تىجارەتتە بىلىم ، ئۇچۇر ئىگىلەش ئىنتايىن مۇھىم.(ئۇدۇم) [ئۇلىنىشنى كوپىيەلەش]

20 – ئەسىرنىڭ 80 – يىللىرىدىن باشلاپ شەھەر، يېزىلاردىكى بىر قىسىم كىشىلەر باشلامچىلىق بىلەن سودا دېڭىزىغا چۈشتى، كېيىنچە ئۇلارنىڭ سانى ئۈزلۈكسىز كۆپىيىشكە باشلاپ، تىجارەت دائىرىسى كېڭەيدى. ئۇلار ھەر يىلى دېھقان – چارۋىچىلار ئىشلەپچىقارغان مەھسۇلاتنى يۆتكەپ سېتىش ئارقىلىق دېھقان – چارۋىچىلارغا مەنپەئەت يەتكۈزۈش بىلەن بىللە، ئۆزلىرىمۇ پۇل تېپىپ بېيىدى.

   ئەمما، سودىدا ئوڭۇشسىزلىققا ئۇچرىغانلارمۇ ئاز ئەمەس. ئەگەردە سىز سودىدا مەغلۇپ بولغانلاردىن نېمە ئۈچۈن بۇ ھالغا چۈشۈپ قالغانلىقىنى سورىسىڭىز، ئۇلار دېيىشىۋالغاندەكلا ‹‹باشقىلارغا قويۇلۇپ كەتتىم›› دەپ جاۋاب بېرىشىدۇ. بۇلارنى ‹‹قويۇۋەتكەن››لەر زادى كىملەر؟ ئەلۋەتتە، ئۇلارمۇ پۇل تېپىش ئۈچۈن ‹‹كاللا›› ئىشلىتىۋاتقان سودىگەرلەردۇر. مېنىڭچە ئۇلارنىڭ باشقىلاردىن ئاغرىنىشى ئورۇنسىز. ‹‹قويۇلۇپ كېتىۋاتقان›› سودىگەرلىرىمىز كۆپرەك پۇل تېپىشنى ئويلىغان ھەم پۇل تاپقان بولسىمۇ، سودىغا تېخى پىشمىغانلىقى، بازار ئۇچۇرىغا يېتەرلىك ئەھمىيەت بەرمىگەنلىكى تۈپەيلىدىن زىيان تارتتى. كونىلار ‹‹پۇل تاپقىچە ئەقىل تاپ›› دەپ توغرا ئېيتقان. ئەپسۇس، كۆپلىگەن سودىگەرلەر بۇنىڭغا تولۇق ئەمەل قىلالمىدى، بازارغا يۈزلەنگەندىن تارتىپ خېلىغىچە بىر خىل ‹‹سەنەمگە›› دەسسەۋەردى. ھازىر بىر قىسىم سودىگەرلىرىمىز ئۇچۇردىن ياخشى پايدىلىنىپ بازار ئىگىلەپ كۆپلەپ پۇل تاپماقتا. لېكىن، بۇرۇن پۇل تاپقان بەزى تىجارەتچىلەر ھازىر نېمە قىلارىنى بىلەلمەي تېڭىرقاپ يۈرۈۋاتىدۇ. ئۇلارنىڭ بەزىلىرى ‹‹بىزدە مەبلەغ يوق، مەبلىغىمىز يېتەرلىك بولسا، سودا دېگەندىن ئوت چىقىرىۋېتىمىز›› دېيىشىدۇ. بۇنىسى توغرا، سودا – سېتىقتا پۇل بولمىسا بولمايدۇ. ئەمما، چوڭ ئىشلارنى قىلىپ پۇل تاپقان كىشىلەرنىڭ ئەسلىدىلا كۆپ پۇلى بولغان ئەمەس. ئۇلار ئازغىنە دەسمايە بىلەن كىچىك ئىشلارنى قىلىش، كۆزى يەتكەن سودىنى قىلىش، شۇنداقلا بازارنى توغرا مۆلچەرلەپ، قەرز ئېلىپ چوڭ ئىشلارنى تەۋرىتىش ئارقىلىق پۇل تاپقان. بىراق، بىزنىڭ بەزى ئادەملىرىمىزدە پايدىسى ئازراق ئىشلارنى قىلىشنى خالىمايدىغان، چوڭ ئىشلارغا چامىسى يەتمەيدىغان ئەھۋال مەۋجۇت. ئادەمدە چوڭ – چوڭ ئىشلارنى قىلىشقا تەۋەككۈل قىلالايدىغان ئىدىيەنىڭ بولغىنى ياخشى. ئەمما، ‹‹يوتقانغا قاراپ پۇت سۇنۇش››نىمۇ بىلىش كېرەك، چوڭ ئىشلارنى قىلىشتىن بۇرۇن كىچىك ئىشلارنىمۇ قىلىش، ئاز پايدا ئېلىش ئارقىلىقمۇ پۇل تېپىشنى ئۆگىنىۋېلىش ئىنتايىن مۇھىم.

   يۇقىرىدىكىلەر سودا بىلەن شۇغۇللىنىۋاتقان قىسمەن كىشىلەردىن چىقىرىلغان يەكۈن. كۆپىنچە سودىگەرلەر تىجارەتتە ئادىل رىقابەتلىشىش، ئۇچۇرغا ئەھمىيەت بېرىش، سۈپەتلىك، باھاسى مۇۋاپىق مەھسۇلاتلار ئارقىلىق بازار ئىگىلەشتەك ئالاھىدىلىكى بىلەن پۇل تاپماقتا. ھازىر بازار رىقابىتى كۈندىن – كۈنگە كەسكىن بولۇۋاتىدۇ، شۇڭا، ئىلگىرى سودا بىلەن شۇغۇللانغان ۋە يېڭىدىن تىجارەتكە كىرىشمەكچى بولغانلارنىڭ پۇل تېپىشنى ئويلاشتىن بۇرۇن سودىغا ئائىت بىلىم ۋە ئۇچۇر ئىگىلەشنى ياخشى ئۆگىنىشى، سودىدا ئادىل رىقابەتلىشىش، بازاردا ئۈستۈنلۈكنى ئىگىلەشكە ماھىر بولۇشى ئىنتايىن مۇھىم. كىمىكى بۇنىڭغا ھۆرمەت قىلماي سودىدا كونا قاراش بويىچە ئىش قىلسا، يول تېپىشى قۇرۇق خىيال بولۇپ قالىدۇ. سودا قىلىپ پۇل تېپىشنى خالىغان ھەر قانداق كىشى، ئالدى بىلەن، بىلىم ئېلىشقىمۇ مەبلەغ سېلىشى كېرەك.

دىمەك .سودىگەركەنسىز ------دە

تىجارەتكە قىزىقىدىغان ۋە كىرىشمەكچى بولغانلارغا ياخشى دەرسلىك يوللاپسىز، رەھمەت!