يېقىندىن بۇيان،يولۋاس بى بىنىڭ چىشى كېچە-كۈندۈز ئاغرىيدىغان بولۇپ قاپتۇ. ئاغرىق ئازابىدىن ئۇنىڭ ﻫالى قالماپتۇ.                                                             
ئەسلىدە، بى بىنىڭ چىشى ئىنتايىن مۇستەﻫكەم ئىكەن. لېكىن،ئۇ دائىم كەمپىت يېگەنلىكى، چىشىنى چوتكىلاشنى ياخشى كۆرمەيدىغانلىقى ئۈچۈن ،ئۇنىڭ ﻫەممە چىشىنى قۇرت يەپ كېتىپتۇ.                                                                  
مايمۇن دوختۇر بى بىگە يەنە كەمپىت يېسە، ﻫەممە چىشىنى تارتىۋەتمىسە بولمايدىغانلىقىنى ئېيتىپتۇ.
شۇنىڭ بىلەن، بى بى كەمپىت  يېمەسلىك قارارىغا كەپتۇ. ئۇ ئۇنتۇپ قالماسلىق ئۈچۈن، ﻫەر كۈنى«كەمپىت يېمەيمەن» دېگەن سۆزنى ئون نەچچە قېتىم تەكرارلايدىكەن.
بۆرىچاق بېي بېي بۇنى بىلگەندىن كېيىن،كۆڭلىدە، بۇ ئاچ كۆز يولۋاس چوقۇم ئۇنتۇپ قالىدۇ،دەپ ئويلاپتۇ. ئەتىسى بۆرىچاق بېي بېي بىر قۇتا كەمپىتنى ئېلىپ بى بىنىڭ ئۆيىگە كەپتۇ.                                                                     
«كەمپىت يېمەيمەن،كەمپىت يېمەيمەن! » بى بى بىر قۇتا كەمپىتكە قاراپ،ئۆز-ئۆزىگە شۇنداق پىچىرلاپتۇ.
ــ نېمىشقا كەمپىت يېمەيسەن؟ ــ دەپ سوراپتۇ بېي بېي قەستەن.                                      
ــ چىشىمنى ئاسراش ئۈچۈن! ــ دەپ جاۋاپ بېرىپتۇ بى بى.                                          
ــ ﻫە،مۇنداقكەندە! ئەمسە مەن بۇ تاتلىق كەمپىتلەرنى ئېلىپ كەتسەم بولغۇدەك،ــ بېي بېي شۇنداق دەپ يالغاندىن ماڭماقچى بولۇپتۇ.                                               
ــ توختا،ــ بى بى بېي بېينى تارتىپ،ــ يېسەم بولمايدۇ. لېكىن،قاراپ تۇراي،ــ دەپتۇ.                 
بېي بېي ئاچ كۆز يولۋاس بى بىنىڭ ئاغىزىغا سېرىق سۇ كەلگەنلىكىنى كۆرۈپ:                           
ــ كەمپىتنى ئاغىزىڭغا سېلىپ چاينىمىساڭلا بولمىدىمۇ،بۇنىڭدا چىشىڭغا زىيان يەتمەيدۇ ئەمەسمۇ،ــ دەپتۇ.
شۇنىڭ بىلەن بى بى قۇتىنى ئېچىپ كەمپىتنى يېيىشكە باشلاپتۇ.                                      
ئىككى ئايدىن كېيىن بى بىنىڭ ﻫەممە چىشىنى قۇرت يەپ پۈتۈنلەي تارتقۇزۇۋېتىپتۇ.