بۇ دۇنيا (شېئىر) 

 پاتىگۈل ئاخۇنقارى

 گاھ كۇلدۇرۇپ گاھىدا يىغلىتاركەن بۇ دۇنيا ،
قىشتا  سولغان غۇنچىنى بىخلىتاركەن  بۇ دۇنيا .
بەزىلەرگە شۇنچىلىك رەھىمسىزلىك قىلسىمۇ ،
بىر ياخشىنى ياماندىن  ئىلغىتاركەن بۇ دۇنيا .

تالاشمىغىن ئەجدادتىن  قالار ئىكەن بۇ دۇنيا ،
سېنى  تېخى مازارغا سالار ئىكەن بۇ دۇنيا .
جۇپ قولىدا گۈلدەستە كۆتۈرگەنلەر ئاز ئەمەس ،
بەزەن  يەنە ئىت كەبى تالار ئىكەن بۇ دۇنيا .

قايناپ تۇرغان قازاننىڭ ئۆزى  ئىكەن  بۇ دۇنيا ،
گاھ ئاشىقنىڭ بىغۇبار سۆزى ئىكەن بۇ دۇنيا .
بازىرى كۆپ شۇنچىلىك تاپالمايسەن لازىملىق ،
دەرت-قايغۇنىڭ ،ھەسرەتنىڭ  كۆزى ئىكەن  بۇ دۇنيا .