بۈگۈن
(مۇخەممەس )
تۇرسۇن ئىمىن شەيدائى
(شىنجاڭ يازغۇچىلار جەمئىيىتىنىڭ ئەزاسى )
ئۈزىدى ھوت @تەبىئەتكە كۆر :ھەمەل @ھەمدەمدۇر بۈگۈن ،
ئاق لىباسلىق قىش -ئايازغا خاتىمە -بەرھەمدۇر بۈگۈن ،
نورۇز قىزى ئاچتى رۇخسار شادلىق نەسىپ دەمدۇر بۈگۈن ،
چېھرىمىزدەپارلىدى كۈن( غەم -غۇسسىلەر كەمدۈر بۈگۈن )،
ئايەم پەيتى يايرىدى جان ھۈزۇر مۇجەسسەمدۇر بۈگۈن .
قىش پەسىللىك ئۇيقۇسىدىن ئۇيغاندى كەڭ ئالتۇن دىيار ،
گۈل باھارنى ئەتتى باغاش بولغاچ ئاڭا تەشنا -خۇمار ،
ئەتمەس مەستخۇش قايسى دىلنى بۇنداق ۋىسال -لەزىز دىدار ،
ئۆرۈلۈپ يىل ئۆمرىمىزگە يېڭىچە مەزمۇن بولدى يار ،
خىسلىتى مىڭلارچە داستان ،شەرىپى ئەزەمدۇر @بۈگۈن .
كۆكىرىپ قىرلار -ئېدىرلار ،كەيدى يېشىل تاج تاغۇ -تاش ،
چىقتى ئۆچەكتىن تۈرلى جاندار بەس -بەستە شۇنچە ئالدىراش ،
كەلمەكتە كۆكتە سەپ تۈزۈپ تۇرنىلار (ئاۋازى شاش ) ،
ھەرياندا قۇشلار نەغمىسى جانغا ئارامدۇر ھەي ئاداش ،
بەجايىكى تويغا ئەنداز ھېس -تۇيغۇ مەھرەمدۇر بۈگۈن !
چاچتى خۇش ھىد يەر جاھانغا گۈل -چېچەكلەر زەپ ئۇز - لېۋەن ،
پەردازلاندى باغۋارانلاركۆركىدە ھېچ يوقتۇر ئېۋەن ،
قىيغىتار تۆللىرى ھەريان چارۋىلار بەك سېمىز -تېمەن ،
شاۋقۇنلۇق دەريا -ئېقىنلار بويى تۇتاش چىملىق ، چىمەن ،
ئوخچۇيدۇ چەشمە بۇلاقلار سۇلىرى زەزەمدۇر بۈگۈن .
بار ئېتىزغا ،ھالال تەردىن تاپقان رۇناق دېھقاننى كۆر ،
رىزىق ئىزدەپ قارا يەردىن بەل باغلىغان ئىشچاننى كۆر ،
قويمىغان بىزنى ئاش -نانسىز ھاتەم كەبى ئىنساننى كۆر ،
بارچە كەسىپ تاپتى روناق ،يول كەڭرىدۇر ھەر ياننى كۆر ،
تاپقاچ ۋىسال ئارزۇ -تىلەكلەر جانلار بەردەمدۇر بۈگۈن .
مەشرەپ ئەھلى سورۇنلارغا باسماقتا بەس -بەستە قەدەم ،
چېلىنىپ ناغرا ،سۇنايلار قاينايدۇ ساما دەممۇ -دەم ،
قېتىلىپ بېيىت قۇشاقلار ئۇسسۇلغا چۈشتى شوخ سەنەم ،
ئۆغۇللار ئۇچۇرسا لەگلەك ،ئىلەڭگۈچتە قىزلارمۇ ھەم ،
قۇتلۇق ئايەم ۋۇجۇدلارغا شىپالىق مەلھەمدۇر بۈگۈن .
ئانا يۇرتنىڭ گۈزەللىگى چىن سۆيگۈگە بەرمەكتە جان ،
نورۇز ئېشى يېگەن ئاۋام ئۆملۈكنى كۆزلەپ ئىچتى ئان ،
ئۆچ -ئاداۋەت ،سوغۇقچىلىق يۇيۇلدى قالماستىن نىشان ،
ئەمگەك ،مەرتلىك ،خەيرى -ئېھسان...ساۋاپلىق ئىشلار كۆپ ھامان ،
ئەنئەنىۋىي بايرىمىمىز بىر ياخشى ئەردەمدۇر @بۈگۈن .
ئىزاھات :
@ھوت -قىشنىڭ ئاخىرقى ئېيى
@ھەمەل -باھارنىڭ باشلىنىدىغان ئېيى
@ئەزەم -ئەڭ ئۇلۇغ ،ئەڭ كاتتا
@ئەردەم -ئەدەپ -ئەخلاق ،تەرتىپ
ئاپتور :بورتالا شەھەرلىك رادىئو -تېلېۋىزىيە
ئىستانسىسىدىن
10326 قېتىم كۆرۈلدى | xeydayi | ئەسەر يوللىغۇچى : | |
2017-3-19 0:56:49 | :يوللانغان ۋاقتى |
بۇ تېمىغا تېخى ئىنكاس يېزىلماپتۇ
تور بىكىتىمىزدىكى ئەسەرلەرنىڭ ئىشلىتىش ھوقۇقى تور بىكىتىمىزگە ۋە ئاپتورغا تەۋە بولۇپ، قالايمىقان كۆچۈرۈپ تارقاتقۇچىلارنىڭ مەسئۇلىيتى قاتتىق سۈرۈشتە قىلىنىدۇ. ئەمگىكىمىزگە ھۆرمەت قىلىڭ! باشقىلارنىڭ ئەمگىكىنى قەدىرلەش گۈزەل ئەخلاقتۇر!!!! بىكەت مەسئۇلى: نۇرمۇھەممەت ئالاقە تېلېفۇن - ئۈندىدار: 18999843588
www.yazghuqilar.com
新ICP备15002323号
|