ئاپتونوم رايونىمىز بۇ يىل يېزا تايانچ ئوقۇتقۇچىسىدىن 12مىڭنى تەربىيەلەيدۇ

‹‹مائارىپ مىنىستىرلىقى، مالىيە مىنىستىرلىقىنىڭ <دۆلەتلىك تەربىيەلەش پىلانى> شىنجاڭ يېزا تايانچ ئوقۇتقۇچىلىرىنى تەربىيەلەش تۈرى›› بويىچە ئوقۇش پۈتكۈزۈش مۇراسىمى 29 – ئاۋغۇست شىنجاڭ پېداگوگىكا ئۇنىۋېرسىتېتىدا ئۆتكۈزۈلدى. پائالىيەت نەق مەيدانىدىن ئۇقۇشىمچە، مائارىپ مىنىستىرلىقى شىنجاڭنىڭ 2011 – يىللىق ‹‹دۆلەتلىك تەربىيەلەش پىلانى›› تۈرىگە يۈكسەك ئەھمىيەت بېرىپ، ئاپتونوم رايونىمىزغا بۇلتۇرقى 16 مىليون يۈەن سېلىنما ئاساسىدا يەنە 2 مىليون يۈەن كۆپەيتىپ بېرىپ، بۇ يىلقى ‹‹دۆلەتلىك تەربىيەلەش پىلانى›› ئومۇمىي سوممىسىنى 18 مىليون يۈەنگە يەتكۈزگەن.
ئۇقۇشىمچە، مەملىكەتلىك مائارىپ خىزمەت يىغىنى، دۆلەتنىڭ ئوتتۇرا باسقۇچلۇق مائارىپ ئىسلاھاتى ۋە تەرەققىياتى پىلان تېزىسىنىڭ روھىنى ئەمەلىيلەشتۈرۈش ئۈچۈن، مائارىپ مىنىستىرلىقى بىلەن مالىيە مىنىستىرلىقى 2010 – يىلىدىن باشلاپ ‹‹ئوتتۇرا، باشلانغۇچ مەكتەپ ئوقۇتقۇچىلىرىنى دۆلەت دەرىجىلىك تەربىيەلەش پىلانى›› (قىسقارتىلىپ ‹‹دۆلەتلىك تەربىيەلەش پىلانى›› دېيىلدى)نى يولغا قويۇشنى قارار قىلغان. ‹‹دۆلەتلىك تەربىيەلەش پىلانى›› ‹‹ئوتتۇرا، باشلانغۇچ مەكتەپ ئوقۇتقۇچىلىرىنى ئۈلگە كۆرسىتىش خاراكتېرلىك تەربىيەلەش›› ۋە ‹‹ئوتتۇرا، غەربىي رايونلاردىكى يېزا تايانچ ئوقۇتقۇچىلىرىنى تەربىيەلەش››تىن ئىبارەت ئىككى تۈرنى ئۆز ئىچىگە ئالىدىكەن. بۇنىڭدا ئوتتۇرا، غەربىي رايونلاردىكى يېزا تايانچ ئوقۇتقۇچىلىرىنى تەربىيەلەش تۈرىگە نۇقتىلىق مەدەت بېرىلىپ، يەرلىك ئورۇنلار ئوقۇتقۇچىلارنى تەربىيەلەش تۈزۈلمىسىنى مۇكەممەللەشتۈرۈشكە يېتەكلىنىپ ۋە رىغبەتلەندۈرۈلۈپ، يېزا ئوقۇتقۇچىلىرىنى تەربىيەلەش سالمىقى ئاشۇرۇلۇپ، ئوقۇتقۇچىلارنى تەربىيەلەش ئىسلاھاتى ئىلگىرى سۈرۈلۈپ، ئالىي پېداگوگىكا مەكتەپلىرى ئاساسىي مائارىپقا يۈزلەندۈرۈلۈپ، ئاساسىي مائارىپقا مۇلازىمەت قىلدۇرۇلىدىكەن.
ئاپتونوم رايونلۇق مائارىپ نازارىتى ئوقۇتقۇچىلار باشقارمىسىنىڭ باشلىقى شياڭ ياڭ تونۇشتۇرۇپ مۇنداق دېدى: ئاپتونوم رايون بۇ يىل 8 – ئايدىن 12 – ئايغىچە ‹‹دۆلەتلىك تەربىيەلەش پىلانى››نى رايون ئىچىدىكى توققۇز تەربىيەلەش مەكتىپى ۋە تۆت يىراق مۇساپىلىك تەربىيەلەش ئورگىنىغا ھاۋالە قىلىپ، خىزمەتتىن ئايرىلىپ ئوقۇش، قىسقا مۇددەتلىك مەركەزلىك تەربىيەلەش ۋە توردا يىراق مۇساپىلىك تەربىيەلەشتىن ئىبارەت ئۈچ چوڭ تۈر، 27 تارماق تۈر، 58 پەن بويىچە تەربىيەلەپ، ئاپتونوم رايونىمىزنىڭ مەجبۇرىيەت مائارىپى ئۈچۈن يېزا تايانچ ئوقۇتقۇچىسىدىن تەخمىنەن 12 مىڭ 536نى تەربىيەلەيدۇ، دېدى.