شىنخۇا ئاگېنتلىقى، بېيجىڭ، 14-ئىيۇل تېلېگراممىسى: گوۋۇيۈەننىڭ زۇڭلىسى لى كېچياڭ 13-ئىيۇل ئەنگلىيەنىڭ يېڭىدىن تەيىنلەنگەن باش ۋەزىرى تېرېسا مېيغا تەبرىك تېلېگراممىسى ئەۋەتتى.
لى كېچياڭ تەبرىك تېلېگراممىسىدا مۇنداق دەپ كۆرسەتتى: يېقىنقى يىللاردىن بۇيان، جۇڭگو-ئەنگلىيە مۇناسىۋىتى ئەۋزەل تەرەققىيات ۋەزىيىتىنى ساقلاپ كەلدى، ئىككى دۆلەت يۇقىرى قاتلاملىرىنىڭ ئالاقىسى كۆپىيىپ، ئەمەلىي ھەمكارلىق پۇختا ئىلگىرى سۈرۈلۈپ، ئادىمىيەت ئالماشتۇرۇشى كۈنسايىن قويۇقلاشتى. جۇڭگو تەرەپ ئەنگلىيە ھۆكۈمىتىنىڭ جۇڭگو بىلەن بولغان ھەمكارلىقنى ئىلگىرى سۈرۈشتىكى «باتۇرلۇق بىلەن يول ئېچىش»تەك ئىلگىرىلەش روھىغا ئاپىرىن ئېيتىدۇ، ئەنگلىيە تەرەپ بىلەن بىرلىكتە تىرىشىپ، جۇڭگو-ئەنگلىيە مۇناسىۋىتىنىڭ تەرەققىياتىنى تېخىمۇ ئىلگىرى سۈرۈپ، ئىككى دۆلەت خەلقىگە بەخت ئاتا قىلىشنى خالايدۇ.
لى كېچياڭ مۇنۇلارنى بىلدۈردى: جۇڭگو تەرەپ باش ۋەزىر تېرېسا مېينىڭ بۇ يىل 9-ئايدا 20 دۆلەت گۇرۇھى خاڭجوۋ ئۇچرىشىشىغا قاتنىشىشىنى قارشى ئالىدۇ، ئىككى تەرەپنىڭ قولايلىق ۋاقىتتا يېڭى بىر نۆۋەتلىك جۇڭگو-ئەنگلىيە زۇڭلىلىرىنىڭ يىللىق ئۇچرىشىشىنى ئۆتكۈزۈپ، ئىككى دۆلەت مۇناسىۋىتى ۋە ھەمكارلىق، تەرەققىيات تەدبىرلىرىنى بىرلىكتە پىلانلاشنى خالايدۇ.
