شىنخۇا تورى ۋاشىنگتون 23 – مارت تېلېگراممىسى : ئامېرىكا مالىيە مىنىستىرلىكى 23 – مارت ھۆكۈمەت ۋە خۇسۇسىيلارنىڭ مەبلىغىدىن پايدىلىنىپ ، پۇل – مۇئامىلە ئاپپاراتلىرىنىڭ ‹‹ زەھەرلىك مەبلىغى ›› نى سېتىۋېلىپ ، كرېدىتنىڭ ئەسلىگە كېلىشىنى ئىلگىرى سۈرىدىغانلىقىنى ئېلان قىلغان .

     ئامېرىكا مالىيە مىنىسىتىرلىكىنىڭ شۇ كۈنى ئېلان قىلغان باياناتىدا ، ‹‹ ئومۇم بىلەن خۇسۇسىيلار بىرلىشىپ مەبلەغ سېلىش تۈرى ›› نى تەسىس قىلىپ ، پۇل – مۇئامىلە ئاپپاراتلىرىنىڭ ‹‹ زەھەرلىك مەبلەغ ›› مەسىلىسىنى بىر تەرەپ قىلىدىغانلىقىنى ئېلان قىلغان . ھۆكۈمەت بۇ تۈرگە 75 مىليارد ئامېرىكا دوللىردىن 100 مىليارد ئامېرىكا دوللىرىغىچە مەبلەغ سېلىپ ، بۇ مەبلەغنى خۇسۇسىيلارنىڭ مەبلىغى بىلەن بىرلەشتۈرۈپ 500 مىلياردلىق ‹‹ زەھەرلىك مەبلەغ ›› نى سېتىۋالىدىكەن ، بۇنىڭدىن كېيىن ‹‹ زەھەرلىك مەبلەغ ›› نى سېتىۋېلىش سوممىسى 1 تىرلىيون ئامېرىكا دوللىرىغا يېتىشى مۇمكىنكەن .

   مالىيە مىنىستىرلىكىدىكى مۇناسىۋەتلىك خادىملارنىڭ ئېيتىشىچە ، پۇل – مۇئامىلە ئاپپاراتلىرىنىڭ ‹‹ زەھەرلىك مەبلەغ ›› نى ئۆزلىكىدىن تازىلىشى ياكى ھۆكۈمەتنىڭ بىۋاستە سېتىۋېلىشىدىن ئىبارەت بۇ ئىككى خىل تەدبىرىنى سېلىشتۇرغاندا ، شۇ كۈنى ئېلان قىلغان يېڭى تەدبىر ئەڭ ياخشى تاللاشكەن . پۇل – مۇئامىلە ئاپپاراتلىرىنىڭ ‹‹ زەھەرلىك مەبلەغ ›› نى پەيدىنپەي تازىلىشى پۇل – مۇئامىلە كرىزىسىنىڭ ئۇزۇنغا سوزۇلۇشىنى كەلتۈرۈپ چىقىرىشى مۇمكىنكەن ، ئەگەر ھۆكۈمەت بىۋاستە ‹‹ زەھەرلىك مەبلەغ ›› نى سېتىۋالسا ، باج تاپشۇرغۇچىلار بارلىق خەۋپ – خەتەرنى ئۈستىگە ئالىدىكەن .