80 ياشقا كىرگەن شىۋىتسىيىلىك شائىر نوبېل ئەدەبىيات مۇكاپاتىغا ئېرىشتى

0 2011-10-09 11:35:13 تىڭشۈن خەۋىرى گۈلمىرە

T|T:خەت رەزمىرى

چەتئەل ئاخبارات ۋاستىلىرىنىڭ خەۋەر قىلىشىچە، بېيجىڭ ۋاقتى، 6-ئۆكتەبىر سائەت 19 دا (ستوكخولم ۋاقتى 6-ئۆكتەبىر سائەت 13دە)، نوبېل ئەدەبىيات مۇكاپاتىغا ئېرىشكۈچى ئېلان قىلىنغان بولۇپ، شىۋىتسىيىلىك 80 ياشقا كىرگەن شائىر توماس (托马斯-特兰斯特勒默) بۇ ئالاھىدە شەرەپكە ئېرىشكەن. نوبېل ئەدەبىيات مۇكاپاتى باھالاش ھەيئىتىدىكىلەر ئۇنىڭغا باھا بېرىپ مۇنداق دېگەن: ئۇ ئىخچام، مۇكەممەل بولغان كۆرۈنۈش ئارقىلىق، بىزنى رىئاللىقنى تونۇشىمىز ئۈچۈن پۈتۈنلەي يېڭى بولغان بىر يول بىلەن تەمىنلىدى.

توماس بۇ يىل 80 ياشقا كىرگەن بولۇپ، 1931-يىلى شىۋىتسىيىنىڭ ستوكخولم شەھىرىدە تۇغۇلغان، شائىر، تەرجىمان ۋە پسخولوگ. 1954-يىلى 23 ياشقا كىرگەن توماس ئۆزىنىڭ تۇنجى شېئىرلار توپلىمى «ئون يەتتە پارچە شېئىر» نى ئېلان قىلىپ، دۆلەت ئىچى شۇنداقلا غەربىي ياۋروپانىڭ ئەدەبىيات ساھەسىنى زىلزىلىگە سالىدۇ. ھازىرغىچە، ئۇ جەمئىي 163 پارچە شېئىر ئېلان قىلغان بولۇپ، ۋەكىل خارەكتىرلىك شېئىرلار توپلىمىدىن يەنە، «سەپەردىكى مەخپىيەتلىك»، «يېرىم تۈگىتىلگەن ئاسمان»، «تىمبىر ۋە ئىز»، «ياۋايىلىققا تولغان مەيدان»، «ئازابلىق گوندولا» قاتارلىقلار بار.

1990-يىلى، توماس مېڭە قان قويۇلۇش كېسىلىگە گىرىپتار بولۇپ، بەدىنىنىڭ يېرىمى پالەچ بولۇپ قالغان بولسىمۇ، ئەمما ئۇ يەنىلا قەيسەرلىك بىلەن شېئىرلار توپلىمى يېزىش بىلەن شۇغۇللىنىدۇ. ئۇ ھازىرقى زامان ياۋروپا شېئىر ساھەسىدىكى ئەڭ كۆزگە كۆرۈنگەن سىمۋولىزم ۋە سۇررىئالىزىم ئۇستازى دەپ ئاتىلىپ، ئىلگىرى كۆپ قېتىم نوبېل ئەدەبىيات مۇكاپاتىدا نامزاتلىققا كۆرسىتىلگەن.

ئىگىلىنىشچە، بۇنىڭدىن بۇرۇن ئاخبارات ۋاستىلىرى ئۇنىڭ 2011-يىللىق نوبېل ئەدەبىيات مۇكاپاتىغا ئېرىشىشىدە شەك يوق دەپ مۇلاھىزە قىلغانىكەن. 12-ئاينىڭ 10-كۈنى، ئۇ 1 مىليون 460 مىڭ دوللار مۇكاپات سوممىسىغا ئېرىشىدۇ.