، ئاپتونوم رايونلۇق ساياھەت ئىدارىسىنىڭ باشلىقى ئىنئام نەسرىدىن ‹‹1–ئۆكتەبىر›› ئالتۇن ھەپتىلىكىگە ئالاقىدار ئەھۋاللارنى ئۇقتۇرۇش قىلدى

   : 7–ئۆكتەبىر ئېچىلغان ئاپتونوم رايوننىڭ 2011–يىللىق ‹‹1–ئۆكتەبىر›› ئالتۇن ھەپتىلىكى بايرام ۋە دەم ئېلىش كۈنلىرىدىكى ساياھەت خۇلاسە يىغىنىدىن ئىگىلىنىشىچە ، بۇ يىلقى ‹‹1–ئۆكتەبىر›› ئالتۇن ھەپتىلىكى مەملىكەت بويىچە بايرام ۋە دەم ئېلىش كۈنلىرىدىكى ساياھەت خىزمىتى مېخانىزمى تۇرغۇزۇلغان ۋە ئىجرا قىلىنغاندىن بۇيانقى 28–قېتىملىق ئالتۇن ھەپتە بولۇپ ، بۇ قېتىمقى بايرام ۋە دەم ئېلىش كۈنلىرىدىكى ساياھەتتە ‹‹بىخەتەر ، تەرتىپلىك ، سۈپەتلىك ، ئۈنۈملۈك ›› تىن ئىبارەت ‹‹تۆتنى بىرلىككە كەلتۈرۈش ›› نىشانى ئەمەلگە ئاشۇرۇلۇپ ، دۆلەت ئىچىدىكى جەمئىي 2 مىليون 834 مىڭ 800 (ئادەم قېتىم) ساياھەتچى كۈتۈۋېلىنىپ ، ئوخشاش مەزگىلدىكىدىن %30.4 ئاشقان .

   ئاپتونوم رايونلۇق بايرام ۋە دەم ئېلىش كۈنلىرى ئىشخانىسىنىڭ مۇدىرى ، ئاپتونوم رايونلۇق ساياھەت ئىدارىسىنىڭ باشلىقى ئىنئام نەسرىدىن مۇخبىرغا مۇنداق دېدى : ‹‹1–ئۆكتەبىر›› ئالتۇن ھەپتىلىكى مەزگىلىدىكى بىخەتەرلىك مەسىلىسىگە كاپالەتلىك قىلىش ئۈچۈن ، بايرام ۋە دەم ئېلىش مەزگىلىدە ، ھەر دەرىجىلىك بايرام ۋە دەم ئېلىش كۈنلىرى ئىشخانىلىرى بايرامدىن بۇرۇن ۋە بايرامدا ساياھەت ، ئوت ئۆچۈرۈش ، قاتناش ، جامائەت خەۋپسىزلىكى قاتارلىق ئالاقىدار تارماقلارنى تەشكىللەپ ، ئوت ئۆچۈرۈش ، يول قاتنىشى ، ئالاھىدە ئەسلىھە ، يېمەكلىك تازىلىقى ، مەدەنىيەت كۆڭۈل ئېچىش سورۇنلىرى قاتارلىقلارنىڭ بىخەتەرلىكىنى چوڭ تەكشۈرۈپ ، ھادىسە ئالامىتى ۋە بىخەتەرلىك يوشۇرۇن خەۋپلىرىنى تۈگىتىپ ، ساياھەت بىخەتەرلىك ھادىسىلىرىنى ئۈنۈملۈك ساقلاندى . بۇ يىل ئاپتونوم رايونىمىزدا ساياھەت بىخەتەرلىك ھادىسىلىرى يۈز بەرمىدى .

     ئاپتونوم رايونلۇق ساياھەت ئىدارىسىنىڭ مۇئاۋىن باشلىقى ليۇ مورەننىڭ تونۇشتۇرۇشىچە ، ‹‹1–ئۆكتەبىر›› ئالتۇن ھەپتىلىكى مەزگىلىدە ، ئاپتونوم رايونىمىزدىكى تەڭرىتاغ بوغدا كۆلى ، بۇيلۇق ، قاناس، نارات قاتارلىق 5A دەرىجىلىك بىر قەدەر داڭلىق تۆت مەنزىرە رايونى ئىچكىرى ئۆلكىلەردىكى ساياھەتچىلەر خېلىلا جەلپ قىلغان ، كۈتۈۋالغان ساياھەتچى سانى ئومۇمىي كۈتۈۋېلىش مىقدارىنىڭ %20 ىنى ئىگىلىگەن، گەۋدىلىك ئۆزگىچىلىككە ئىگە تۇرپان رايونىنىڭ ئالتۇن ھەپتىلىكتە كۈتۈۋالغان ساياھەتچىسى ئومۇمىي كۈتۈۋېلىش مىقدارىنىڭ %30 ىدىن ئېشىپ كەتكەن .

   ئىگىلىنىشىچە ، ئاپتونوم رايونىمىزنىڭ 2011–يىللىق ساياھەت كۈتۈۋېلىش نىشانى 36 مىليون 300 مىڭ ئادەم قېتىم بولۇپ ، بۇنىڭ ئىچىدە ، دۆلەت ئىچىدىكى ساياھەت كۈتۈۋېلىش مىقدارى 35 مىليون (ئادەم قېتىم) ، خەلقئارا ساياھەت كۈتۈۋېلىش مىقدارى 1 مىليون 300 مىڭ ئىكەن .

ھەمبەھىرلىنىڭ