بارالمىدىم يېنىڭغا
- يوللانغان ۋاقتى :
- 11-21
- كۆرۈلۈشى:
- 1077 قىتىم
ئەنۋەر ﻫىدايەت
بالام دېسەڭ، مەنمۇ بالام دەپ،
يانفوندىلا ئاددىي سالام دەپ،
تۈگىمىدى تېخى چالام دەپ،
بارالمىدىم يېنىڭغا ئانا.
شەنبە كەلسە تويدىن يانالماي،
خۇش كەتتىگە ياق دەپ بولالماي،
يەكشەنبىدە ئۆيدىن چىقالماي،
بارالمىدىم يېنىڭغا ئانا.
ئەتىگەندە ئىشقا باردىم دەپ،
سۇ تۇتقاندا توڭنى ياردىم دەپ،
كەچ كىرگەندە بەكمۇ ﻫاردىم دەپ،
بارالمىدىم يېنىڭغا ئانا.
كېچە-كۈندۈز غېمىمنى يېسەڭ،
قايسى كۈنى كېلىسەن؟ دېسەڭ،
ئەتە باراي دەپ قويۇپ، ئەتتەڭ!
بارالمىدىم يېنىڭغا ئانا.
