خەلق تورىنىڭ 10-مارت خەۋىرى: 3-ئاينىڭ 10-كۈنى مۇخبىرنىڭ ئۈرۈمچى شەھەرلىك قۇرۇلۇش كومىتېتىدىن ئىگىلىشىچە، يېڭى نۇسخىدىكى «ئۈرۈمچى شەھەرلىك يېقىلغۇ گازنى باشقۇرۇش نىزامى» 3-ئايدىن باشلاپ ئەمەلىيلەشتۈرۈلىدىغان بولۇپ، نىزامدا يېقىلغۇ گاز تۇرۇبا ئەسلىھەلىرىنى ئاسراش ۋە يېڭىلاشقا مۇناسىۋەتلىك ماددىلار ئايدىڭلاشتۇرۇلدى. تىلغا ئېلىشقا ئەرزىيدىغىنى شۇكى ئۈرۈمچى شەھەر ئاھالىسى ئەمدى مۇددىتى توشقان گاز سائىتىنى ھەقسىز ئالماشتۇرالايدۇ.
يېڭى نىزامدا بەلگىلىنىشىچە، 3-ئايدىن كېيىن مۇددىتى توشىدىغان ئاھالىلەر ئىشلىتىدىغان گاز سائىتىنى يېقىلغۇ گاز كارخانىسى مەسئۇل بولۇپ ھەقسىز ئالماشتۇرۇپ بېرىدۇ. مۇنداقچە ئېيتقاندا ئاھالىلەر ئىشلىتىدىغان گاز سائىتىنىڭ مۇددىتى توشقاندىن كېيىن كارخانىلار پۇل چىقىرىپ گاز سائىتىنى ئالماشتۇرىدۇ. ئىگىلىنىشىچە، نۆۋەتتە ئۈرۈمچى شەھىرىدىكى يېقىلغۇ گاز ئابونېنتلىرى بىر مىليون 110 مىڭدىن ئاشقان بولۇپ، ئىشلىتىش مۇددىتى توشقان گاز سائىتىدىن تەخمىنەن 500 مىڭغا يېقىنى بار ئىكەن. 3-ئاينىڭ 1-كۈنىدىن ئىلگىرى ئىشلىتىش مۇددىتى توشقان ئابونېنتلار ئۆزى ھەق تۆلەپ گاز سائىتىنى ئالماشتۇرىدۇ، ھەر بىر گاز سائەت ھەققى ۋە ئورنىتىش ھەققى تەخمىنەن 400 يۈەن ئەتراپىدا بولىدۇ.
نۆۋەتتە ئاھالىلەر ئىشلىتىدىغان گاز سائىتىنى ئالماشتۇرۇش خىزمىتى قانات يايدۇرۇلدى. شىنجاڭ يېقىلغۇ گاز گۇرۇھى تەبىئىي گاز شىركىتىنىڭ مۇئاۋىن دىرېكتورى چېن جۈنشياڭنىڭ مۇخبىرغا تونۇشتۇرۇشىچە، نۆۋەتتە شىركەت ئابونېنتلارنىڭ سانلىق مەلۇماتلىرىنى رەتلەۋاتقان بولۇپ، ئىمكانىيەتنىڭ بارىچە تېز سۈرئەتتە كۆپچىلىك ئۈچۈن گاز سائىتىنى ئالماشتۇرۇپ بېرىدىكەن.
ئۇنىڭدىن باشقا نىزامدا بەلگىلىنىشىچە، ئاھالىلەر ئىشلەتمەيدىغان ئۆي ئىچىدىكى گاز ئەسلىھەلىرىنى يىلدا ئاز دېگەندىمۇ بىر قېتىم تەكشۈرۈش، ئاھالىلەر ئابونېنتىنى ھەر ئىككى يىلدا ئاز دېگەندىمۇ بىر قېتىم تەكشۈرۈش، بەش كۈن بۇرۇن ئابونېنتقا ئۇقتۇرۇش قىلىش ھەمدە ئابونېنتلارنىڭ بىخەتەر گاز ئىشلىتىشىگە يېتەكچىلىك قىلىش، ئىشىك ئالدىغىچە مۇلازىمەت قىلىش، بىخەتەرلىك تەكشۈرۈش ۋاقتىدا خىزمەتچى خادىملارنىڭ بىردەك بەلگسىى بار كىيىم كىيىپ، ئىناۋەتلىك خىزمەت كىنىشكىسىنى كۆرسىتىش قاتارلىقلار بەلگىلەندى.
تەرجىمىدە: ھاجىم
