بېيجىڭ –شاڭخەي يۇقىرى سۈرئەتلىك تۆمۈر يولىدا پۈتۈن لىنىيە بويىچە قۇرۇلۇش باشلاندى

 
 ۋېن جياباۋ قۇرۇلۇش باشلاش مۇراسىمىغا قاتناشتى ھەم يۇقىرى سۈرئەتلىك تۆمۈر يولىغا ئۇل سالدى

ۋېن جياباۋ مۇراسىمدا سۆز قىلماقتا

        شىنخۇا ئاگېنتلىقى، بېيجىڭ خەۋىرى. 18 – ئاپرېل ج ك پ مەركىزىي كومىتېت سىياسىي بيۇروسى دائىمىي كومىتېتىنىڭ ئەزاسى، گوۋۇيۈەن زۇڭلىسى ۋېن جياباۋ بېيجىڭدا بېيجىڭ – شاڭخەي يۇقىرى سۈرئەتلىك تۆمۈر يولىنىڭ قۇرۇلۇشىنى باشلاش مۇراسىمىغا قاتناشتى ھەم بېيجىڭ – شاڭخەي تۆمۈر يولىدا پۈتۈن لىنىيە بويىچە قۇرۇلۇش باشلانغانلىقىنى جاكارلىدى.

       داشىڭ رايونىدىكى بېيجىڭ – شاڭخەي يۇقىرى سۈرئەتلىك تۆمۈر يولىنىڭ بېيجىڭ ‹‹ئالاھىدە چوڭ›› كۆۋرۈكى ئورنىدىكى قۇرۇلۇش باشلاش مۇراسىمىنىڭ نەق مەيدانىدا، جۇڭگو تۆمۈر يول قۇرۇلۇشى پاي چەكلىك شىركىتىنىڭ سەككىز چوڭ ئايلانما بۇرغىلاش ماشىنىسى بىرلا ۋاقىتتا ئىش باشلىدى. بۇنىڭ بىلەن بېيجىڭ – شاڭخەي يۇقىرى سۈرئەتلىك تۆمۈر يولىنىڭ ئون نەچچە يىل تەييارلىق قىلىنغان بۇ مۇھىم قۇرۇلۇشىدا پۈتۈن لىنىيە بويىچە بۈگۈن ئاخىرى قۇرۇلۇش باشلاندى.

ۋېن جياباۋ ئۇل سېلىش مۇراسىمىغا قاتناشتى

       بېيجىڭ – شاڭخەي يۇقىرى سۈرئەتلىك تۆمۈر يولى بېيجىڭ جەنۇبىي ۋوگزالىدىن باشلىنىپ، شاڭخەي خۇڭچياۋ ۋوگزالىغا تۇتىشىدۇ، يېڭىدىن قۇرۇلىدىغان بۇ قوش لىنىيىلىك تۆمۈر يولنىڭ ئومۇمىي ئۇزۇنلۇقى 1318 كىلومېتىر، ئۇ دۇنيا بويىچە لىنىيىسى ئەڭ ئۇزۇن، ئۆلچىمى ئەڭ يۇقىرى بولغان تۆمۈر يول، يېڭى جۇڭگو قۇرۇلغاندىن بۇيانقى مەبلەغ سېلىش مىقدارى ئەڭ چوڭ بولغان قۇرۇلۇش تۈرى. ئۇ بېيجىڭ، تيەنجىن، خېبېي، شەندۇڭ، ئەنخۇي، جياڭسۇ، شاڭخەي قاتارلىق يەتتە ئۆلكە، شەھەرنى كېسىپ ئۆتىدۇ، بوخەي دېڭىزى ۋە چاڭجياڭ دېلتىسىنى ئورىغان ئىككى چوڭ ئىقتىسادىي رايوننى بىرلەشتۈرىدۇ، لايىھە سۈرئىتى 350 كىلومېتىر، جەمئىي 220 مىليارد 940 مىليون يۈەن مەبلەغ سېلىنغان بولۇپ، ئومۇمىي قۇرۇلۇش مۇددىتى بەش يىل ئەتراپىدا بولىدۇ. قۇرۇلۇش پۈتكەندىن كېيىن، پويىزغا ئولتۇرۇپ بېيجىڭدىن شاڭخەيگە بېرىش ئۈچۈن بەش سائەتلا كېتىدۇ.

ۋېن جياباۋ ئىشچىلار بىلەن قول ئېلىشىپ كۆرۈشتى

     ۋېن جياباۋ قۇرۇلۇش باشلاش مۇراسىمىنىڭ ئالدىدا، تۆمۈر يول مىنىستىرلىكى مەسئۇلىنىڭ بېيجىڭ – شاڭخەي تۆمۈر يول قۇرۇلۇشىغا ئالاقىدار ئەھۋالىدىن بەرگەن دوكلاتىنى ئاڭلىدى. قۇرۇلۇش باشلاش مۇراسىمىدا، ئۇ بېيجىڭ – شاڭخەي يۇقىرى سۈرئەتلىك تۆمۈر يول پاي چەكلىك شىركىتىنىڭ ۋىۋىسكىسىنىڭ يوپۇقىنى ئاچتى ھەم جۇڭگو تۆمۈر يول قۇرۇلۇش شىركىتىدىكى ئىشچىلار بىلەن بىرلىكتە بېيجىڭ – شاڭخەي يۇقىرى سۈرئەتلىك تۆمۈر يولىغا ئۇل سالدى. ۋېن جياباۋ يەنە قۇرۇلۇشچىلارنىڭ ئارىسىغا بېرىپ، ئۇلار بىلەن كۆرۈشۈپ، ئۇلاردىن سەمىمىي ھال سورىدى.

       ج ك پ مەركىزىي كومىتېت سىياسىي بيۇروسىنىڭ ئەزاسى، گوۋۇيۈەننىڭ مۇئاۋىن زۇڭلىسى جاڭ دېجياڭ قۇرۇلۇش باشلاش مۇراسىمىغا قاتناشتى ھەم سۆز قىلدى.
